ಅಕ್ಷಯರಕ್ಷೆ

ಚಟಪಟ ದಾಳದೊಂದೇ ಉರುಳಲ್ಲಿ ಬಟ್ಟಂ

ಬಯಲಾಗಿತ್ತು ವರ್ಷ ಸರತಿಯ ಪಡುಮನೆ. ರೆಕ್ಕೆ

ಝಾಡಿಸಿ ಹಾರಿಯೇ ಹೋಗಿತ್ತು ಬೆಂಗಟೆಕೊಕ್ಕ

ಸೂರ ಸರಹದ್ದು ನೆರಳ ಹೊಚ್ಚಿದ್ದ ರೆಕ್ಕೆ-

ಯಾಡಿಸುತ ನಿಶ್ಚಿಂತ. ಒಂದೇ ಉರುಳಲ್ಲಿ

ಬಳ ಬಳ ಉದುರಿದವು ಉಟ್ಟಿದ್ದುಡುಪು.

ಹಾಕುತ್ತ ನೆರೆದವರೆದುರು ಬೊಬ್ಬೆ, ಹಿಡಿದರೂ

ಉಟ್ಟಿದ್ದೆಕ್ಕಟಿ ಬಟ್ಟೆ ಗಟ್ಟಿ, ಸೆಳೆದೇ ಸೆಳೆದಿತ್ತು-

 

ಕೆಂಗಿಡಿಯ ಕಿಡಿಮೀಸೆ ಜಗ್ಗಿ ಮೊಲೆಯೊತ್ತಿದ್ದ

ಸೆರಗ ಬೇಡಬೇಡೆಂದೆಷ್ಟೆ ಬಡಕೊಂಡರೂ ಬಿಡ

ದ ಬರ್ಬರತೆ. ಬಡಿಸಿಟ್ಟಿದ್ದ ತಾಟ ಸರಕ್ಕ

ನೆಳೆದುಕೊಂಡರು ಎದುರುಪಂಕ್ತಿಯ ಮಂದಿ-

ಅಂದಾದುಂದಿ. ಐದು ಅತ್ತ್ಯಗ್ರೋನ್ನತ ಸ್ಥಾಣು

ಲಿಂಗದ ನಡುವೆ ತುಂಬದರಕೆಯ ನಿಸ್ಸಂಗ

ಕಣಿವೆ. ಹುಡುಕಿಕೊಂಡಲೆಯುತ್ತಿದ್ದಾರೆ ಪಂಚ

ವಲ್ಲಭರು ಅಕ್ಷಯ ವಸ್ತ್ರವನ್ನ, ಅಕ್ಷಯ

 

ಪಾತ್ರೆಯನ್ನ, ಅಕ್ಷಯ ಸೂರನ್ನ-ಹಿಡಿಬಿತ್ತನೆಗೆ

ಖಂಡುಗ ಕೊಡುವ ಬನಶಂಕರಿಯ ಸಮೃದ್ಧ

ಮಡಿಲಲ್ಲಿ. ರಾತ್ರಿಯಿಡೀ ನಕ್ಷತ್ರ ಮೋಂಬತ್ತಿ

ಮಿನುಗಿಸುವ ಆಕಾಶಚತ್ರದಡಿ. ನಟ್ಟಿರುಳಲ್ಲಿ

ಬೆಳ್ದಿಂಗಳ ನವುರಬಟ್ಟೆ ಮೈತುಂಬ ಹೊದಿಸುವ

ನೀಲಕಾಯನ ಸನ್ನಿಧಾನದಲ್ಲಿ. ಡಾರ್ಜಲಿಂಗಲ್ಲಿ

ಕಾಯುತ್ತಿದ್ದೇವೆ ನಾನೂ ಮತ್ತು ನನ್ನಾಕೆ- ಆಗಿ

ವಿಸ್ಫುರಿತ ಲಿಂಗ, ಪಸೆಯುಕ್ಕುವಾರ್ದ್ರ ಯೋನಿ.

 

ಕಾಂಚನಜುಂಗ ನಿಧನಿಧಾನಕ್ಕಾಗುತ್ತಿದೆ

ಉಟ್ಟಿದ್ದ ಸ್ವರ್ಣಪೀತಾಂಬರ ಮೈಜಾರಿ ನಗ್ನ

ನೀಲಿಮಲಿಂಗ. ಮೇಲಕ್ಕಾಕಾಶ- ಅಕ್ಷಯ

ಸೂರು. ಕೆಳಕ್ಕೆ ನೆಲ- ಅಕ್ಷಯ ಪಾತ್ರೆ. ಯಾವತ್ತೂ

ಸೆಳೆಯಲಾಗದ ವಸ್ತ್ರ ಮೈಮಿದ್ದಿ ಹೊದ್ದಿಸಿದ

ದಿಗ್ಭ್ರಾಂತ ದಿಗ್ಬಟ್ಟೆ.