ಖಾಸಗಿ ಭೂಮಿಯಲ್ಲಿ ಗಿಡಮರಗಳನ್ನು ಬೆಳೆಸಿ, ಪರ್ಯಾಯ ಅರಣ್ಯವನ್ನಾಗಿ ರೂಪಿಸಿರುವುದು ಇಲ್ಲಿನ ಸಾಧನೆ. ಇದರಿಂದಾಗಿಯೇ ಬೆಂಗಳೂರಿನ ಸೆರಗಿನಲ್ಲಿ ಸುಮಾರು 100ಕ್ಕೂ ಹೆಚ್ಚು ಎಕರೆ ಪ್ರದೇಶದಲ್ಲಿ ದಟ್ಟ ಹಸಿರಿನಿಂದ ಕೂಡಿರುವ ಪರ್ಯಾಯ ಅರಣ್ಯ ಬೆಳೆದುನಿಂತಿದೆ. ಪಶ್ಚಿಮ ಘಟ್ಟ ಸೇರಿದಂತೆ ದೇಶ, ವಿದೇಶದ ಹಲವು ಬಗೆಯ ಮರಗಳು ಇಲ್ಲಿವೆ. ಬನ್ನೇರುಘಟ್ಟ ಅಭಯಾರಣ್ಯಕ್ಕೆ ಹೊಂದಿಕೊಂಡಿದೆ ಈ ಪರ್ಯಾಯ ಅರಣ್ಯ. ಶಿವನಹಳ್ಳಿಯ ರಾಮಕೃಷ್ಣಾಶ್ರಮದ ಜಮೀನಿನಲ್ಲಿ ಆಶ್ರಮದ ವಿಷ್ಣುಮಯಾನಂದಜಿ ಸ್ವಾಮೀಜಿ ಅವರ ಅತ್ಯಂತ ಆಸಕ್ತಿ, ಪ್ರೀತಿಯಿಂದಲೇ ಈ ಪರ್ಯಾಯ ಅರಣ್ಯ ಬೆಳೆದುನಿಂತಿರುವುದು.