ಕಾಬೂಲ್: ಅಫ್ಗಾನಿಸ್ತಾನದಲ್ಲಿರುವ ಅಮೆರಿಕ ಪಡೆಗಳ ಅಂತಿಮ ಹಂತದ ವಾಪಸಾತಿ ಪ್ರಕ್ರಿಯೆ ಶನಿವಾರ ಆರಂಭಗೊಂಡಿದೆ. ಈ ಮೂಲಕ ತಾಲಿಬಾನ್‌ ಜೊತೆಗಿನ ತನ್ನ ಸುದೀರ್ಘ ಯುದ್ಧವನ್ನು ಅಮೆರಿಕ ಕೊನೆಗೊಳಿಸಿದಂತಾಗಿದೆ.
‘ಅಮೆರಿಕ ಪಡೆಗಳ ವಾಪಸಾತಿ ಪ್ರಕ್ರಿಯೆ ಪ್ರಗತಿಯಲ್ಲಿದೆ. ತಾಲಿಬಾನ್‌ ಜೊತೆ ನಡೆದ ಒಪ್ಪಂದದ ಪ್ರಕಾರ 2020 ರಲ್ಲೇ ಪಡೆಗಳನ್ನು ವಾಪಸ್‌ ಕರೆಸಿಕೊಳ್ಳಬೇಕಿತ್ತು’ ಎಂದು ಅಮೆರಿಕದ ಅಧಿಕಾರಿಗಳು ತಿಳಿಸಿದ್ದಾರೆ.
ಮೇ1ರಂದು ಅಂತಿಮ ಹಂತದ ಸೇನಾ ಪಾಪಸಾತಿ ಪ್ರಕ್ರಿಯೆ ಆರಂಭಿಸಲು ಅಮೆರಿಕ ಅಧ್ಯಕ್ಷ ಜೋ ಬೈಡನ್‌ ಅವರು ಸೂಚಿಸಿದ್ದರು.
ನ್ಯಾಟೊ ಪಡೆಗಳ ವಾಪಸಾತಿಯ ಕಾರಣ ಕಾಬೂಲ್ ಮತ್ತು ಬಾಗ್ರಾಮ್ ವಾಯು ನೆಲೆಯಲ್ಲಿ ಅಮೆರಿಕದ ಹೆಲಿಕಾಪ್ಟರ್‌ಗಳ ಹಾರಾಟ ಹೆಚ್ಚಾಗಿದೆ ಎಂದು ಮೂಲಗಳು ತಿಳಿಸಿವೆ.
ಅಮೆರಿಕದ ಪಡೆಗಳು ನಿರ್ಗಮಿಸುವ ವೇಳೆ ಯಾವುದೇ ಸಂಭಾವ್ಯ ದಾಳಿಗಳನ್ನು ಎದುರಿಸುವ ಸಲುವಾಗಿ ಅಫ್ಗಾನಿಸ್ತಾನದ ಭದ್ರತಾಪಡೆಗಳು ಕಟ್ಟೆಚ್ಚರ ವಹಿಸಿದ್ದವು.
