ಗುರುವಾರ , ಫೆಬ್ರವರಿ 20, 2020
27 °C

ಸ್ವರ್ಗದ ಟಪಾಲು ಕಚೇರಿ

ಕೃಷ್ಣ ದೇವಾಂಗಮಠ Updated:

ಅಕ್ಷರ ಗಾತ್ರ : | |

prajavani

ಸ್ವರ್ಗ ಅನ್ನುವುದೊಂದಿದೆಯಾ
ಇರುವುದನ್ನು ಇಲ್ಲ ಅಂತಲೋ ಇಲ್ಲದುದ ಇದೆ ಅಂತಲೋ
ಹೇಗೆ ಹೇಳುವುದು ಮತ್ತು ಹಾಗೆ ಹೇಳಲು ನಾನು ಯಾರು

ಹೌದು ಸ್ವರ್ಗದಲ್ಲಿ ಟಪಾಲು ಕಚೇರಿ ಇದೆ
ಗಾಳಿಯಲ್ಲಿ ಸೂಕ್ಷ್ಮ ಹುಳುವಿನಂಥ ದೇವರುಗಳು ಸಂಚರಿಸುತ್ತಾರೆ
ನಿಮ್ಮ ಅಹವಾಲುಗಳನ್ನು ಅವರು ನಮೂದಿಸುತ್ತಿರುತ್ತಾರೆ
ಎಷ್ಟು ಚಿಕ್ಕ ವಿಷಯಗಳನ್ನೂ ಬಿಡದೆ ಮನಸ್ಸಿನ ನೇರ
ಜೆರಾಕ್ಸ್ ಪ್ರತಿಯಂತೆ ಮುದ್ದಾದ ಅಕ್ಷರಗಳಲ್ಲಿ ಚಿತ್ರಿಸುವರು
ಟಾಮಿ ನಾಯಿಯ ಮೂಳೆಯ ಕುರಿತು ಹಲ್ಲಿಯ ಲೊಚಗುಟ್ಟು ಆಸೆಯನ್ನು
ಮನುಷ್ಯನ ತೀರಾ ವಾಮ ಕಾಮದ ಬಯಕೆಗಳನ್ನೂ ಕೂಡಾ

ಉಸಿರಿಗುಸಿರು ಸೇರಿಸುವ ಕಲಾ ಪರಿಣತನೊಬ್ಬ
ಈ ಟಪಾಲುಗಳನ್ನು ಸ್ವರ್ಗದ ಅಂಚೆ ಕಚೇರಿಗೆ ಸೇರಿಸುವನು
ರಾತ್ರಿಯ ನಡು ಮಧ್ಯಾಹ್ನದ ಹೊತ್ತಲ್ಲಿ ಕೆಲಸ ಸಾಗುತ್ತದೆ
ಇವ ಎಲ್ಲಾ ಖಾಸಗಿ ಪತ್ರಗಳನ್ನೂ ಓದಿ ಸ್ವತಃ ವಿಮರ್ಶಿಸಿ ತಿದ್ದುತ್ತಾನೆ
ಪಾಪಗಳ ಲೆಕ್ಕ ತಗ್ಗಿಸಿ ನಿಮ್ಮ ಖಾತೆಗೆ ಜಮಾ ಪಾವತಿಸಲು

ದೇವಾಲಯದ ಮಹಾ ದೇವರೆದುರು ಮಂಡಿಯೂರಿ ಪ್ರಾರ್ಥಿಸುವ
ಮನುಷ್ಯನ ಮುಗ್ಧತೆ ದೇವರಿಗೆ ಮೆಚ್ಚುಗೆಯಾಗುವುದಿಲ್ಲ
ಅಸಹಾಯಕ ಸ್ಥಿತಿಯಲ್ಲಿಯೂ ಬೇಡದೆ ಬೀದಿಗಳಲ್ಲಿ ಹಾಡುವ ಕುರುಡರು
ಮೌನದಲ್ಲೇ ಮಾತನಾಡಿ ಸಮಾಧಾನಿಸುವ ಮೂಕರು
ತಮಗೇ ತಿಳಿಯದಂತೆ ಸಹಾಯ ತೋರುವ ಹೃದಯವಂತರು
ನರಕದ ಯಮನಿಗೂ ಪ್ರಿಯವಾಗುತ್ತಾರೆ

ದೇವದೂತರು ಟಪಾಲುಗಳನ್ನು ಓದಿ ಅಳಿಸಿ ಹಾಕುತ್ತಾರೆ
ನಂತರ ದೇವರು ಅವನ್ನು ಹರಿದು ಬಿಸಾಡುತ್ತಾನೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)