ಪ್ರಶ್ನೆಗಳನ್ನು ಅರ್ಥ ಮಾಡಿಕೊಂಡು ಬರೆಯಿರಿ: ಮಹೇಶ ಎಸ್. ಅಂಗಡಿ

* ವಿಜ್ಞಾನ ವಿಷಯಕ್ಕೆ ಸಂಬಂಧಿಸಿದಂತೆ ಪರೀಕ್ಷಾ ಮಂಡಳಿಯಿಂದ 30 ಚಿತ್ರಗಳ ಪಟ್ಟಿಯನ್ನು ಕೊಡಲಾಗಿದೆ. ಅವುಗಳನ್ನು ಚೆನ್ನಾಗಿ ಅಭ್ಯಾಸ ಮಾಡಿದರೆ 12 ಅಂಕಗಳನ್ನು ಪಡೆಯಬಹುದು. ಚಿತ್ರಗಳನ್ನು ಅಂದವಾಗಿ ಬಿಡಿಸಬೇಕು. ಭಾಗಗಳನ್ನು ಸರಿಯಾಗಿ ನೋಡಿಕೊಂಡಿರಬೇಕು. ಅವರು ಕೇಳಿದ ಭಾಗಗಳನ್ನೇ ನಿಖರವಾಗಿ ಗುರುತಿಸಬೇಕು.

* ಮಂಡಳಿಯಿಂದ ಎರಡು ಮಾದರಿ ಪ್ರಶ್ನೆಪತ್ರಿಕೆಗಳನ್ನು ಅಂತರ್ಜಾಲ ತಾಣದಲ್ಲೂ ಲಭ್ಯವಿದೆ. ಸರಣಿ ಪರೀಕ್ಷೆ ನಡೆಸಿದ ಪ್ರಶ್ನೆಪತ್ರಿಕೆ ನೋಡಿಕೊಳ್ಳಬೇಕು. ಎರಡು ವರ್ಷಗಳ ಪ್ರಶ್ನೆಪತ್ರಿಕೆಗಳನ್ನು ನೋಡಿಕೊಳ್ಳಬೇಕು. 5ರಿಂದ 6 ಪ್ರಶ್ನೆಪತ್ರಿಕೆಗಳು ಲಭ್ಯ ಇವೆ. ಅವುಗಳನ್ನು ವಿಶ್ಲೇಷಣೆ ಮಾಡುವುದರಿಂದ ಪ್ರಶ್ನೆಗಳ ಸ್ವರೂಪ ಅರ್ಥ ಮಾಡಿಕೊಳ್ಳಬಹುದು.

* ಅನ್ವಯಿಕ ಮಾದರಿಯ ಪ್ರಶ್ನೆಗಳು ಮಹತ್ವದ್ದಾಗಿದೆ. ವಿಷಯಯವನ್ನು ಕಂಠಪಾಠ ಮಾಡುವುದಕ್ಕಿಂತ ಸಂಪೂರ್ಣ ಅರ್ಥ ತಿಳಿದುಕೊಂಡು ಓದುವುದರಿಂದ ಇವುಗಳನ್ನು ಬಿಡಿಸಬಹುದಾಗಿದೆ. ಪರಿಕಲ್ಪನೆಯ ಸ್ಪಷ್ಟ ಮಾಹಿತಿ ಇರಬೇಕು. ಆಗ ಸುಲಭವಾಗುತ್ತದೆ. ಒಂದೇ ಬಾರಿಗೆ ಪ್ರಶ್ನೆ ಅರ್ಥವಾಗುವುದಿಲ್ಲ. 2 ಅಥವಾ 3 ಬಾರಿ ಓದಿಕೊಳ್ಳಬೇಕು. ಯಾವ ಪಾಠದ್ದು ಮತ್ತು ಪರಿಕಲ್ಪನೆಯ ಮೇಲೆ ಪ್ರಶ್ನೆ ಇದೆ ಎನ್ನುವ ಒಳತಿರುಳನ್ನು ಅರ್ಥ ಮಾಡಿಕೊಳ್ಳಬೇಕು. ಆಗ, ಸಮರ್ಪಕ ಉತ್ತರ ಬರೆಯುಬಹುದಾಗಿದೆ.

* ಪಠ್ಯಪುಸ್ತಕದಲ್ಲಿ ನೀಲಿ ಬಣ್ಣದ ಬಾಕ್ಸ್‌ನಲ್ಲಿರುವ ಪ್ರಯೋಗ ಚಟುವಟಿಕೆಗಳಿಗೆ ಸಂಬಂಧಿಸಿದಂತೆ ಪ್ರಶ್ನೆಗಳು ಇರುತ್ತವೆ. ಈ ಬಗ್ಗೆ ಹೆಚ್ಚು ಗಮನಹರಿಸಬೇಕು.

* ಕೆಲವು ಪ್ರಶ್ನೆಗಳಿಗೆ ಆಂತರಿಕ ಆಯ್ಕೆಗಳಿರುತ್ತವೆ. ಹೆಚ್ಚು ಅಂಶಗಳು ಗೊತ್ತಿರಬಹುದಾದ ಪ್ರಶ್ನೆಗೆ ಉತ್ತರ ಬರೆಯುವುದರಿಂದ ಅಂಕ ಗಳಿಸಬಹುದು.

* ಈ ಬಾರಿ 15 ನಿಮಿಷ ಹೆಚ್ಚುವರಿ ಅವಧಿ ಕೊಡಲಾಗಿದೆ. ಪ್ರಶ್ನೆಪತ್ರಿಕೆ ಕೈಗೆ ಬಂದ ಕೂಡಲೇ. ಏಕಾಗ್ರತೆಯಿಂದ ಇಡೀ ಪ್ರಶ್ನೆಪತ್ರಿಕೆ ಓದಬೇಕು. ಸುಲಭವಾಗಿ ಬಿಡಿಸಬಹುದಾದ ಪ್ರಶ್ನೆಗಳನ್ನು ಪೆನ್ಸಿಲ್‌ನಲ್ಲಿ ಮಾರ್ಕ್ ಮಾಡಿಕೊಂಡು, ಮೊದಲು ಅವುಗಳನ್ನು ಬಿಡಿಸಬೇಕು. ನಂತರ ಉಳಿದ ಪ್ರಶ್ನೆಗಳಿಗೆ ಆದ್ಯತೆ ಕೊಡಬೇಕು.

* ಅನವಶ್ಯವಾಗಿ ಉದ್ದುದ್ದ ಬರೆಯುವ ಬದಲಿಗೆ, ಮಹತ್ವದ್ದಷ್ಟನ್ನೇ ಬರೆಯಿರಿ. ಪ್ರಮುಖಾಂಶಗಳಿಗೆ ಅಂಡರ್‌ಲೈನ್ ಮಾಡಬೇಕು. ಅದು ಮೌಲ್ಯಮಾಪಕರ ಗಮನಸೆಳೆಯುತ್ತದೆ.

– ಮಹೇಶ ಎಸ್. ಅಂಗಡಿ, ವಿಜ್ಞಾನ ವಿಷಯ ಸಂಪನ್ಮೂಲ ವ್ಯಕ್ತಿ, ಸರ್ಕಾರಿ ಪ್ರೌಢಶಾಲೆ, ಹಾರೊಗೊಪ್ಪ, ಸವದತ್ತಿ ತಾಲ್ಲೂಕು, ಬೆಳಗಾವಿ