ಗುರುವಾರ , ಏಪ್ರಿಲ್ 2, 2020
19 °C
ಪುನರ್ ಬಳಕೆ ಮಾಡಬಹುದಾದ ಕಾಟನ್ ಬಟ್ಟೆಯಲ್ಲಿ ತಯಾರಿಕೆ

ಶಿರಸಿ: ಮಹಿಳೆಯರ ‘ಚೇತನ’ದಿಂದ ಮಾಸ್ಕ್ ಸಿದ್ಧ

ಸಂಧ್ಯಾ ಹೆಗಡೆ Updated:

ಅಕ್ಷರ ಗಾತ್ರ : | |

Prajavani

ಶಿರಸಿ: ಕೋವಿಡ್–19 ಭೀತಿಯಿಂದ ಎಲ್ಲೆಡೆ ಮಾಸ್ಕ್‌ಗಳ (ಮುಖಗವಸು) ಬೇಡಿಕೆ ಹೆಚ್ಚಿದೆ. ಅಂಗಡಿ ಅಲೆದಾಡಿದರೂ ಮಾಸ್ಕ್‌ಗಳು ಸಿಗುತ್ತಿಲ್ಲ. ಇಂತಹ ಕಠಿಣ ಸಂದರ್ಭದಲ್ಲಿ ಸಾಮಾಜಿಕ ಸಮಸ್ಯೆಗೆ ಸ್ಪಂದಿಸುವ ಉದ್ದೇಶದಿಂದ ಮಹಿಳೆಯರು ಮಾಸ್ಕ್ ಸಿದ್ಧತೆಯಲ್ಲಿ ತೊಡಗಿದ್ದಾರೆ.

ಇಲ್ಲಿನ ಪ್ರಶಾಂತಿ ಫೌಂಡೇಷನ್‌ನ ಚೇತನಾ ಸಂಸ್ಥೆಯ ವಿದ್ಯಾ ನಾಯ್ಕ, ಲಲಿತಾ ಇಳಿಗಾರ, ಯಶೋದಾ ನಾಯ್ಕ, ಗಾಯತ್ರಿ ರಾಯಕರ ಅವರು ಎರಡು ದಿನಗಳಿಂದ ಹಗಲಿರುಳೆನ್ನದೇ, ಹೊಲಿಗೆ ಯಂತ್ರದ ಎದುರು ಕುಳಿತು ಮುಖಗವಸುಗಳನ್ನು ತಯಾರು ಮಾಡುತ್ತಿದ್ದಾರೆ. ಈಗಾಗಲೇ 200ಕ್ಕೂ ಹೆಚ್ಚು ಮುಖಗವಸುಗಳನ್ನು ತಯಾರಿಸಿ, ಪೊಲೀಸ್, ಕಂದಾಯ ಮೊದಲಾದ ಇಲಾಖೆಗಳಿಗೆ ಪೂರೈಕೆ ಮಾಡಿದ್ದಾರೆ.

‘ನಗರದ ಎಲ್ಲೆಡೆ, ಆಸ್ಪತ್ರೆಗಳಲ್ಲಿ ಮುಖಗವಸು ಬೇಡಿಕೆ ಇರುವುದು ಗಮನಕ್ಕೆ ಬಂತು. ಇದೇ ವೇಳೆ ಎರಡು ದಿನಗಳ ಹಿಂದೆ ಅಧಿಕಾರಿಗಳ ಸಭೆಯಲ್ಲಿ ಜನರು, ಆರೋಗ್ಯ ಕ್ಷೇತ್ರದಲ್ಲಿ ಕೆಲಸ ಮಾಡುವವರ ಸುರಕ್ಷತೆಯ ಬಗ್ಗೆ ಚರ್ಚೆಯೂ ನಡೆಯಿತು. ಅಲ್ಲಿ ಮಾಸ್ಕ್‌ಗಳ ಕೊರತೆಯಿರುವ ಬಗ್ಗೆ ಮತ್ತು ಕೆಲವು ಕಡೆಗಳಿಂದ ಕಳಪೆ ಗುಣಮಟ್ಟದ ಮುಖಗವಸುಗಳು ಬರುತ್ತಿರುವ ವಿಷಯ ಪ್ರಸ್ತಾಪವಾಯಿತು. ಆಗ ನಮಗೆ ಜನರಿಗೆ ನೆರವಾಗುವ ಯೋಚನೆ ಬಂತು’ ಎನ್ನುತ್ತಾರೆ ಮಾಸ್ಕ್ ತಯಾರಿಸುವ ಮಹಿಳೆಯರು.

‘ನಾವು ತಯಾರಿಸಿರುವ ಮುಖಗವಸುಗಳು ಬಳಸಿ ಎಸೆಯುವಂತಹವುಗಳಲ್ಲ. ಇವನ್ನು ಪುನರ್ ಬಳಕೆ ಮಾಡಬಹುದು. ಒಂದಿಡೀ ದಿನ ಮುಖಕ್ಕೆ ಹಾಕಿಕೊಂಡರೆ, ಮರುದಿನ ತೊಳೆದು, ಬಿಸಿಲಿನಲ್ಲಿ ಒಣಗಿಸಿ, ಮತ್ತ ಬಳಸಬಹುದು. ಮೆತ್ತಗಿನ ಕಾಟನ್ ಬಟ್ಟೆಯಲ್ಲಿ ತಯಾರಿಸಿರುವ ಮುಖಗವಸೊಂದಕ್ಕೆ ₹ 20 ದರ ನಿಗದಿಪಡಿಸಲಾಗಿದೆ. ಆಸಕ್ತರು ಇದ್ದರೆ ಅವರಿಗೂ ಇದನ್ನು ಕಲಿಸಿಕೊಡಲು ಸಿದ್ಧರಿದ್ದೇವೆ’ ಎಂದು ಅವರು ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದರು.

‘ಮುಖಗವಸುಗಳನ್ನು ತಯಾರಿಸುವಾಗ ನಾವು ಸ್ವಚ್ಛತೆಗೆ ಹೆಚ್ಚು ಗಮನಕೊಡುತ್ತೇವೆ. ಹೊಲಿಗೆ ಮಾಡುವಾಗಲೂ ಸಹ, ನಿರ್ದಿಷ್ಟ ಅಂತರ ಕಾಪಾಡಿಕೊಂಡು ಕುಳಿತುಕೊಳ್ಳುತ್ತೇವೆ. ಹಗಲಿನಲ್ಲಿ ‘ಚೇತನಾ’ದಲ್ಲಿ ಕುಳಿತು, ರಾತ್ರಿ ಮನೆಯಲ್ಲಿ ಹೀಗೆ ನಿರಂತರವಾಗಿ ಕೆಲಸ ಮಾಡುತ್ತಿದ್ದೇವೆ’ ಎಂದು ಹೇಳಿದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು