ಕೊರೊನಾ ಲಸಿಕೆ ಹಗರಣ: ಅರ್ಜೆಂಟೀನಾ ಆರೋಗ್ಯ ಸಚಿವ ರಾಜೀನಾಮೆ

ಸರ್ಕಾರದ ಕೋವಿಡ್‌ ಕಾರ್ಯತಂತ್ರದ ಉಸ್ತುವಾರಿ ವಹಿಸಿದ್ದ ಸಚಿವಗೈನ್ಸ್ ಗೊನ್ಜಾಲೆಜ್ ಗಾರ್ಸಿಯಾ ಅವರಿಗೆ ರಾಜೀನಾಮೆ ಸಲ್ಲಿಸುವಂತೆ ಅಧ್ಯಕ್ಷರು ಸೂಚಿಸಿದ್ದಾರೆ ಎಂದು ಹೆಸರು ಬಹಿರಂಗಪಡಿಸಲು ಬಯಸದ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.

ಆರೋಗ್ಯ ಸಚಿವಾಲಯದಲ್ಲಿ ಗೈನ್ಸ್‌ ಅವರ ನಂತರದ ಸ್ಥಾನದಲ್ಲಿದ್ದ ಕಾರ್ಲಾ ವಿಝೊಟ್ಟಿ ಸಚಿವರಾಗಿ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ ಎಂದು ಸುದ್ದಿಸಂಸ್ಥೆ ಟೆಲಮ್‌ ತಿಳಿಸಿದೆ.

ಆರೋಗ್ಯ ಸಿಬ್ಬಂದಿಗೆ ಕೊರೊನಾ ಲಸಿಕೆ ನೀಡುವುದಕ್ಕೂ ಮೊದಲೇ 400ಕ್ಕೂ ಹೆಚ್ಚು ರಾಜಕೀಯ ವ್ಯಕ್ತಿಗಳು ಮತ್ತು ಪ್ರಭಾವಿಗಳು ಕದ್ದುಮುಚ್ಚಿ ಲಸಿಕೆ ಪಡೆದಿರುವ ಹಗರಣ ನಡೆದಿದೆ. ವೈದ್ಯರು, ಆರೋಗ್ಯ ಸಿಬ್ಬಂದಿ ಮತ್ತು ಹಿರಿಯ ನಾಗರಿಕರಿಗೆ ಮೊದಲ ಆದ್ಯತೆಯಲ್ಲಿ ಕೊರೊನಾ ಲಸಿಕೆ ಹಾಕಲಾಗುತ್ತಿದೆ. ಆದರೆ, ಈ ಆದ್ಯತಾ ಗುಂಪಿನಲ್ಲಿ ಇಲ್ಲದ ಮೇಯರ್‌ಗಳು, ಶಾಸಕರು, ಸಾಮಾಜಿಕ ಕಾರ್ಯಕರ್ತರು ಮತ್ತು ರಾಜಕಾರಣಿಗಳ ಹತ್ತಿರದವರಿಗೂ ಕೊರೊನಾ ಲಸಿಕೆ ನೀಡಿರುವ ವರದಿಗಳು ಬಂದಿರುವ ಕಾರಣಕ್ಕೆ ಆರೋಗ್ಯ ಸಚಿವರನ್ನು ಹುದ್ದೆಯಿಂದ ಕಿತ್ತುಹಾಕಲಾಗಿದೆ ಎನ್ನಲಾಗಿದೆ.

‘ಅಧ್ಯಕ್ಷರ ಸೂಚನೆ ಮೇರೆಗೆ ರಾಜೀನಾಮೆ ಸಲ್ಲಿಸಿರುವೆ. ಆದ್ಯತಾ ಗುಂಪಿನಲ್ಲಿದ್ದವರಿಗೆ ಮಾತ್ರ ಲಸಿಕೆ ನೀಡಲಾಗಿದೆ. ಆದರೆ, ತಪ್ಪು ತಿಳಿವಳಿಕೆಯಿಂದ ನನ್ನನ್ನು ಬಲವಂತವಾಗಿ ವಜಾಗೊಳಿಸಲಾಗಿದೆ’ ಎಂದುಗೈನ್ಸ್ ಗೊನ್ಜಾಲೆಜ್ ಗಾರ್ಸಿಯಾ ಟ್ವೀಟ್‌ ಮಾಡಿದ್ದಾರೆ.