’ಆಯುಷ್ಮಾನ್ ಭಾರತ್’ ಘೋಷಿಸಿದ ಪ್ರಧಾನಿ; ಏನಿದು ಯೋಜನೆ?

7

’ಆಯುಷ್ಮಾನ್ ಭಾರತ್’ ಘೋಷಿಸಿದ ಪ್ರಧಾನಿ; ಏನಿದು ಯೋಜನೆ?

Published:
Updated:
Deccan Herald

ನವದೆಹಲಿ: ದೀನದಯಾಳ್ ಉಪಾಧ್ಯಾಯ ಅವರ ಜನ್ಮದಿನವಾದ ಸೆಪ್ಟೆಂಬರ್‌ 25ರಂದು ’ಪ್ರಧಾನ ಮಂತ್ರಿ ಜನ ಆರೋಗ್ಯ ಅಭಿಯಾನ’ಕ್ಕೆ ಚಾಲನೆ ನೀಡುವುದಾಗಿ ಪ್ರಧಾನಿ ನರೇಂದ್ರ ಮೋದಿ ಸ್ವಾತಂತ್ರ್ಯ ದಿನದ ಭಾಷಣದಲ್ಲಿ ಘೋಷಿಸಿದರು. 

'ಆಯುಷ್ಮಾನ್ ಭಾರತ್' ರಾಷ್ಟ್ರೀಯ ಆರೋಗ್ಯ ರಕ್ಷಣಾ ಮಿಷನ್‌(ಎಬಿ–ಎನ್‌ಎಚ್‌ಪಿಎಂ) 50 ಕೋಟಿ ಜನರನ್ನು ಒಳಗೊಳ್ಳುವ ಯೋಜನೆಯಾಗಿದ್ದು, ವಿಶ್ವದ ಅತಿದೊಡ್ಡ ಆರೋಗ್ಯ ಯೋಜನೆ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಈ ಯೋಜನೆಗಾಗಿ ದೇಶ ವಾರ್ಷಿಕ ಸುಮಾರು ₹12 ಸಾವಿರ ಕೋಟಿ ವೆಚ್ಚ ಮಾಡಲಿದೆ. ಪ್ರಧಾನ ಮಂತ್ರಿ ಜನ ಆರೋಗ್ಯ ಅಭಿಯಾನವು ಮೊದಲ ಹಂತದಲ್ಲಿ ಛತ್ತೀಸಗಡ, ಉತ್ತರಾಖಂಡ, ಪಶ್ಚಿಮ ಬಂಗಾಳ, ಚಂಡೀಗಢ, ಹಿಮಾಚಲ ಪ್ರದೇಶ, ಡಾಮನ್‌ ಮತ್ತು ಡಿಯು, ನಾಗಾಲ್ಯಾಂಡ್‌, ಮಣಿಪುರ, ಹರಿಯಾಣ ಹಾಗೂ ಆಂಧ್ರ ಪ್ರದೇಶದಲ್ಲಿ ಪ್ರಾರಂಭವಾಗಲಿದೆ. ಎಬಿ–ಎನ್‌ಎಚ್‌ಪಿಎಂ ಅಡಿಯಲ್ಲಿ ಬಡವರಿಗೆ ಗುಣಮಟ್ಟದ ಚಿಕಿತ್ಸೆ ಪಡೆಯಲು ವಿಮಾ ಸೌಲಭ್ಯ ನೀಡಲಾಗುತ್ತದೆ. 

ಎಲ್ಲೆಲ್ಲಿ ಪ್ರಾರಂಭ?

36 ರಾಜ್ಯ ಮತ್ತು ಕೇಂದ್ರಾಡಳಿ ಪ್ರದೇಶಗಳ ಪೈಕಿ ಈವರೆಗೆ 29 ರಾಜ್ಯ, ಕೇಂದ್ರಾಡಳಿ ಪ್ರದೇಶಗಳು ಯೋಜನೆಗೆ ಕೈಜೋಡಿಸಲು ಸಮ್ಮತಿಸಿವೆ. ಮುಂಬರುವ ದಿನಗಳಲ್ಲಿ ಕರ್ನಾಟಕ ಸೇರಿ ಆರು ಸರ್ಕಾರಗಳು ಒಪ್ಪಂದಕ್ಕೆ ಸಹಿ ಹಾಕುವ ನಿರೀಕ್ಷೆಯಿದ್ದು, ಒಡಿಶಾ ಇದರಿಂದ ಹೊರತಾಗಿದೆ. ಯೋಜನೆ ಅನುಷ್ಠಾನದ ಪ್ರಾರಂಭಿಕ ಹಂತದಲ್ಲಿ ಎಲ್ಲ ರಾಜ್ಯಗಳ ಖಾಸಗಿ ಆಸ್ಪತ್ರೆಗಳನ್ನು ನೋಂದಾಯಿಸಿಕೊಳ್ಳುವುದಿಲ್ಲ ಎಂದು ರಾಷ್ಟ್ರೀಯ ಆರೋಗ್ಯ ಸಂಸ್ಥೆಯ ಸಿಇಒ ಇಂದೂ ಭೂಷಣ್‌ ಹೇಳಿದ್ದಾರೆ. 

ನಗದು ರಹಿತ ವ್ಯವಸ್ಥೆ

ಇಡೀ ಕುಟುಂಬಕ್ಕೆ ₹5 ಲಕ್ಷದ ವರೆಗೂ ಆರೋಗ್ಯ ಸಂಬಂಧಿತ ಸೇವೆ, ಚಿಕಿತ್ಸೆಗೆಯನ್ನು ಎಬಿ–ಎನ್‌ಎಚ್‌ಪಿಎಂ ಕಾರ್ಡ್ ಮೂಲಕ ಪಡೆಯಬಹುದು. ಒಮ್ಮೆ ನೋಂದಾಣಿ ಮಾಡಿಕೊಂಡರೆ, ಇತರ ಆರೋಗ್ಯ ವಿಮೆಗಳಂತೆ 1 ವರ್ಷದ ವರೆಗೂ ಸೌಲಭ್ಯವಿರುತ್ತದೆ. 

10 ಕೋಟಿ ಕುಟುಂಬಗಳು

ಇದೇ ವರ್ಷ ಸೆಪ್ಟೆಂಬರ್‌ 25ರಂದು ಆರೋಗ್ಯ ರಕ್ಷಣಾ ಯೋಜನೆಗೆ ಚಾಲನೆ ಸಿಗಲಿದ್ದು, ದೇಶದ 10 ಕೋಟಿ ಕುಟುಂಬಗಳು ಈ ಯೋಜನೆ ಲಾಭ ಪಡೆದುಕೊಳ್ಳಲಿದ್ದಾರೆ. ಪ್ರಸ್ತುತ ಯೋಜನೆಗೆ ನೋಂದಾಯಿಸಿಕೊಂಡಿರುವ ರಾಜ್ಯಗಳ ಆರೋಗ್ಯ ಯೋಜನೆ ಹಾಗೂ ರಾಷ್ಟ್ರೀಯ ಸ್ವಾಸ್ಥ್ಯ ವಿಮಾ ಯೋಜನೆಯ ಫಲಾನುಭವಿಗಳು ಸಹ ಆಯುಷ್ಮಾನ್ ಭಾರತದ ಪ್ರಯೋಜನ ಪಡೆಯಲಿದ್ದಾರೆ. 

ಔಷಧಿ ಕೊಂಡು ಬಡವಾದರು!

ಭಾರತದ ಪಬ್ಲಿಕ್‌ ಹೆಲ್ತ್‌ ಫೌಂಡೇಷನ್‌ ಕೈಗೊಂಡ ಅಧ್ಯಯನಗಳ ಪ್ರಕಾರ, ದೇಶದಲ್ಲಿ ಜನರು ಆರೋಗ್ಯ ರಕ್ಷಣೆಯ ಮುಕ್ಕಾಲು ಭಾಗ ಖರ್ಚನ್ನು ತಮ್ಮ ದುಡಿಮೆಯ ಉಳಿತಾಯದ ಹಣದಿಂದಲೇ ನಿರ್ವಹಿಸುತ್ತಿದ್ದಾರೆ. ಆರೋಗ್ಯ ಸಂಬಂಧಿತ ಖರ್ಚು–ವೆಚ್ಚದಿಂದಾಗಿಯೇ 5.5 ಕೋಟಿ ಜನರು ಬಡತನ ರೇಖೆಗಿಂತಲೂ ಕೆಲ ಮಟ್ಟದಲ್ಲಿದ್ದಾರೆ ಹಾಗೂ ಇವರಲ್ಲಿ 3.8 ಕೋಟಿ ಜನರ ಬಡತನಕ್ಕೆ ಔಷಧಿ ಖರ್ಚು ಪ್ರಮುಖ ಕಾರಣವಾಗಿದೆ. ಇಂಥ ಕುಟುಂಬಗಳ ಸುಧಾರಣೆಗಾಗಿಯೇ ಆಯುಷ್ಮಾನ್‌ ಭಾರತ ಯೋಜನೆ ರೂಪುಗೊಂಡಿದೆ. 

ಕಿಮೋಥೆರಪಿಗೂ ಅವಕಾಶ 

ಶಸ್ತ್ರಚಿಕಿತ್ಸೆ ಸೇರಿ 1,354 ಬಗೆಯ ವೈದ್ಯಕೀಯ ಸೇವೆಗಳು ಈ ಯೋಜನೆಗೆ ಅನ್ವಯಿಸುತ್ತವೆ. ಕಾರ್ಡಿಯೊಲಜಿ, ನ್ಯೂರೋಸರ್ಜರಿ, 50 ರೀತಿಯ ಕ್ಯಾನ್ಸರ್‌ಗಳಿಗೆ ಕೀಮೋಥೆರಪಿ ಚಿಕಿತ್ಸೆ, ಸುಟ್ಟ ಗಾಯಗಳ ಚಿಕಿತ್ಸೆಯೂ ಇದರಲ್ಲಿ ಒಳಗೊಂಡಿದೆ. ಶಸ್ತ್ರ ಚಿಕಿತ್ಸೆ ಮತ್ತು ಇತರೆ ವೈದ್ಯಕೀಯ ಚಿಕಿತ್ಸೆಯನ್ನು ಈ ಯೋಜನೆಯಡಿ ಏಕಕಾಲದಲ್ಲಿ ಪಡೆದುಕೊಳ್ಳಲು ಸಾಧ್ಯವಿಲ್ಲ.  

ಸೌಲಭ್ಯಗಳು

ಆಸ್ಪತ್ರೆಗೆ ದಾಖಲಾದಾಗ ಸಾಮಾನ್ಯ ದರ್ಜೆಯ ವಾರ್ಡ್‌ಗಳಲ್ಲಿ ಶುಶ್ರೂಷೆ ಮತ್ತು ನೋಂದಣಿ ಶುಲ್ಕ, ವೈದ್ಯರ ಶುಲ್ಕ, ಶಸ್ತ್ರ ಚಿಕಿತ್ಸೆ ಮತ್ತು ಅಗತ್ಯ ಸಲಕರಣೆಗಳ ಶುಲ್ಕ, ಔಷಧಿಗಳು, ರೋಗಪತ್ತೆ ಪರೀಕ್ಷೆ ಹಾಗೂ ರೋಗಿಗಳ ಆಹಾರ ವೆಚ್ಚವು ಈ ವಿಮೆಯಲ್ಲಿ ಒಳಗೊಂಡಿರಲಿದೆ. ಆಸ್ಪತ್ರೆಗೆ ದಾಖಲಾಗುವ ಮುನ್ನ ಹಾಗೂ ಆನಂತರದ ಚಿಕಿತ್ಸೆ ವೆಚ್ಚವೂ ಅನ್ವಯಿಸುತ್ತದೆ. 

ಒಂದಕ್ಕಿಂತ ಹೆಚ್ಚು ಶಸ್ತ್ರಚಿಕಿತ್ಸೆಗಳಿಗೆ ಒಳಗಾದರೆ, ಅಧಿಕ ಮೊತ್ತದ ಚಿಕಿತ್ಸೆಯ ಮೊತ್ತ ಮೊದಲ ಬಾರಿಗೆ ಮತ್ತು ಎರಡನೇ ಬಾರಿ ಶೇ 50 ಹಾಗೂ ಮೂರನೇ ಬಾರಿ ಶೇ 25ರಷ್ಟು ವೆಚ್ಚ ಭರಿಸಲಾಗುತ್ತದೆ. 

ಟ್ರಸ್ಟ್‌ ಮತ್ತು ವಿಮೆ

ಏಳು ರಾಜ್ಯಗಳು ಮತ್ತು ಎರಡು ಕೇಂದ್ರಾಡಳಿತ ಪ್ರದೇಶಗಳು ವಿಮಾ ಮಾದರಿಯನ್ನು ಆಯ್ಕೆ ಮಾಡಿಕೊಂಡಿವೆ. 20 ರಾಜ್ಯಗಳು ಟ್ರಸ್ಟ್‌ ಸ್ಥಾಪಿಸಿ ಕೇಂದ್ರ ಮತ್ತು ರಾಜ್ಯ ಸರ್ಕಾರ 60:40 ಕೊಡುಗೆ ನೀಡಲಿವೆ. ಮೊದಲ ಆರು ತಿಂಗಳಿಗೆ ₹500ಕ್ಕೆ ಕುಟುಂಬ ವಿಮೆ ವಿತರಣೆಯಾಗಲಿದೆ. ಎಂಟು ರಾಜ್ಯಗಳು ಟ್ರಸ್ಟ್‌ ಮತ್ತು ವಿಮಾ ಪಾಲಿಸಿ ಎರಡನ್ನೂ ಸೇರಿಸಿದ ಆಯ್ಕೆ ಅನುಸರಿಸಲಿದ್ದು, ₹1.5 ಲಕ್ಷದವರೆಗೂ ವಿಮಾ ಸಂಸ್ಥೆ ವೆಚ್ಚ ಭರಿಸುತ್ತದೆ ಹಾಗೂ ಅಧಿಕ್ಕಿಂತಲೂ ವೆಚ್ಚ ಹೆಚ್ಚಿದರೆ ಟ್ರಸ್ಟ್‌ ಮೂಲಕ ನೀಡಲಿದೆ.    

ಶೇ 47 ಖಾಸಗಿ ಆಸ್ಪತ್ರೆಗಳು

ಎಲ್ಲ ಸಾರ್ವಜನಿಕ ಆಸ್ಪತ್ರೆಗಳೂ ಈ ಯೋಜನೆಯ ಅಡಿಯಲ್ಲಿ ಬರಲಿದೆ. ಈಗಾಗಲೇ 7,826 ಆಸ್ಪತ್ರೆಗಳು ಸೇರ್ಪಡೆಗೊಂಡಿದ್ದು, ಇದರಲ್ಲಿ ಖಾಸಗಿ ಆಸ್ಪತ್ರೆಗಳ ಪ್ರಮಾಣ ಶೇ 47. ಯೋಜನೆಗೆ ಸೇರಲು ಬಯಸುವ ಆಸ್ಪತ್ರೆಗಳು https://abnhpm.gov.in/ ಮೂಲಕ ನೋಂದಾಯಿಸಿಕೊಳ್ಳಬಹುದು. 

 

 

ಬರಹ ಇಷ್ಟವಾಯಿತೆ?

  • 18

    Happy
  • 1

    Amused
  • 0

    Sad
  • 1

    Frustrated
  • 0

    Angry

Comments:

0 comments

Write the first review for this !