ಶುಕ್ರವಾರ, ಜೂಲೈ 10, 2020
22 °C

ಉಗ್ರ ರಿಯಾಜ್‌ ನೈಕೂ ಹತ್ಯೆ ಬಳಿಕ ಹಿಜ್ಬುಲ್‌ನ ಹೊಸ ಕಮಾಂಡರ್ ಸೈಫುಲ್ಲಾ ಹೈದರ್‌

ಏಜೇನ್ಸಿಸ್‌ Updated:

ಅಕ್ಷರ ಗಾತ್ರ : | |

ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರದಲ್ಲಿ ಹಿಜ್ಬುಲ್‌ ಮುಜಾಹಿದ್ದೀನ್ ಉಗ್ರರ ಸಂಘಟನೆಯ ಕಮಾಂಡರ್‌ ಆಗಿ ಕಾಡುತ್ತಿದ್ದ ರಿಯಾಜ್ ನೈಕೂ ಹತ್ಯೆಯ ಬಳಿಕ ಇದೇ ಸಂಘಟನೆಯ ಮತ್ತೊಬ್ಬ ಉಗ್ರ ಸೈಫುಲ್ಲಾ ಮಿರ್ ಘಾಜೀ ಹೈದರ್‌ನನ್ನು ಹಿಜ್ಬುಲ್‌ನ ಮುಖ್ಯಸ್ಥನಾಗಿ ನೇಮಕ ಮಾಡಲಾಗಿದೆ ಎಂದು ಹಿರಿಯ ಭದ್ರತಾ ಅಧಿಕಾರಿಗಳು ತಿಳಿಸಿದ್ದಾರೆ.

26 ವರ್ಷದ ಸೈಫುಲ್ಲಾ ಹೈದರ್‌ ಕಳೆದ 6 ವರ್ಷಗಳ ಹಿಂದೆ ರಿಯಾಜ್ ನೈಕೂ ಮೂಲಕ ಹಿಜ್ಬುಲ್‌ ಮುಜಾಹಿದ್ದೀನ್ ಸಂಘಟನೆ ಸೇರಿದ್ದನು. ಪಾಕ್‌ ಆಕ್ರಮಿತ ಕಾಶ್ಮೀರದ ಮುಜಾಫರ್‌ಬಾದ್‌ನಲ್ಲಿ ಸಕ್ರಿಯವಾಗಿರುವ ಹಿಜ್ಬುಲ್‌ನ ವಕ್ತಾರ ಸಲೀಂ ಹಶ್ಮಿ ಈ ಘೋಷಣೆ ಮಾಡಿದ್ದಾನೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಇದನ್ನೂ ಓದಿ: ಹಿಜ್ಬುಲ್ ಕಮಾಂಡರ್‌ ರಿಯಾಜ್ ನೈಕೂ ಭದ್ರತಾ ಪಡೆಗಳ ಬಲೆಗೆ ಬಿದ್ದಿದ್ದು ಹೇಗೆ?

ಜಮ್ಮು ಮತ್ತು ಕಾಶ್ಮೀರದಲ್ಲಿ ಉಪ ಕಮಾಂಡರ್‌ ಆಗಿ ಸಲೀಂ ಹಶ್ಮಿ ಕೆಲಸ ಮಾಡುತ್ತಿದ್ದಾನೆ. ಇವನಿಗೆ ಮತ್ತೊಬ್ಬ ಉಗ್ರ ಅಬು ತಾರಿಖ್‌ ಮಿಲಿಟರಿ ಸಲಹೆಗಾರನಾಗಿದ್ದಾನೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಕಳೆದ ಐದು ದಿನಗಳ ಹಿಂದೆ ರಿಯಾಜ್‌ ನೈಕೂ ಹಾಗೂ ಅವನ ಸಹಾಯಕ ಅದಿಲ್‌ ಅಹಮ್ಮದ್‌ನನ್ನು ಕಾಶ್ಮೀರದಲ್ಲಿ ಪೊಲೀಸರು ಹತ್ಯೆ ಮಾಡಿದ್ದಾರೆ.

ಸೈಫುಲ್ಲಾ‌ ಹೈದರ್‌ನನ್ನು 'ಮುಜೀಬ್‌' ಮತ್ತು 'ಡಾಕ್ಟರ್‌ ಸೈಫ್'‌ ಎಂದು ಸಹ ಕರೆಯಲಾಗುತ್ತದೆ. ಪೊಲೀಸ್‌ ಎನ್‌ಕೌಂಟರ್‌ನಲ್ಲಿ ಗಾಯಗೊಂಡ ಉಗ್ರರಿಗೆ ಸೈಫುಲ್ಲಾ ವೈದ್ಯಕೀಯ ಚಿಕಿತ್ಸೆ ನೀಡುತ್ತಿದ್ದ ಆಗಾಗಿ ಅವನನ್ನು ಡಾಕ್ಟರ್‌ ಸೈಫ್‌ ಎಂದು ಕರೆಯಲಾಗುತ್ತದೆ. ದಕ್ಷಿಣ ಕಾಶ್ಮೀರದ ಫುಲ್ವಾಮಾ ಜಿಲ್ಲೆಯವನಾದ ಸೈಫುಲ್ಲಾ ದ್ವೀತಿಯ ಪಿಯುಸಿ ಪಾಸಾಗಿದ್ದಾನೆ. ಇವನ ಮಾರ್ಗದರ್ಶಕ ಹಾಗೂ ಹತನಾಗಿರುವ ಉಗ್ರ ರಿಯಾಜ್‌ ನೈಕೂ ಪದವಿ ಪಡೆದಿದ್ದಾನೆ. 

ಕಾಲೇಜು‌ ವಿದ್ಯಾಭ್ಯಾಸದ ಬಳಿಕ ಸರ್ಕಾರದ ವೃತ್ತಿಪರ ಶಿಕ್ಷಣ ಸಂಸ್ಥೆಯಲ್ಲಿ ತರಬೇತಿ ಪಡೆದಿದ್ದಾನೆ. ಹಾಗೇ ಪುಲ್ವಾಮಾದ ಐಟಿಐ ಸಂಸ್ಥೆಯಲ್ಲಿ ಬಯೋ ಮೆಡಿಕಲ್‌ ಶಿಕ್ಷಣವನ್ನು ಪಡೆದಿದ್ದಾನೆ. ಶ್ರೀನಗರದ ಎನ್‌ಐಇಟಿಯಲ್ಲಿ ಟೆಕ್ನಿಶಿಯನ್‌ ಆಗಿ ಉದ್ಯೋಗ ಪಡೆದುಕೊಂಡಿದ್ದ. ಇಲ್ಲಿ ಮೂರು ವರ್ಷ ಕೆಲಸ ಮಾಡಿದ ಸೈಫುಲ್ಲಾ ಹೈದರ್‌, ರಿಯಾಜ್‌ ನೈಕೂ ಪರಿಚಯವಾದ ಬಳಿಕ ಅವನಿಂದ ಪ್ರಭಾವಿತನಾಗಿ ಕೆಲಸ ತೊರೆದು ಉಗ್ರ ಸಂಘಟನೆ ಸೇರಿದನು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಇದನ್ನೂ ಓದಿ: ಗಣಿತದ ಮೇಷ್ಟ್ರು ರಿಯಾಜ್ ನೈಕೂ ಹಿಜ್ಬುಲ್ ಮುಜಾಹಿದೀನ್ ಕಾಶ್ಮೀರ ಕಮಾಂಡರ್ ಆದ ಬಗೆ

ಭದ್ರತಾ ಅಧಿಕಾರಿಗಳು ಸೈಫುಲ್ಲಾ ಹೈದರ್‌ನನ್ನು ’ಎ’ ಕೆಟಗರಿ ಉಗ್ರ ಎಂದು ವರ್ಗಿಕರಿಸಿದ್ದಾರೆ. ದಕ್ಷಿಣ ಕಾಶ್ಮೀರ ಜಿಲ್ಲೆಗಳಾದ ಪುಲ್ವಾಮಾ, ಕುಲ್‌ಗಾಮ್‌,  ಸೋಪಿಯಾನ್‌ನಲ್ಲಿ ಉಗ್ರ ಚಟುವಟಿಕೆಗಳ ಮೂಲಕ ಸಕ್ರಿಯನಾಗಿದ್ದಾನೆ. ಹತ ಉಗ್ರ ರಿಯಾಜ್‌ ನೈಕೂಗೆ ಆಪ್ತನಾಗಿದ್ದು ಅವನ ಕಾರ್ಯ ಚಟುವಟಿಕೆ, ಇತರೆ ಸಂಪರ್ಕದ ಮಾಹಿತಿಗಳನ್ನು ತಿಳಿದಿರುವ ಸೈಫುಲ್ಲಾ ಹಣ್ಣಿನ ಮಾಲೀಕರಿಂದ ಹಣ ಲೂಟಿ ಮಾಡುವುದು ಹಾಗೂ ಆಕ್ರಮವಾಗಿ ಅಫೀಮು ಸರಬರಾಜು ಮಾಡಿ ಹಿಜ್ಬುಲ್‌ಗೆ ಹಣ ಸಂಗ್ರಹ ಮಾಡುತ್ತಿದ್ದಾನೆ.

ಹಿಜ್ಬುಲ್‌ ಮುಜಾಹಿದ್ದೀನ್ ಉಗ್ರ ಸಂಘಟನೆ ಭಯೋತ್ಪಾನೆ ಜೊತೆಗೆ ಮಾದಕ ವಸ್ತುಗಳ ಮಾರಾಟದಲ್ಲೂ ಸಕ್ರಿಯವಾಗಿದೆ ಎಂದು ಕಾಶ್ಮೀರದ ಪೊಲೀಸ್‌ ಅಧಿಕಾರಿಗಳು ತಿಳಿಸಿದ್ದಾರೆ.

ಕಳೆದ ಏಪ್ರಿಲ್‌ 25ರಂದು ಹಿಜ್ಬುಲ್‌ ಮುಜಾಹಿದ್ದೀನ್ ಸಂಘಟನೆಗೆ ಹಣ ಸಂಗ್ರಹ ಮಾಡಿದ್ದ ಹಿಲಾಲ್‌ ಅಹಮ್ಮದ್‌ ವಾಘೆಯನ್ನು ಪಂಜಾಬ್‌ ಪೊಲೀಸರು ಬಂಧಿಸಿ  ₹ 29 ಲಕ್ಷ ನಗದನ್ನು ವಶಪಡಿಸಿಕೊಂಡಿದ್ದರು. ಈ ಹಣವನ್ನು ಹತ ಉಗ್ರ ರಿಯಾಜ್‌ ನೈಕೂಗೆ ತಲುಪಿಸಲು ಸಂಗ್ರಹಿಸಿದ್ದಾಗಿ ಹಿಲಾಲ್‌ ಅಹಮ್ಮದ್‌ ತಿಳಿಸಿದ್ದ ಎಂದು ರಾಷ್ಟ್ತೀಯ ತನಿಖಾ ಸಂಸ್ಥೆಯ ಅಧಿಕಾರಿಗಳು ತಿಳಿಸಿದ್ದಾರೆ ಎಂದು ಹಿಂದೂಸ್ತಾನ್‌ ಟೈಮ್ಸ್‌ ಪತ್ರಿಕೆ ವರದಿ ಮಾಡಿದೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು