ಶನಿವಾರ, ಜೂನ್ 6, 2020
27 °C
ಎಪಿಎಂಸಿ ಕಾಯ್ದೆಗೆ ತಿದ್ದುಪಡಿ | ಅನುಭವ ಮಂಟಪ

ಕಂಪನಿಗಳ ಕೈಗೆ ಸಿಕ್ಕ ಕೃಷಿಕನ ಜುಟ್ಟು: ರೈತ ಮುಖಂಡ ಕಡಿದಾಳು ಶಾಮಣ್ಣ

ಚಂದ್ರಹಾಸ ಹಿರೇಮಳಲಿ Updated:

ಅಕ್ಷರ ಗಾತ್ರ : | |

ಎಪಿಎಂಸಿ ಕಾಯ್ದೆಗೆ ಸರ್ಕಾರ ತರಾತುರಿಯಲ್ಲಿ ತಿದ್ದುಪಡಿ ತಂದು ಕೃಷಿ ಉತ್ಪನ್ನಗಳ ಮಾರಾಟಕ್ಕೆ ಮುಕ್ತ ವ್ಯವಸ್ಥೆ ಕಲ್ಪಿಸುವ ಬದಲು ಎಪಿಎಂಸಿಯ ನ್ಯೂನತೆಗಳನ್ನು ಸರಿಪಡಿಸುವ ಮೂಲಕ ಅದನ್ನು ರೈತಸ್ನೇಹಿ ಮಾರುಕಟ್ಟೆಯಾಗಿ ರೂಪಿಸಬಹುದಿತ್ತು. ಆದರೆ, ಮುಕ್ತ ಮಾರುಕಟ್ಟೆ ಮೂಲಕ ಕೃಷಿ ಉತ್ಪನ್ನಗಳಿಗೆ ಅಧಿಕ ಬೆಲೆ ದೊರಕಿಸುವ ನೆಪದಲ್ಲಿ ಬಹುರಾಷ್ಟ್ರೀಯ ಕಂಪನಿಗಳ ಕೈಗೆ ಪರೋಕ್ಷವಾಗಿ ರೈತರ ಜುಟ್ಟನ್ನು ನೀಡಲಾಗಿದೆ ಎನ್ನುವುದು ರಾಜ್ಯದ ಹಿರಿಯ ರೈತ ಮುಖಂಡ ಕಡಿದಾಳು ಶಾಮಣ್ಣ ಅವರ ಅಭಿಮತ.

ಕಾಯ್ದೆಯ ತಿದ್ದುಪಡಿ ಕುರಿತು ಅವರು ‘ಪ್ರಜಾವಾಣಿ’ ಜತೆ ನಡೆಸಿದ ಮಾತುಕತೆಯ ಸಾರ ಇಲ್ಲಿದೆ

*ಎಪಿಎಂಸಿ ಕಾಯ್ದೆ ತಿದ್ದುಪಡಿ ರೈತಸ್ನೇಹಿ ಆಗಿಲ್ಲವೇ?

ಶಾಮಣ್ಣ: ಮುಕ್ತ ಮಾರುಕಟ್ಟೆ ವ್ಯವಸ್ಥೆ ಮೇಲುನೋಟಕ್ಕೆ ರೈತಸ್ನೇಹಿಯಾಗಿ ಕಂಡರೂ ದೀರ್ಘಕಾಲದಲ್ಲಿ ಶ್ರೀಮಂತ, ಬಹುರಾಷ್ಟ್ರೀಯ ಕಂಪನಿಗಳ ಹಿಡಿತಕ್ಕೆ ರೈತರು ಸಿಲುಕುವ ಅಪಾಯವಿದೆ. ಮುಕ್ತ ವ್ಯವಸ್ಥೆಯಲ್ಲಿ ಪ್ರವೇಶ ಪಡೆಯುವ ಸಣ್ಣಪುಟ್ಟ ವ್ಯಾಪಾರಿಗಳು ದಿನ ಕಳೆದಂತೆ ಖರೀದಿಗಾಗಿ ನಡೆಸುವ ಪೈಪೋಟಿಯ ಸಾಮರ್ಥ್ಯ ಕಳೆದು
ಕೊಳ್ಳುತ್ತಾರೆ. ಆರಂಭದಲ್ಲಿ ಹೆಚ್ಚಿನ ಬೆಲೆ ದೊರೆಯುವ ಸಾಧ್ಯತೆ ಇದ್ದರೂ ಬರುಬರುತ್ತಾ ಕಂಪನಿಗಳು ಉತ್ಪನ್ನಗಳ ಸಂಗ್ರಹ ಸಾಮರ್ಥ್ಯ ಹೆಚ್ಚಿಸಿಕೊಂಡು ಕೇಳಿದ ಬೆಲೆಗೆ ರೈತರು ಉತ್ಪನ್ನ ಮಾರಾಟ ಮಾಡುವ ಸನ್ನಿವೇಶ ಸೃಷ್ಟಿಸುವ ಸಾಧ್ಯತೆ ದಟ್ಟವಾಗಿದೆ. ಹಾಗಾಗಿ, ಈ ಕ್ರಮ ರೈತಸ್ನೇಹಿ ಎಂದು ಹೇಳಲು ಸಾಧ್ಯವಿಲ್ಲ.

*ಹಿಂದಿನ ವ್ಯವಸ್ಥೆಯೇ ಉತ್ತಮ ಎನ್ನುವುದು ನಿಮ್ಮ ಅಭಿಪ್ರಾಯವೇ?

ಶಾಮಣ್ಣ: ಇದುವರೆಗಿನ ವ್ಯವಸ್ಥೆಯಲ್ಲೂ ಸಾಕಷ್ಟು ಲೋ‌ಪದೋಷಗಳು ಇದ್ದವು. ಆದರೆ, ಎಪಿಎಂಸಿ ವರ್ತಕರು ಟೆಂಡರ್ ದರ ನಮೂದಿಸಿದರೂ ಉತ್ಪನ್ನ ಮಾರಾಟ ಮಾಡುವ ಅಥವಾ ತಿರಸ್ಕರಿಸುವ ಹಕ್ಕು ರೈತರಿಗೇ ಇತ್ತು. ಉದಾಹರಣೆಗೆ: ನಾವು ಅಡಿಕೆ ಮಂಡಿಗೆ ನೂರುಮೂಟೆ ಬಿಟ್ಟಿದ್ದೇವೆ. ಟೆಂಡರ್ ನಲ್ಲಿ ನಮೂದಿಸಿದ ಬೆಲೆ ಒಪ್ಪಿತವಾಗದೆ ಎಷ್ಟೋ ಬಾರಿ ಮಾರಾಟ ಮಾಡುವುದು ಬೇಡ ಎಂದು ನಿರ್ಧರಿಸಿದ್ದೇವೆ. ಉತ್ತಮ ಧಾರಣೆ ಬಂದಾಗ ಮಾರಾಟ ಮಾಡಿದ್ದೇವೆ. ತೀರಾ ಅನಿವಾರ್ಯ ಇದ್ದಾಗ, ಅಗತ್ಯ ಇರುವಷ್ಟು ಮಾರಾಟ ಮಾಡಿ, ಉಳಿದ ಆವಕ ಅಲ್ಲೇ ಬಿಟ್ಟಿದ್ದೇವೆ. ಹೀಗೆ ಹಾಲಿ ಇರುವ ಉತ್ತಮ ವ್ಯವಸ್ಥೆಯನ್ನು ಉಳಿಸಿಕೊಂಡು, ಅದನ್ನು ಮತ್ತಷ್ಟು ಬಲಪಡಿಸಿದ್ದರೆ ಅನುಕೂಲವಾಗುತ್ತಿತ್ತು.

*ಎಪಿಎಂಸಿಯ ನ್ಯೂನತೆಗಳನ್ನು ಸರಿಪಡಿಸುವುದು ಹೇಗೆ?

ಶಾಮಣ್ಣ: ಸರ್ಕಾರವು ಬೆಳೆಗಳಿಗೆ ವೈಜ್ಞಾನಿಕ ಬೆಲೆ ನಿಗದಿ ಮಾಡಿ, ಬೆಲೆಪಟ್ಟಿಯ ಪ್ರಕಾರವೇ ಉತ್ಪನ್ನಗಳನ್ನು ಖರೀದಿಸುವಂತೆ ವರ್ತಕರಿಗೆ ಸೂಚಿಸಬೇಕು. ಜಿಎಸ್‌ಟಿ, ಮಾರುಕಟ್ಟೆ ಸೆಸ್‌ ಕಡಿಮೆ ಮಾಡುವ ಮೂಲಕ ತೆರಿಗೆ ವಂಚನೆಯನ್ನು ತಡೆಯಬೇಕು. ಮಾರುಕಟ್ಟೆ ಹೊರಗೆ ನಡೆಯುವ ಕೈ ವ್ಯಾಪಾರ ಪದ್ಧತಿಯನ್ನು ನಿಯಂತ್ರಿಸಬೇಕು.  ರೈತರಿಗೆ ಮೋಸ, ವಂಚನೆ ಮಾಡುವ ವರ್ತಕರ ವಿರುದ್ಧ ಕಠಿಣ ಕ್ರಮ ಜರುಗಿಸಬೇಕು. ವರ್ತಕರು ಮುಂಗಡ ಸಾಲ ನೀಡಿ, ಅಧಿಕ ಬಡ್ಡಿ ವಸೂಲಿ ಮಾಡುವ ವ್ಯವಸ್ಥೆಗೆ ಕಡಿವಾಣ ಹಾಕಬೇಕು. ರೈತರಿಗಾಗುವ ತೊಂದರೆಗಳನ್ನು ತ್ವರಿತವಾಗಿ ನಿವಾರಿಸಬೇಕು. ಬೆಳೆದ ಬೆಳೆಯನ್ನು ಸಂಗ್ರಹಿಸಿಡುವ ಸಾಮರ್ಥ್ಯ ವೃದ್ಧಿಸಲು ಸರ್ಕಾರದಿಂದಲೇ ಮುಂಗಡ ಪಾವತಿ ನೆರವು ಕಲ್ಪಿಸಬೇಕು.

*ಕಾಯ್ದೆಯ ಹೊಸ ಸ್ವರೂಪದಲ್ಲೂ ರೈತರು ವಂಚನೆಗೆ ಒಳಗಾಗುತ್ತಾರೆಯೇ?

ಶಾಮಣ್ಣ: ಹೌದು, ಎಷ್ಟೋ ರೈತರು ಈಗಲೂ ಮಾರುಕಟ್ಟೆಯ ಹೊರಗೆ ಬೆಳೆಗಳ ಮಾರಾಟ ಮಾಡುತ್ತಲೇ ಇದ್ದಾರೆ. ತೆರಿಗೆ ಉಳಿಸಲು ಕಂಪನಿಗಳೇ ನೇರವಾಗಿ ರೈತರ ಮನೆ ಬಾಗಿಲಿಗೆ ಹೋಗಿ ಕೈ ವ್ಯಾಪಾರ ನಡೆಸುತ್ತಾ ಬಂದಿವೆ. ಸ್ವಲ್ಪ ಹೆಚ್ಚಿನ ಲಾಭದ ಆಸೆಗೆ ಬೆಳೆ ಮಾರಾಟ ಮಾಡಿದ ಹಲವು ರೈತರಿಗೆ ವಂಚನೆಯೂ ಆಗಿದೆ. ವರ್ಷವಿಡೀ ದುಡಿದ ದುಡಿಮೆ ಕಳೆದುಕೊಂಡು ಹಣ ವಸೂಲಿಗೆ ಪೊಲೀಸ್‌ ಠಾಣೆಗೆ ಅಲೆದಿದ್ದಾರೆ.

ಮುಕ್ತ ಮಾರುಕಟ್ಟೆಯಲ್ಲಿ ಇಂತಹ ವಂಚನೆ ಪ್ರಕರಣಗಳು ಮತ್ತಷ್ಟು ಹೆಚ್ಚಾಗುತ್ತವೆ. ಬ್ಯಾಂಕ್‌ ಸಾಲವನ್ನೇ ಮುಳುಗಿಸುವ ದೊಡ್ಡ ದೊಡ್ಡ ಕಂಪನಿಗಳು, ರೈತರ ಬಾಕಿ ನೀಡದೇ ವಂಚಿಸುವ ಸಾಧ್ಯತೆಯನ್ನು ಅಲ್ಲಗಳೆಯುವಂತಿಲ್ಲ. ಸರ್ಕಾರವೇ ಬೆಲೆ ನಿಗದಿ ಮಾಡಿದ್ದರೂ ಖಾಸಗಿ ಸಕ್ಕರೆ ಕಾರ್ಖಾನೆಗಳಿಗೆ ನೇರವಾಗಿ ಕಬ್ಬು ಪೂರೈಸಿದ ಎಷ್ಟೋ ಬೆಳೆಗಾರರಿಗೆ ಪೂರ್ಣ ಹಣ ಬಂದಿದೆಯೇ? ಇಂತಹ ಪ್ರಕರಣಗಳು ಮತ್ತೆ ಮತ್ತೆ ನಡೆಯುತ್ತಲೇ ಇರುತ್ತವೆ. ಲಾಭಕ್ಕಿಂತ ಮೋಸವೇ ಹೆಚ್ಚಾದರೆ ಯಾರನ್ನು ಹೊಣೆ ಮಾಡುವುದು? ಸದ್ಯದ ಮಾರುಕಟ್ಟೆ ವ್ಯವಸ್ಥೆಯಲ್ಲಿ ಬೆಳೆ ಮಾರಾಟ ಮಾಡಿದ್ದ ಹಣಕ್ಕೆ ಮೋಸವಿರಲಿಲ್ಲ.

*ವೈಜ್ಞಾನಿಕ ಬೆಲೆ ನಿಗದಿಯೇ ಮಾರುಕಟ್ಟೆ ಸಮಸ್ಯೆಗೆ ಪರಿಹಾರವೇ?

ಶಾಮಣ್ಣ: ಖಂಡಿತ. ಅದೊಂದೇ ಶಾಶ್ವತ ಪರಿಹಾರದ ದಾರಿ. ಪ್ರತಿ ಬಾರಿ ಚುನಾವಣೆ ಸಮಯದಲ್ಲಿ ಇಂತಹ ಚರ್ಚೆಗಳು ಜೀವ ಪಡೆಯುತ್ತವೆ. ನಂತರ ಮರೆಯಾಗುತ್ತವೆ. ರೈತರು ಬೆಳೆದ ಬೆಳೆಗೆ ತಗುಲಿದ ವೆಚ್ಚ ಹಾಗೂ ಅದಕ್ಕೆ ಲಾಭವನ್ನು ಸೇರಿಸಿ ಬೆಲೆ ನಿಗದಿಯಾದರೆ ಈ ಮಾರುಕಟ್ಟೆ ಚರ್ಚೆಗಳೇ ಅಪ್ರಸ್ತುತವಾಗುತ್ತವೆ. ರೈತರಿಗೆ ಸಾಲದ ಪ್ಯಾಕೇಜ್, ಸಾಲ ಮನ್ನಾ ಯೋಜನೆಗಳ ಅಗತ್ಯವೂ ಇರುವುದಿಲ್ಲ. ಆದರೆ, ಬೆಕ್ಕಿಗೆ ಗಂಟೆ ಕಟ್ಟುವವರು ಯಾರು?

ಯಾವ ಸರ್ಕಾರವೂ ಈ ವಿಷಯದಲ್ಲಿ ಗಂಭೀರ ಪ್ರಯತ್ನ ನಡೆಸಲಿಲ್ಲ. ಕೃಷಿ ವಿಶ್ವವಿದ್ಯಾಲಯಗಳು, ಕೃಷಿ ಬೆಲೆ ಆಯೋಗಗಳೂ ಸಹಾಯಕ್ಕೆ ಬರಲಿಲ್ಲ. ಹಾಗೆಯೇ ರೈತರಲ್ಲೂ ಮಾಹಿತಿ ಕೊರತೆ ಇದ್ದು, ಬೆಳೆ ವೈವಿಧ್ಯ, ಮಾರುಕಟ್ಟೆ ವ್ಯವಸ್ಥೆ, ವಹಿವಾಟಿನ ಕುರಿತು ಹೆಚ್ಚಿನ ಜಾಗೃತಿ ಮೂಡಿಸಬೇಕಿದೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು