ವೀಸಾ ನೀತಿ ಉದಾರ: 5 ಲಕ್ಷ ಭಾರತೀಯರಿಗೆ ಪೌರತ್ವ ನೀಡಲು ಜೋ ಬೈಡನ್‌ ಚಿಂತನೆ

‘ವಲಸೆ ನೀತಿ ಸುಧಾರಣೆಯ ಕಾನೂನು ಅಂಗೀಕರಿಸಲು ಅಗತ್ಯ ಕ್ರಮವನ್ನು ಬೈಡನ್‌ ತಕ್ಷಣವೇ ಕೈಗೊಳ್ಳಲಿದ್ದಾರೆ’ ಎಂದು ಮುನ್ನೋಟದಲ್ಲಿ ವಿವರಿಸಲಾಗಿದೆ. ಗ್ರೀನ್‌ ಕಾರ್ಡ್‌ ಎಂದು ಕರೆಯಲಾಗುವ ಉದ್ಯೋಗ ಆಧಾರಿತ ವೀಸಾ ಹೊಂದಿರುವವರಿಗೆ ಪೌರತ್ವ ನೀಡಿಕೆಯ ನೀತಿಯೂ ಮರಳಿ ಜಾರಿ ಆಗಲಿದೆ.

ಇರಾನ್‌, ಸಿರಿಯಾ ಸೇರಿದಂತೆ ಕೆಲವು ರಾಷ್ಟ್ರಗಳ ಮುಸ್ಲಿಮರು ಅಮೆರಿಕ ಪ್ರವೇಶಿಸುವುದನ್ನು ಟ್ರಂಪ್‌ ಅವರು ನಿಷೇಧಿಸಿದ್ದರು. ಈ ನಿಷೇಧವೂ ತೆರವಾಗಲಿದೆ.

ಎಚ್‌1ಬಿ ವೀಸಾ ಸಂಖ್ಯೆ ಏರಿಕೆ

ಎಚ್‌1ಬಿ ವೀಸಾ ಸೇರಿದಂತೆ ಪರಿಣತ ವೃತ್ತಿಪರರಿಗೆ ನೀಡಲಾಗುವ ವೀಸಾಗಳ ಸಂಖ್ಯೆ ಹೆಚ್ಚಳ ಆಗಲಿದೆ.

ಆಯಾ ದೇಶಕ್ಕೆ ನೀಡುವವೀಸಾ ಸಂಖ್ಯೆ ಮೇಲಿನ ಮಿತಿಯನ್ನು ರದ್ದು ಮಾಡಲಾಗುವುದು. ಈ ಎರಡು ನಿರ್ಧಾರಗಳಿಂದ ಭಾರತದ ಮಾಹಿತಿ ತಂತ್ರಜ್ಞಾನ ಪರಿಣತರಿಗೆ ಭಾರಿ ಅನುಕೂಲ ಆಗಲಿದೆ.

ಎಚ್‌1ಬಿ ವೀಸಾ ಹೊಂದಿರುವವರ ಸಂಗಾತಿಗಳಿಗೆ (ಗಂಡ ಅಥವಾ ಹೆಂಡತಿ) ನೀಡಿದ್ದ ವೀಸಾವನ್ನು ಟ್ರಂಪ್‌ ಅವರು ರದ್ದು ಮಾಡಿದ್ದರು. ಈ ರದ್ದತಿ ತೆರವಾಗುವ ಸಾಧ್ಯತೆ ಇದೆ.

ಅಮೆರಿಕದ ಕೆಲಸಗಾರರ ಹಿತರಕ್ಷಣೆಯ ಉದ್ದೇಶದಿಂದ ಇತರ ವಿದೇಶಿ ವೀಸಾ ನೀಡಿಕೆ ಕೂಡ ರದ್ದಾಗಿತ್ತು.

ಕಮಲಾಗೆ ಭಾರತಕ್ಕೆ ಆಹ್ವಾನ

(ನವದೆಹಲಿ ವರದಿ): ಬೈಡನ್‌ ನೇತೃತ್ವದ ಸರ್ಕಾರದ ಜತೆಗೆ ಆರಂಭದಿಂದಲೇ ಸಮನ್ವಯದಿಂದ ಕೆಲಸ ಮಾಡಲು ಕೇಂದ್ರ ಸರ್ಕಾರ ಯೋಜಿಸಿದೆ. ಉಪಾಧ್ಯಕ್ಷೆಯಾಗಿ ಆಯ್ಕೆ ಆಗಿರುವ ಕಮಲಾ ಹ್ಯಾರಿಸ್‌ ಅವರು 2021ರ ಜನವರಿ 20ರಂದು ಅಧಿಕಾರ ವಹಿಸಿಕೊಂಡ ಬಳಿಕ ಅವರನ್ನು ಭಾರತಕ್ಕೆ ಆಹ್ವಾನಿಸಲು ನಿರ್ಧರಿಸಲಾಗಿದೆ ಎಂದು ಮೂಲಗಳು ಹೇಳಿವೆ.ಪ್ರಮಾಣ ವಚನ ಸ್ವೀಕಾರದ ನಂತರ,ಜಗತ್ತಿನ ಪ್ರಜಾತಂತ್ರ ದೇಶಗಳ ಮುಖ್ಯಸ್ಥರ ಸಮಾವೇಶಕ್ಕೆ ಬೈಡನ್‌ ಸಿದ್ಧತೆ ನಡೆಸಿದ್ದಾರೆ. ಈ ಕಾರ್ಯಕ್ರಮಕ್ಕೆ ಪ್ರಧಾನಿ ನರೇಂದ್ರ ಮೋದಿ ಅವರಿಗೂ ಆಹ್ವಾನ ದೊರೆಯುವ ನಿರೀಕ್ಷೆ ಇದೆ. ಆಹ್ವಾನ ಬಂದರೆ ಅಮೆರಿಕದ ಹೊಸ ಅಧ್ಯಕ್ಷ ಮತ್ತು ಪ್ರಧಾನಿ ಮೋದಿಯ ಭೇಟಿಗೂ ಇದು ವೇದಿಕೆ ಒದಗಿಸಲಿದೆ.