ಶುಕ್ರವಾರ, ಜೂಲೈ 3, 2020
23 °C
ಪಾಕಿಸ್ತಾನ ಮೂಲದ್ದಲ್ಲ: ಮಾಲೀಕರಿಂದ ಸ್ಪಷ್ಟನೆ

ಗೂಗಲ್ ಪ್ಲೇಸ್ಟೋರ್‌ನಲ್ಲಿ ಮತ್ತೆ ಬಂತು 'ಮಿತ್ರೊನ್' ಆ್ಯಪ್

ಪ್ರಜಾವಾಣಿ ವೆಬ್ ಡೆಸ್ಕ್ Updated:

ಅಕ್ಷರ ಗಾತ್ರ : | |

Mitron app

ಬೆಂಗಳೂರು: ಟಿಕ್‌ಟಾಕ್‌ಗೆ ಭಾರತೀಯರ ಉತ್ತರ ಎಂದು ಬಿಂಬಿಸಲಾಗಿದ್ದ ಮಿತ್ರೊನ್ (Mitron) ಆ್ಯಪ್ ಗೂಗಲ್ ಪ್ಲೇಸ್ಟೋರ್‌ನಲ್ಲಿ ಮರಳಿ ಬಂದಿದೆ.

ಚೀನಾ ವಿರೋಧಿ ಅಲೆಯ ನಡುವೆ ದೇಶದಲ್ಲಿ ಜನಪ್ರಿಯಗೊಂಡಿದ್ದ ಮೊಬೈಲ್‌ ವಿಡಿಯೊ ಮೇಕಿಂಗ್‌ ಆ್ಯಪ್‌ 'ಮಿತ್ರೊನ್' ಕಳೆದ ವಾರ ಪ್ಲೇಸ್ಟೋರ್‌ನಿಂದ ಮಾಯವಾಗಿತ್ತು. ಆ ಕುರಿತು ಗೂಗಲ್ ಆಗಲಿ, ಮಿತ್ರೊನ್ ಮಾಲೀಕರಾಗಲಿ ಸ್ಪಷ್ಟನೆ ನೀಡಿರಲಿಲ್ಲ. ಇದೀಗ ಆ್ಯಪ್ ಅಭಿವೃದ್ಧಿಪಡಿಸಿದ, ಐಐಟಿ ರೂರ್ಕಿ ವಿದ್ಯಾರ್ಥಿ ಶಿವಾಂಕ್‌ ಅಗರ್ವಾಲ್ ಮತ್ತು ಅನೀಷ್ ಖಂಡೇಲ್‌ವಾಲ್ ಆ್ಯಪ್ ಕುರಿತು ಸ್ಪಷ್ಟನೆ ನೀಡಿದ್ದಾರೆ.

ಅಗತ್ಯ ದಾಖಲಾತಿಗಳನ್ನು ಒದಗಿಸಿದ ನಂತರ ಆ್ಯಪ್ ಪ್ಲೇಸ್ಟೋರ್‌ನಲ್ಲಿ ಮರಳಿದೆ. ಈ ಆ್ಯಪ್ ಪಾಕಿಸ್ತಾನ ಮೂಲದ್ದಲ್ಲ ಎಂದು ಶಿವಾಂಕ್‌ ಹಾಗೂ ಅನೀಷ್ ತಿಳಿಸಿದ್ದಾರೆ.

ಇದನ್ನೂ ಓದಿ: ಗೂಗಲ್ ಪ್ಲೇಸ್ಟೋರ್‌ನಿಂದ 'ಮಿತ್ರೊನ್' ನಾಪತ್ತೆ

ಕ್ಯುಬಾಕ್ಸಸ್‌ನಿಂದ ಖರೀದಿಸಿದ್ದಲ್ಲ: ಪಾಕಿಸ್ತಾನ ಮೂಲದ ಸೋರ್ಸ್‌ ಕೋಡ್‌ನಿಂದ ಮಿತ್ರೊನ್ ಅಭಿವೃದ್ಧಿಪಡಿಸಲಾಗಿದೆ ಎಂಬ ಆರೋಪವನ್ನೂ ಶಿವಾಂಕ್‌ ಅಲ್ಲಗಳೆದಿದ್ದಾರೆ. ಆಸ್ಟ್ರೇಲಿಯಾದ ‘ಎನ್ವಾಟೋ’ ಕಂಪನಿಯಿಂದ ಕೋಡ್ ಖರೀದಿಸಿ ಆ್ಯಪ್ ಅಭಿವೃದ್ಧಿಪಡಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

‘ಪರವಾನಗಿ ಪಡೆದ ಕೋಡ್‌ ಖರೀದಿಸಬಹುದಾದ ವೇದಿಕೆಯಾಗಿದೆ ‘ಎನ್ವಾಟೋ’. ನಾವೂ ಸಹ ಅಲ್ಲಿಂದಲೇ ಕೋಡ್ ಖರೀದಿಸಿದ್ದೇವೆ. ಹೀಗಾಗಿ ಮಿತ್ರೊನ್‌ನ ಕಾನೂನುಬದ್ಧ ಮಾಲೀಕರು ನಾವೇ ಆಗಿದ್ದೇವೆ. ಖರೀದಿಸುವಾಗ ಇದ್ದ ಆರಂಭಿಕ ಟೆಂಪ್ಲೆಟ್‌ಗೇ ನಾವು ಒತ್ತು ನೀಡಿದ್ದೆವು. ಡೆವಲಪರ್‌ನ ಮೂಲವನ್ನು ಪ್ರದರ್ಶಿಸಿಲ್ಲ ಹಾಗೂ ಅದರ ಅಗತ್ಯವೂ ಅಲ್ಲ’ ಎಂದು ಶಿವಾಂಕ್‌ ಮತ್ತು ಅನೀಷ್ ಸ್ಪಷ್ಟನೆ ನೀಡಿರುವುದನ್ನು ದಿ ಇಂಡಿಯನ್ ಎಕ್ಸ್‌ಪ್ರೆಸ್ ಸುದ್ದಿತಾಣ ವರದಿ ಮಾಡಿದೆ.

ಇದನ್ನೂ ಓದಿ: ದೇಶದಲ್ಲಿ ಟಿಕ್‌ಟಾಕ್ ಪ್ರತಿಸ್ಪರ್ಧಿ Mitron ಆ್ಯಪ್; ಅಭಿವೃದ್ಧಿ ಮೂಲ ಪಾಕಿಸ್ತಾನ!

ಪಾಕಿಸ್ತಾನದ ಕ್ಯುಬಾಕ್ಸಸ್ (QBoxus) ಡೆವಲಪರ್‌ಗಳ ತಂಡ ಕೋಡ್‌ಕ್ಯಾನ್ಯಾನ್‌ನಲ್ಲಿ ಮಾರಾಟಕ್ಕೆ ಇಟ್ಟಿದ್ದ ಸೋರ್ಸ್‌ ಸೋರ್ಸ್ ಕೋಡ್‌ನ್ನು ₹2,500ಕ್ಕೆ (34 ಡಾಲರ್‌) ಖರೀದಿಸಿ ಮಿತ್ರೊನ್ ಅಭಿವೃದ್ಧಿಪಡಿಸಲಾಗಿದೆ. ಅದರಲ್ಲಿ ಯಾವುದೇ ಬದಲಾವಣೆ ಮಾಡದೆ, ಮಿತ್ರೊನ್ ಎಂದು ಹೆಸರು ಬದಲಿಸಿಕೊಂಡು ಗೂಗಲ್‌ ಪ್ಲೇ ಸ್ಟೋರ್‌ನಲ್ಲಿ ಸೇರಿಸಲಾಗಿದೆ. ಟಿಕ್‌ಟಾಕ್‌ ಆ್ಯಪ್‌ನ ತದ್ರೂಪ ಆಗಿರುವ ಟಿಕ್‌ಟಿಕ್‌ನ ಹೆಸರು ಬದಲಿಸಿಕೊಂಡ ಅಪ್ಲಿಕೇಷನ್ ಮಿತ್ರೋನ್ ಎಂಬ ಆರೋಪಗಳು ವ್ಯಕ್ತವಾಗಿರುವ ಬಗ್ಗೆ ಈಚೆಗೆ ವರದಿಯಾಗಿತ್ತು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು