ಭಾರತದ ಪ್ರತಿ ಒಂದು ಲಕ್ಷ ಜನರ ಪೈಕಿ 7 ಮಂದಿಗೆ ಕೋವಿಡ್-19: ಆರೋಗ್ಯ ಇಲಾಖೆ ಮಾಹಿತಿ

ಸೋಂಕು ಸಂಬಂಧ ಪ್ರಕಟಣೆ ಹೊರಡಿಸಿರುವ ಸಚಿವಾಲಯ, ‘ಪ್ರತಿ ಒಂದು ಲಕ್ಷ ಜನಸಂಖ್ಯೆಗೆ ಸರಾಸರಿ 7.1ರಷ್ಟುಕೋವಿಡ್‌–19 ಸೋಂಕು ಪ್ರಕರಣಗಳು ದೃಢಪಟ್ಟಿವೆ. ಜಗತ್ತಿನಾದ್ಯಂತ ಒಂದು ಲಕ್ಷ ಜನಸಂಖ್ಯೆಗೆ ಸುಮಾರು 60 ಸೋಂಕು ಪ್ರಕರಣಗಳು ಖಚಿತವಾಗಿವೆ. ಆರಂಭದಲ್ಲೇಆಕ್ರಮಣಕಾರಿಯಾಗಿ ಕ್ರಮಗಳನ್ನು ಕೈಗೊಂಡಿದ್ದರ ಫಲಿತಾಂಶ ಈಗ ಪ್ರದರ್ಶನವಾಗುತ್ತಿವೆ’ ಎಂದು ತಿಳಿಸಿದೆ.

ವಿಶ್ವದಾದ್ಯಂತ ಇಲ್ಲಿವರೆಗೆ ಸುಮಾರು 45.25 ಲಕ್ಷ ಕೋವಿಡ್ -19 ಪ್ರಕರಣಗಳು ದೃಢಪಟ್ಟಿವೆ. ಹೀಗಾಗಿ ಪ್ರತಿ ಒಂದು ಲಕ್ಷ ಜನಸಂಖ್ಯೆಗೆ ಸುಮಾರು 60 ಪ್ರಕರಣಗಳು ಇವೆ. ದೇಶದಲ್ಲಿ ಮೇ18ರ ವೇಳೆಗೆ ಸೋಂಕಿತರ ಸಂಖ್ಯೆ 96 ಸಾವಿರ ದಾಟಿದ್ದು, 3,029 ಜನರು ಮೃತಪಟ್ಟಿದ್ದಾರೆ.

‘ದೇಶದಲ್ಲಿ ಸದ್ಯ (ಮೇ18ರ ವರೆಗೆ) 56,316 ಸಕ್ರಿಯ ಪ್ರಕರಣಗಳಿವೆ. 36,824 ಸೋಂಕಿತರು ಗುಣಮುಖರಾಗಿದ್ದಾರೆ. ಕಳೆದ 24 ಗಂಟೆಯಲ್ಲಿ 2,715 ಸೋಂಕಿತರು ಗುಣಮುಖರಾಗಿದ್ದಾರೆ ಎಂದು ವರದಿಯಾಗಿವೆ. ಸದ್ಯ ನಾವು ಶೇ.38.29 ರಷ್ಟು ಪ್ರಮಾಣದಲ್ಲಿ ಚೇತರಿಕೆ ಕಾಣುತ್ತಿದ್ದೇವೆ’ ಎಂದೂ ಸಚಿವಾಲಯ ತನ್ನ ಹೇಳಿಕೆಯಲ್ಲಿ ಉಲ್ಲೇಖಿಸಿದೆ.

ಒಂದು ಲಕ್ಷ ಸೋಂಕಿತರಿಂದ 7 ದಿನಗಳ ಅವಧಿಯಲ್ಲಿ ಹೆಚ್ಚಾಗುತ್ತಿರುವ ಪ್ರಕರಣಗಳ ಪ್ರಮಾಣ, ಸಾವಿನ ಸಂಖ್ಯೆ, ಪರೀಕ್ಷೆ ಮತ್ತು ದೃಢಪಟ್ಟ ಪ್ರಕರಣಗಳ ಪ್ರಮಾಣದ ಆಧಾರದ ಮೇಲೆ ಈ ಅಂದಾಜು ಮಾಡಲಾಗಿದೆ.

ಕೇಂದ್ರ ಸರ್ಕಾರವು ಕೆಂಪು, ಕಿತ್ತಳೆ ಮತ್ತು ಹಸಿರು ವಲಯಗಳ ವರ್ಗೀಕರಣಕ್ಕಾಗಿ ರಾಜ್ಯಗಳಿಗೆ ಹೊಸ ಮಾರ್ಗಸೂಚಿಯನ್ನು ಭಾನುವಾರ ಬಿಡುಗಡೆ ಮಾಡಿದೆ. ಈ ಮಾರ್ಗಸೂಚಿ ಪ್ರಕಾರ ಜಿಲ್ಲೆಗಳು ಮತ್ತು ಪುರಸಭೆಗಳನ್ನು ವರ್ಗೀಕರಿಸುವಂತೆ ಸೂಚಿಸಲಾಗಿದೆ. ಆಡಳಿತವು ಕ್ಷೇತ್ರ ತಪಾಸಣೆ ನಡೆಸಿರುವುದಕ್ಕೆ ಅನುಗುಣವಾಗಿಯೂ ಯಾವುದೇ ವಾರ್ಡ್‌, ಅಥವಾ ಪ್ರದೇಶವನ್ನು ಕೆಂಪು, ಕಿತ್ತಳೆ ಅಥವಾ ಹಸಿರು ವಲಯವೆಂದು ಖಾತರಿಪಡಿಸಬಹುದಾಗಿದೆ.