ಸಾಲ ಮರುಪಾವತಿ ಅವಕಾಶದ ಬಗ್ಗೆ ಆರ್‌ಬಿಐ ನಿಗಾ ವಹಿಸಲಿ: ಹೈಕೋರ್ಟ್

ಈ ಕುರಿತಂತೆ ನಗರದ 'ವೇಲಂಕಣಿ ಇನ್‌ಫಾರ್ಮೇಶನ್‌ ಸಿಸ್ಟಮ್ ಲಿಮಿಟೆಡ್ (ವಿಐಎಸ್ಎಲ್)' ಕಂಪನಿ ಸಲ್ಲಿಸಿದ್ದ ಅರ್ಜಿಯನ್ನು ನ್ಯಾಯಮೂರ್ತಿ ಸೂರಜ್ ಗೋವಿಂದರಾಜ್ ಅವರಿದ್ದ ಏಕಸದಸ್ಯ ನ್ಯಾಯಪೀಠ ಮಾನ್ಯ ಮಾಡಿದೆ.

’ಮೊರಾಟೋರಿಯಂ ಎಲ್ಲ ಹಣಕಾಸು ಸಂಸ್ಥೆಗಳು ವಿತರಿಸಿರುವ ಸಾಲ ಅಥವಾ ಮುಂಗಡಗಳಿಗೆ ಅನ್ವಯವಾಗುತ್ತದೆ. ಈ ನಿಟ್ಟಿನಲ್ಲಿ ಮಾರ್ಚ್ 27ರಂದು ಹೊರಡಿಸಿರುವ ಸುತ್ತೋಲೆ ಜಾರಿಯ ಬಗ್ಗೆ ಆರ್‌ಬಿಐ ಖುದ್ದು ನಿಗಾ ವಹಿಸಬೇಕು' ಎಂದು ಆದೇಶದಲ್ಲಿ ತಿಳಿಸಲಾಗಿದೆ.

'ಸಾಲ ನೀಡಿಕೆಯಲ್ಲಿ ಹಲವು ಬ್ಯಾಂಕುಗಳು ಒಳಗೊಂಡಿದ್ದ ಪಕ್ಷದಲ್ಲಿ, ಒಂದು ಬ್ಯಾಂಕ್ ಮೊರಾಟೋರಿಯಂ ಸೌಕರ್ಯ ವಿಸ್ತರಣೆಗೆ ಒಪ್ಪಿದ್ದರೆ ಇನ್ನೊಂದು ಬ್ಯಾಂಕ್ ಆ ಅವಕಾಶ ನಿರಾಕರಿಸುವಂತಿಲ್ಲ' ಎಂದು ನ್ಯಾಯಪೀಠ ವಿವರಿಸಿದೆ.

ಪ್ರಕರಣವೇನು?: ಎಚ್‌ಡಿಎಫ್‌ಸಿ ಬ್ಯಾಂಕ್, ಫೆಡರಲ್ ಬ್ಯಾಂಕ್ ಮತ್ತು ಆದಿತ್ಯ ಬಿರ್ಲಾ ಹೌಸಿಂಗ್ ಫೈನಾನ್ಸ್ ಲಿಮಿಟೆಡ್ ಕಂಪನಿಗಳು ವಿಐಎಸ್ಎಲ್ ಸಂಸ್ಥೆಗೆ ಒಟ್ಟು ₹ 475 ಕೋಟಿ ಸಾಲ ನೀಡಿದ್ದವು. ಆರ್‌ಬಿಐ ನಿರ್ದೇಶನದಂತೆ ಎಚ್‌ಡಿಎಫ್‌ಸಿ ಬ್ಯಾಂಕ್ ಸಾಲ ಪಾವತಿ ಅವಧಿ ಮುಂದೂಡಿಕೆಗೆ ಸಲ್ಲಿಸಿದ್ದ ಮನವಿಯನ್ನು ತಿರಸ್ಕರಿಸಿತ್ತು. ಇದನ್ನು ವಿಐಎಸ್ಎಲ್ ಹೈಕೋರ್ಟ್‌ನಲ್ಲಿ ಪ್ರಶ್ನಿಸಿತ್ತು.