ಕವಿತೆ: ನೆನಪುಗಳ ಅಗೆತ
Updated:
ಅಕ್ಷರ ಗಾತ್ರ :ಆ |ಆ |ಆ
ಒಮ್ಮೊಮ್ಮೆ ಹಳೆಯ
ವೇದನೆಗಳು ಮರುಕಳಿಸುತ್ತವೆ
ಥೇಟ್ ಪಳಿಯುಳಿಕೆಗಳಂತೆ
ಕಂಡಷ್ಟೂ
ದಫನ್ ಮಾಡಿಬಿಡಬೇಕು
ಕಂಡರೂ ಕಾಣದಂತೆ ॥
ಆದರೂ ಅಗೆಯ ತೊಡಗುತ್ತೇವೆ
ಮತ್ತೆ ಮತ್ತೆ ಹಳೆ ನೆನಪುಗಳ
ಗೋರಿಯ ಕೆದಕುತ
ದೊರಕುವುದೆಲ್ಲವೂ
ಅರ್ಧಂಬರ್ಧ ಸತ್ಯವೆಂದು
ತಿಳಿದು ತಿಳಿಯದಂತೆ॥
ಬಿಟ್ಟು ಹೋದ ಅನಾಥ
ಭರವಸೆ ಅನಂತ ನಿಟ್ಟುಸಿರುಗಳೂ
ತಂತಾನೆ ಮೀಟ ತೊಡಗಿವೆ
ಹೆಸರಿರದ ಭಾವದಲಿ
ಬಹುಶಃ ಬದುಕು ಮತ್ತೊಮ್ಮೆ
ಮಗ್ಗಲು ಬದಲಾಯಿಸುವಂತೆ॥
ಬರೆಯಿಸಿದ ಮರಣ ಫಲಕಗಳು
ನಾಚಿಕೆಯಿಲ್ಲದೆ ಇನ್ನು
ದಾಖಲಿಸಲಿವೆ ಅರೆ
ಸಹಾನುಭೂತಿ ಪ್ರೀತಿ
ಮಾನವೀಯತೆ ಕೊಂಚವಾದರೂ
ದಕ್ಕಿದ್ದರೆ ಅಲ್ಲಿಗಿಂತ
ಇಲ್ಲೇ ಚೆಂದವಂತೆ ॥
ಮರಳದ ಘಳಿಗೆಗಳ
ಮರಳಿ ನೆನೆಯುತ ಕಾದ
ಒಲೆಯ ಮೇಲೆ ಪದೇ ಪದೇ
ಕುದಿಸುತ ನೆನಪುಗಳು
ಕಾಡಲಿವೆ ಇನ್ನು ಮತ್ತೊಮ್ಮೆ
ಬದುಕು ಮಗ್ಗಲು ಬದಲಿಸುವ ತನಕ॥
ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ
ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.
