ಕೇಳಿಲ್ಲಿ ಇರುವೆಯೇ
ನೋಡಲ್ಲಿ ವಸಂತದ ಋತುವಿಗೆ
ಎಲೆಎಲೆ ಚಿಗುರಿದರು
ನಿಂತಿಲ್ಲವೇ ಮರ ಕಾಡೊಳಗೆ?
ಹರಿವ ನೀರಿನ ತಳ ನೆಲ
ಜಡವಲ್ಲವೇನು?
ಬೆಳೆವ ಪೈರಿನ ಹೊಲ
ಜಡವಾಗಿ ನಿಂತಿಲ್ಲವೇನು?
ನೋಡುವವರ
ಕಣ್ಣೋಟದಲ್ಲಿದೆ ಬದುಕು!
ಭೂಮಿಯೇ ತಿರುಗುತ್ತಿರುವಾಗ
ಶಿಲಾಪದರದೊಳಗೆ ಬೇರೂರಿ ನಿಂತ
ನಾನು ಜಡವಾಗಿರಲು ಹೇಗೆ ಸಾಧ್ಯ?
ನಾನು ನಿಂತಲ್ಲಿಯೇ ತಿರುಗುತ್ತಿರುವೆ
ಓಡುತ್ತಿರುವೆ ಚಲಿಸುತ್ತಿರುವೆ ಹಾರಾಡುತ್ತಿರುವೆ!
ಧ್ಯಾನಸ್ಥ ಸ್ಥಿತಿಯಲ್ಲಿ ಗುನುಗುತ್ತಿರುವೆ
ಜಡವಿಲ್ಲದೆ ಚಲನೆ ಇಲ್ಲ!
ಚಲನೆ ಇಲ್ಲದೆ ಜಡವಿಲ್ಲ!
ನಾನಿಲ್ಲದೆ ನೀನಿಲ್ಲ,
ನೀನಿಲ್ಲದೆ ನಾನಿಲ್ಲ!
ಸುಪ್ತವಾಗಿ ಜಡದಲ್ಲಿ ಅಡಕವಾಗಿದೆ ಚಲನೆ!
ಚಲನೆಯ ಬದುಕು ಜಡದ ಮೇಲೆಯೇ ನಿಂತಿದೆ!