ಗುರುವಾರ, 30 ಮೇ 2024
×
ADVERTISEMENT
ಈ ಕ್ಷಣ :
ADVERTISEMENT
ADVERTISEMENT

ನಿವೇದಿತಾ ಎಚ್‌. ಮೈಸೂರು ಅವರ ಕವಿತೆ 'ನಾವಿಬ್ಬರೇ ಅಲ್ಲ!'

ನಿವೇದಿತಾ ಎಚ್‌. ಮೈಸೂರು
Published 20 ಏಪ್ರಿಲ್ 2024, 23:30 IST
Last Updated 20 ಏಪ್ರಿಲ್ 2024, 23:30 IST
ಅಕ್ಷರ ಗಾತ್ರ

ಬೆಳಗಿನ ಕಾಫಿ

ಒಟ್ಟಿಗೆ ಹೀರಿ

ಮನೆಗೆಲಸಗಳನ್ನು

ಜೊತೆಜೊತೆಗೆ ಮುಗಿಸಿ

ಕೀಲಿತಿರುವಿ

ಹೊರಬೀಳಬೇಕು ಎಂದುಕೊಂಡವರು

ನಾವಿಬ್ಬರೇ ಅಲ್ಲ

ಅಚ್ಚರಿ ಎನಿಸಿದ್ದನ್ನು

 ಆಸಕ್ತಿ ಕೆರಳಿಸಿದ್ದನ್ನು

 ಚರ್ಚಿಸುತ್ತಾ

ಊಟದ ಸವಿ ಹೆಚ್ಚಿಸಬೇಕು

ಎಂದುಕೊಂಡವರು

ನಾವಿಬ್ಬರೇ ಅಲ್ಲ!

ಬೆಳದಿಂಗಳು ಸುರಿವಾಗ

ಮಳೆ ಹನಿವಾಗ

ಹಾಡ ಗುನುಗುನಿಸುತ್ತಾ

ಪರವಶರಾಗಬೇಕು

ಎಂದುಕೊಂಡವರು

ನಾವಿಬ್ಬರೇ ಅಲ್ಲ

ಮುದ್ದಿನ ಕಂದನಿಗೆ

ಕಲ್ಪನೆಯ

ಕುಲಾವಿ ತೊಡಿಸಿ,

ಬೆಚ್ಚನೆಯ ತೊಟ್ಟಿಲಲ್ಲಿಟ್ಟು

ಗಿಲಕಿ ಗಿಲಕಿಸಿದವರು

ನಾವಿಬ್ಬರೇ ಅಲ್ಲ!

ಮುಪ್ಪಿನಲಿ

ಮನೆಯಂಗಳದಿ ಕುಳಿತು

ನೆನಹುಗಳ

ಉಯ್ಯಾಲೆಯಲಿ ಜೀಕುವ

ಯೋಜನೆ ಹಾಕಿಕೊಂಡವರು

ನಾವಿಬ್ಬರೇ ಅಲ್ಲ!

ಸಾವಿರ-ಲಕ್ಷಗಳ ಲೆಕ್ಕದಲ್ಲಿ

ನಮ್ಮಂತಹಾ

ಇಬ್ಬರಿರುತ್ತಾರೆ!

ಬಿಡು…

ಏಳು ಜನ್ಮಗಳುಂಟಂತೆ

ಅಲ್ಲಿ ಸಾವಿರಾರು

ಕಾರ್ತೀಕ-ಶ್ರಾವಣಗಳುಂಟಂತೆ

ಒಂದು ಜನ್ಮ

ಒಂದು ಮಾಸ

ಒಂದು ಘಳಿಗೆ

ನಮ್ಮಿಬ್ಬರದೇ

ಆಗುತ್ತದೆ!

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT