ಆಕಾಶದಲ್ಲಿನ ವಿಸ್ಮಯ ನೋಡೋಣ ಬನ್ನಿ

ಒಮ್ಮೊಮ್ಮೆ ನಸುಕಿನ ವೇಳೆ ಆಕಾಶದಲ್ಲಿ ನಮ್ಮನ್ನು ಅಚ್ಚರಿಗೊಳಿಸುವ ವಿದ್ಯಮಾನಗಳು ನಡೆಯುತ್ತಿರುತ್ತವೆ. ಅಂಥ ಅಪರೂಪದ ಘಟನೆಯೊಂದು ಕಳೆದ ಒಂದು ವಾರದಿಂದ ನೀಲಾಕಾಶದಲ್ಲಿ ನಡೆಯುತ್ತಿದೆ.

ಬಹಳ ವರ್ಷಗಳ ನಂತರ ಸೌರವ್ಯೂಹದ 8 ಗ್ರಹಗಳಲ್ಲಿ (ಭೂಮಿಯನ್ನು ಬಿಟ್ಟು), ನಾಲ್ಕು ಗ್ರಹಗಳು ಬರಿಗಣ್ಣಿಗೆ ಕಾಣುತ್ತಿವೆ. ಮುಂಜಾನೆ 5 ಗಂಟೆಯ ಸುಮಾರಿಗೆ ದಿಗಂತದಿಂದ ಅತ್ಯಂತ ದೊಡ್ಡಗ್ರಹ ಗುರು, ನಂತರ ಶುಕ್ರಗ್ರಹ, ಪಕ್ಕದಲ್ಲಿ ಎಳೆಯ ಚಂದಿರ, ತುಸು ಮೇಲೆ ಕೆಂಬಣ್ಣದ ಮಂಗಳಗ್ರಹ ಹಾಗೂ ನಯನ ಮನೋಹರವಾದ ಶನಿ ಗ್ರಹಗಳು ಏಕರೇಖೆಯಲ್ಲಿ ಮೆರವಣಿಗೆ ಹೊರಟಂತೆ ಗೋಚರಿಸುತ್ತಿವೆ.ಇದೇ ಆ ವಿಶೇಷ ವಿದ್ಯಮಾನ.

ಏಪ್ರಿಲ್ 2ರಿಂದಲೇ ಈ ಗ್ರಹಗಳು ಬರಿಗಣ್ಣಿಗೆ ಕಾಣುತ್ತಿದ್ದವು. ಏಪ್ರಿಲ್ 24 ರಿಂದ 30ರವರೆಗೆ ಇನ್ನಷ್ಟು ಸ್ಪಷ್ಟವಾಗಿ ಕಾಣುತ್ತಿದ್ದವು. ದೃಷ್ಟಿ ಚುರುಕಾಗಿದ್ದವರಿಗೆ ಎತ್ತರದ ಪ್ರದೇಶದಿಂದ ಬುಧ ಗ್ರಹವನ್ನೂ ನೋಡುವ ಅವಕಾಶವಿತ್ತು. ಬೆಳಕು ಹೆಚ್ಚಾದಂತೆ ಈ ಗ್ರಹಗಳು ಕಾಣುತ್ತಿರಲಿಲ್ಲ. ಸೂರ್ಯನ ಪ್ರಕಾಶದಲ್ಲಿ ಶನಿಗ್ರಹ ಮತ್ತು ಮಂಗಳ ಗ್ರಹಗಳು ಮಸುಕಾಗುತ್ತವೆ.

ಮೇ 2 ರ ನಂತರವೂಈ ಗ್ರಹಗಳನ್ನು ಬರಿಗಣ್ಣಿನಲ್ಲಿ ನೋಡಬಹುದು. ರಾತ್ರಿ 2 ರಿಂದ ನಸುಕಿನ 4 ಗಂಟೆ ಸಮಯದಲ್ಲಿ ಈ ಗ್ರಹಗಳು ಕಾಣುತ್ತವೆ. ಬೈನಾಕ್ಯುಲರ್ ಇಲ್ಲವೇ ಅಧಿಕ ಸಾಮರ್ಥ್ಯದ ದೂರದರ್ಶಕವಿದ್ದರೆ (ಮೋಡಗಳಿಲ್ಲದ ವಾತಾವರಣವಿದ್ದರೆ) ಗುರುಗ್ರಹದ ನಾಲ್ಕು ಉಪ ಗ್ರಹಗಳಾದ ಐಯೋ, ಕ್ಯಾಲಿಸ್ಟೊ, ಯುರೋಪಾ ಮತ್ತು ಗ್ಯಾನಿಮೇಡ್‌ಗಳನ್ನೂನೋಡಿ ಆನಂದಿಸ ಬಹುದು. ಈ ರೀತಿಯ ಗ್ರಹಗಳ ಮೆರವಣಿಗೆ ಪ್ರತಿ 19 ವರ್ಷಗಳಿಗೊಮ್ಮೆ ನಡೆಯುತ್ತದೆ.

ರಾತ್ರಿಯ ಮತ್ತು ನಸುಕಿನ ಆಕಾಶವೀಕ್ಷಣೆ ನಿಜಕ್ಕೂ ಮನಸ್ಸಿಗೆ ಮುದನೀಡುತ್ತದೆ. ನೀವೂ ನೋಡಿ, ಮಕ್ಕಳಿಗೂ ತೋರಿಸುವ ಮೂಲಕ ವೈಜ್ಞಾನಿಕ ಪ್ರಜ್ಞೆ ರೂಪಿಸಿಕೊಳ್ಳಿ.