ಭೂಮಿಕಾ | ವರ್ಷಧಾರೆಯ ನೆನಪಿನ ಸಿಂಚನ: ಮಳೆ, ಇಳೆ, ಮಹಿಳೆ

ಬೆಂಗಳೂರಿನ ರಸ್ತೆಗಳೆಲ್ಲ ಜಲಾವೃತ ಎಂದು ಮಾಧ್ಯಮಗಳು ಎತ್ತರದ ಸ್ವರದಲ್ಲಿ ಸುದ್ದಿ ಬಿತ್ತರಿಸುತ್ತಿದ್ದಾಗ ಅಮೆರಿಕೆಯ ನೆಲದಲ್ಲಿದ್ದೆ. ವಿಮಾನ ನಿಲ್ದಾಣದಿಂದ ಮನೆ ತಲುಪುವುದಕ್ಕಿಂತಲೂ ಹೆಚ್ಚಾಗಿ ಬಟ್ಟೆಗಳನ್ನು ಒಣಗಿಸುವುದು ಹೇಗಪ್ಪಾ ಎಂಬ ಚಿಂತೆ ಕಾಡುತ್ತಿತ್ತು. ಕಳವಳದಲ್ಲಿಯೇ ವಿಮಾನ ಇಳಿದು ಕಾವಳದಲ್ಲಿಯೇ ಮನೆ ತಲುಪಿದಾಗ , ನೆಟ್ಟಿದ್ದ ನಾಲ್ಕಾರು ಹೂಗಿಡಗಳೂ ಒಣಗಿ ನಿಂತಿದ್ದವು!

ತಿಂಗಳಾನುಗಟ್ಟಲೆ ಹೊಡೆಯುವ ಮಳೆಯಿಂದ ರೋಸಿಹೋದ ಮಲೆನಾಡಿಗರನ್ನು ಅರ್ಥಾತ್ ಮಳೆನಾಡಿಗರನ್ನು ‘ಹೇಗಿದೆ ಮಳೆಗಾಲ?’ ಎಂದು ಕೇಳಿನೋಡಿ. ‘ಸುಡುಗಾಡು ಮಳೆಗಾಲ, ಬೇಜಾರು ಹಿಡಿದುಹೋಯಿತು’ ಎಂಬ ಉತ್ತರ ಬರದಿದ್ದರೆ ಹೇಳಿ. ಸುಡುಗಾಡಿಗೂ ಹೋಗಲಾರದಷ್ಟು ಮಳೆ ಹೊಯ್ಯುವಲ್ಲಿ ಮಳೆಗಾಲವೇ ಸುಡುಗಾಡಾಗಿಬಿಡುತ್ತದೆ!