ಧರ್ಮಶಾಲಾ: ರಷ್ಯಾ ಉಕ್ರೇನ್ ಮೇಲೆ ಆಕ್ರಮಣ ಮಾಡಿದ ನಂತರ ಉಭಯ ದೇಶಗಳ ನಡುವಿನ ಸಂಬಂಧಗಳು ಸಂಪೂರ್ಣ ಹಳಸಿ ಹೋಗಿವೆ. ಎರಡೂ ದೇಶದ ಪ್ರಜೆಗಳು ಪರಸ್ಪರ ವೈರಿಗಳಂತೆ ಬಿಂಬಿತವಾಗಿದ್ದಾರೆ.
ಆದರೆ, ರಷ್ಯಾ ಯುವಕ ಹಾಗೂ ಉಕ್ರೇನ್ ಯುವತಿ ಮದುವೆಯಾಗಿ ಪ್ರೀತಿಗೆ ವೈರತ್ವ ಇಲ್ಲ ಎಂಬುದನ್ನೂ ಸಾರಿದ್ದಾರೆ. ವಿಶೇಷವೆಂದರೆ ಈ ಜೋಡಿ ಭಾರತದಲ್ಲಿ ಮದುವೆಯಾಗಿ ದಾಂಪತ್ಯಕ್ಕೆ ಕಾಲಿಟ್ಟಿದ್ದಾರೆ.
ಇಸ್ರೇಲ್ನಲ್ಲಿ ಕೆಲಸ ಮಾಡುತ್ತಿರುವ ರಷ್ಯಾ ಮೂಲದ ಸರ್ಗಿ ನೊವೊಕಿವಾ ಅವರು ಉಕ್ರೇನ್ನ ತಮ್ಮ ಗೆಳತಿ ಎಲಾನ್ ಬ್ರಾಮೊಕಾ ಅವರನ್ನು ಹಿಮಾಚಲ ಪ್ರದೇಶದ ಧರ್ಮಶಾಲಾದ ಬಳಿ ಇರುವಖರೋಟಾದ ‘ದಿವ್ಯ ಆಶ್ರಮ’ದಲ್ಲಿ ಕಳೆದ ಮಂಗಳವಾರ ಹಿಂದುಸಂಪ್ರದಾಯದಂತೆ ಮದುವೆಯಾಗಿದ್ದಾರೆ ಎಂದು ರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.
ಎಲಾನ್ ಹಾಗೂ ನೊವೊಕಿವಾ ಅವರು ಕಳೆದ ಎರಡು ವರ್ಷಗಳಿಂದ ಪರಸ್ಪರ ಪ್ರೀತಿಸುತ್ತಿದ್ದರು.ಕಳೆದ ಫೆಬ್ರವರಿಯಲ್ಲಿ ರಷ್ಯಾ ಮತ್ತು ಉಕ್ರೇನ್ ಮಧ್ಯೆ ಯುದ್ಧ ಆರಂಭವಾಗಿದ್ದರಿಂದ ಈ ಜೋಡಿ ತಾಯ್ನಾಡಿಗೆ ತೆರಳಲು ಆಗಿರಲಿಲ್ಲ.
ಮದುವೆಯಲ್ಲಿ ಸ್ಥಳೀಯರು ಕೂಡ ಭಾಗವಹಿಸಿದ್ದರು. ಅಲ್ಲದೇ ದಂಪತಿ ಹಿಂದುಸಂಪ್ರದಾಯದಂತೆ ಉಡುಗೆ ತೊಟ್ಟು ಮದುವೆಯಾಗಿದ್ದು ಗಮನ ಸೆಳೆದಿದೆ.
ದಿವ್ಯ ಆಶ್ರಮದ ವಿನೋದ್ ಶರ್ಮಾ ಅವರ ಮುಂದಾಳತ್ವದಲ್ಲಿ ಈ ಅಪರೂಪದ ಮದುವೆ ನಡೆದಿದೆಎಎಂದು ವರದಿಗಳು ಹೇಳಿವೆ.