ಸ್ವಾತಂತ್ರ್ಯೋತ್ತರದಲ್ಲಿ ರಾಜ–ಮಹಾರಾಜರಿಗೆ ಆಹಾರ ಧಾನ್ಯಗಳು ಹಾಗೂ ಸ್ವಾತಂತ್ರ್ಯ ಹೋರಾಟಗಾರರಿಗೆ ಧಾನ್ಯಗಳ ಜತೆಗೆ ಮದ್ದು–ಗುಂಡುಗಳನ್ನು ಪೂರೈಸುತ್ತಿದ್ದ ಈ ಬುಡಕಟ್ಟು ಜನಾಂಗವು ಬ್ರಿಟಿಷರ ದಬ್ಬಾಳಿಕೆ ಒಳಗಾಗಿದೆ. ಈ ಅನ್ಯಾಯದಿಂದ ತಪ್ಪಿಸಿಕೊಳ್ಳಲು ದೇಶ ಮತ್ತು ವಿದೇಶಗಳಲ್ಲಿ ಹರಿದು ಹಂಚಿಹೋದ ಲಂಬಾಣಿ ಸಮುದಾಯವು ಕಾಲಾನುಕ್ರಮದಲ್ಲಿ ತನ್ನ ಭಾಷೆ, ಸಂಸ್ಕೃತಿ, ಅಚಾರ–ವಿಚಾರಗಳಲ್ಲೂ ಬದಲಾವಣೆ ಕಂಡಿದೆ. ದಕ್ಷಿಣ ಭಾರತದ ಕನ್ನಡ, ಮರಾಠಿ, ಆಂಧ್ರ, ತೆಲುಗು, ತಮಿಳು ಭಾಷೆಗಳ ಪ್ರಭಾವಕ್ಕೊಳಗಾಗಿರುವ ಗೋರ್ ಬೋಲಿಯಾದ ಕುರಿತು ಈ ಕೃತಿ ವಿಶ್ಲೇಷಿಸುತ್ತದೆ. ಬುಡಕಟ್ಟು ಸಮುದಾಯದ ಆಕರ್ಷಕ, ವರ್ಣಮಯ ಉಡುಗೆ–ತೊಡುಗೆ, ವಿಶಿಷ್ಟ ಸಂಸ್ಕೃತಿ, ಪ್ರತಿ ಸಂದರ್ಭಕ್ಕೂ ಬಳಕೆಯಾಗುವ ಹಾಡು, ಸ್ವಾತಂತ್ರ್ಯ, ಸಾಂಸ್ಕೃತಿಕ ಮತ್ತು ಧಾರ್ಮಿಕ ನಾಯಕರ ಬಗ್ಗೆಯೂ ಪರಿಚಯಿಸುವ ಈ ಕೃತಿ ಲಂಬಾಣಿ ಭಾಷೆಗಷ್ಟೇ ಅಲ್ಲ, ಒಟ್ಟು ಸಮುದಾಯದ ಅಧ್ಯಯನಕ್ಕೂ ಆಕರ ಗ್ರಂಥವಾಗಿದೆ. ದಕ್ಷಿಣ ಭಾರತದ ಭಾಷೆಗಳ ಪ್ರಭಾವಕ್ಕೊಳಗಾಗಿಯೂ ಗೋರ್ ಬೋಲಿಯಾ ತನ್ನ ಉಳಿವಿಗೆ ವಹಿಸಬೇಕಾದ ಎಚ್ಚರಿಕೆಯ ಸಂದೇಶವನ್ನೂ ಈ ಕೃತಿ ಮನಗಾಣಿಸುತ್ತದೆ.
