ಮಸೀದಿ ಧ್ವಂಸ ಪ್ರಕರಣ ರದ್ದುಮಾಡುವುದೇ ಹೋರಾಟಗಾರರಿಗೆ ನೀಡುವ ಗೌರವ: ಶಿವಸೇನಾ

ಪಕ್ಷದ ಮುಖವಾಣಿ ‘ಸಾಮ್ನಾ’ದಲ್ಲಿ ಈ ಕುರಿತ ಲೇಖನ ಪ್ರಕಟಿಸಿರುವ ಸೇನಾ, ‘ಬಾಬರ್ ಆಕ್ರಮಣಕಾರ ಎಂಬುದನ್ನು ಒಪ್ಪಿಕೊಂಡ ಕೂಡಲೇ, ಬಾಬರಿ ಮಸೀದಿ ಪ್ರಕರಣವು ಅಪ್ರಸ್ತುತ ಎನಿಸಿಬಿಡುತ್ತದೆ’ ಎಂದಿದೆ.

ರಾಮ ಮಂದಿರ ಕುರಿತ ಪ್ರಕರಣದ ತೀರ್ಪನ್ನು ಸುಪ್ರೀಂ ಕೋರ್ಟ್‌ ನೀಡಿದ ನಂತರವೂ, ಮಸೀದಿ ಕೆಡವಿದ ಘಟನೆಯ ತನಿಖೆಯನ್ನು ಸಿಬಿಐ ಮುಂದುವರಿಸಿದೆ. ಹೋರಾಟದ ಮುಂಚೂಣಿಯಲ್ಲಿದ್ದ ಎಲ್‌.ಕೆ. ಅಡ್ವಾಣಿ ಅವರು ಆರೋಪಿಯಾಗಿ ನ್ಯಾಯಾಲಯದ ಮುಂದೆ ಹಾಜರಾಗುತ್ತಿದ್ದಾರೆ. ಜುಲೈ 24ರಂದು ಸಿಬಿಐಯ ವಿಶೇಷ ನ್ಯಾಯಾಲಯವು ವಿಡಿಯೊ ಸಂವಾದದ ಮೂಲಕ ಅಡ್ವಾಣಿ ಅವರ ಹೇಳಿಕೆಯನ್ನು ದಾಖಲಿಸಲಿದೆ.

‘ಬಾಬರಿ ಮಸೀದಿ ಕೆಡವಿದ್ದನ್ನು ಜಗತ್ತೇ ನೋಡಿದೆ. ಅಂದು ಅನೇಕ ‘ಯೋಧ’ರ ಮುಖಗಳು ಭಯದಿಂದ ಕಪ್ಪಾಗಿದ್ದವು. ಮಸೀದಿ ಕೆಡವಿದ್ದು ನಾವಲ್ಲ, ಶಿವಸೇನಾದವರು’ ಎಂದು ಬಿಜೆಪಿಯ ಉಪಾಧ್ಯಕ್ಷ ಸುಂದರ್‌ಸಿಂಗ್‌ ಭಂಡಾರಿ ಹೇಳಿದ್ದರು. ಆದರೆ ಬಾಳಾಸಾಹೇಬ ಠಾಕ್ರೆ ಅವರು ‘ಶಿವಸೈನಿಕರೇ ಈ ಕಾರ್ಯ ಮಾಡಿದ್ದು ನಿಜವಾಗಿದ್ದಲ್ಲಿ, ಆ ಬಗ್ಗೆ ನಮಗೆ ಹೆಮ್ಮೆ ಇದೆ’ ಎಂದು ಎದೆ ತಟ್ಟಿ ಹೇಳಿಕೊಂಡಿದ್ದರು’ ಎಂದು ಶಿವಸೇನಾ ಹೇಳಿದೆ.