ಪೇಶಾವರ: ಪಾಕಿಸ್ತಾನದ ವಾಯವ್ಯ ಭಾಗವಾದ ಖೈಬರ್ ಫಂಕ್ತುವ್ವಾ ಪ್ರಾಂತ್ಯದಲ್ಲಿ ಗುರುವಾರ ಸಂಭವಿಸಿದ ಉಗ್ರನ ಆತ್ಮಹತ್ಯಾ ಬಾಂಬ್ ದಾಳಿಯಲ್ಲಿ ಒಬ್ಬ ಯೋಧ ಸೇರಿ ಇಬ್ಬರು ಮೃತಪಟ್ಟಿದ್ದಾರೆ.
ಅಫ್ಗಾನಿಸ್ತಾನ್ ಗಡಿಯಲ್ಲಿರುವ ಉತ್ತರ ವಾಜಿರಿಸ್ತಾನ್‌ದ ಮಿರಾನ್‌ಶಾ ಪಟ್ಟಣದ ಸೇನಾ ಕಚೇರಿ ಬಳಿ ಈ ಘಟನೆ ನಡೆದಿದೆ.
ಘಟನೆಯಲ್ಲಿ ಯೋಧ ಸೇರಿದಂತೆ ಒಬ್ಬ ನಾಗರಿಕ ಮೃತಪಟ್ಟಿದ್ದು, 9 ಜನ ಗಂಭೀರವಾಗಿ ಗಾಯಗೊಂಡಿದ್ದಾರೆ ಎಂದು ಪಾಕಿಸ್ತಾನದ ಸೇನಾ ವಕ್ತಾರರು ತಿಳಿಸಿದ್ದಾರೆ. ಇದುವರೆಗೆ ಯಾವುದೇ ಸಂಘಟನೆ ಈ ದಾಳಿಯ ಹೊಣೆಯನ್ನು ಹೊತ್ತುಕೊಂಡಿಲ್ಲ.
ಘಟನೆ ನಡೆದ ಈ ಪ್ರದೇಶದಲ್ಲಿ ತಾಲಿಬಾನ್ ತನ್ನ ಅಸ್ತಿತ್ವವನ್ನು ಸ್ಥಾಪಿಸಲು ನೋಡುತ್ತಿದೆ. ಬಲೂಚಿಸ್ತಾನ್ ಸೇರಿದಂತೆ ಈ ಭಾಗದಲ್ಲಿ ಉಗ್ರರ ದಾಳಿಗಳು ಪುನಾರಾವರ್ತನೆಯಾಗುತ್ತಿವೆ.
ಇನ್ನು ಈ ಘಟನೆಯನ್ನು ಪಾಕ್ ಪ್ರಧಾನಿ ಶಹಬಾಜ್ ಶರೀಫ್ ಅವರು ತೀವ್ರವಾಗಿ ಖಂಡಿಸಿದ್ದು, ಮುಸ್ಲಿಂ ಮೇಲೆ ದಾಳಿ ಮಾಡುವ ಮತ್ತೊಬ್ಬ ಮುಸ್ಲಿಂ ಖಂಡಿತವಾಗಿಯೂ ಮುಸ್ಲಿಂ ಆಗಿರುವುದಿಲ್ಲ ಎಂದು ಪರೋಕ್ಷವಾಗಿ ತಾಲಿಬಾನ್ ವಿರುದ್ಧ ಕಿಡಿಕಾರಿದ್ದಾರೆ.
