ಅತ್ಯಾಚಾರ ಪ್ರಕರಣ: ಫ್ರಾನ್ಸ್ ಅಧಿಕಾರಿ ಬಂಧನ

ಬೆಂಗಳೂರು (ಪಿಟಿಐ): ತನ್ನ ಮೂರುವರೆ ವರ್ಷದ ಹೆಣ್ಣು ಮಗುವಿನ ಮೇಲೆ ಅತ್ಯಾಚಾರ ಎಸಗಿದ್ದ ಫ್ರಾನ್ಸ್ ಕಾನ್ಸುಲ್ ಜನರಲ್ ಕಚೇರಿಯ ಹಿರಿಯ ಅಧಿಕಾರಿ ಪಾಸ್ಕಲ್ ಮುಜುರಿಯರ್ ಅವರನ್ನು ಮಂಗಳವಾರ ಪೊಲೀಸರು ಬಂಧಿಸಿದ್ದಾರೆ.

 

ಪಾಸ್ಕಲ್ ಅವರಿಗೆ ಯಾವುದೇ ರಾಜ ತಾಂತ್ರಿಕ ರಕ್ಷಣೆ ಇಲ್ಲ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ಸೋಮವಾರ ತಿಳಿಸಿದ ಬೆನ್ನಲ್ಲೇ ಹೈಗ್ರೌಂಡ್ಸ್ ಠಾಣೆಯ ಪೊಲೀಸರು ದೂರು ದಾಖಲಿಸಿಕೊಂಡು ಅವರನ್ನು ತಮ್ಮ ವಶಕ್ಕೆ ಪಡೆದು ತನಿಖೆ ನಡೆಸುತ್ತಿದ್ದಾರೆ.

 

ಈ ಮಧ್ಯೆ ರಾಜತಾಂತ್ರಿಕ ಪಾಸ್ ಪೋರ್ಟ್ ಹೊಂದಿರದ ಆರೋಪಿ ಪಾಸ್ಕಲ್ ವಿರುದ್ಧ ಭಾರತದ ಕಾನೂನಿನಂತೆ ಯಾವುದೇ ವಿನಾಯತಿ ನೀಡದೆ ಕ್ರಮಗೊಳ್ಳಬಹುದು ಎಂದು ಫ್ರೆಂಚ್ ಸರ್ಕಾರದ ಮೂಲಗಳು ದೆಹಲಿಯಲ್ಲಿ ತಿಳಿಸಿವೆ.

 

ಅಲ್ಲದೇ ಕೇಂದ್ರ ಗೃಹ ಸಚಿವಾಲಯ ಕೂಡ ಕರ್ನಾಟಕ ಪೊಲೀಸರಿಗೆ ಬೆಂಗಳೂರಿನಲ್ಲಿರುವ ಫ್ರಾನ್ಸ್‌ನ ಕಾನ್ಸುಲ್ ಜನರಲ್ ಕಚೇರಿ ಸಂಪರ್ಕಿಸಿ ಆರೋಪಿಯನ್ನು ವಶಕ್ಕೆ ಪಡೆಯುವಂತೆ ಸೂಚಿಸಿತ್ತು.

 

ಪಾಸ್ಕಲ್ ವಿರುದ್ಧ ಅತ್ಯಾಚಾರ ಪ್ರಕರಣ ದಾಖಲಿಸಿರುವ ಅವರ ಪತ್ನಿ ಸುಜಾ ಜೋನ್ಸ್ ಅವರು ಪ್ರಕರಣಕ್ಕೆ ಸಂಬಂಧಿಸಿದಂತೆ ಪ್ರಧಾನಿ ಮನಮೋಹನ್ ಸಿಂಗ್ ಹಾಗೂ ವಿದೇಶಾಂಗ ಸಚಿವ ಎಸ್.ಎಂ.ಕೃಷ್ಣ ಅವರು ಮಧ್ಯೆಪ್ರವೇಶಿಸಿ ನನಗೆ ನ್ಯಾಯ ದೊರಕಿಸಿಕೊಡಬೇಕು. ಪ್ರಕರಣದ ಕಾನೂನು ಪ್ರಕ್ರಿಯೆಗಳು ಮುಗಿಯುವವರೆಗೂ ಆರೋಪಿಯನ್ನು ದೇಶದಿಂದ ಹೊರಹೋಗದಂತೆ ನಿರ್ಬಂಧಿಸಬೇಕು. ಹಾಗೂ ಫ್ರೆಂಚ್ ಪೌರತ್ವ ಹೊಂದಿರುವ ಮೂರು ಮಕ್ಕಳನ್ನು ಪಾಸ್ಕಲ್‌ನಿಂದ ತನ್ನ ವಶಕ್ಕೆ ಕೊಡಿಸಬೇಕೆಂದು ಮನವಿ ಮಾಡಿಕೊಂಡಿದ್ದಾರೆ.



`ಪತಿ ಪಾಸ್ಕಲ್ ಅವರು ಮಗುವಿನ ಮೇಲೆ ಒಂದೂವರೆ ವರ್ಷದಿಂದ ಹಲವು ಬಾರಿ ಅತ್ಯಾಚಾರ ಎಸಗಿದ್ದಾರೆ. ಆದ್ದರಿಂದ ಅವರ ವಿರುದ್ಧ ಕ್ರಮ ಕೈಗೊಳ್ಳಿ` ಎಂದು ಆರೋಪಿಸಿ ಪಾಸ್ಕಲ್ ಪತ್ನಿ ಸುಜಾ ಜೋನ್ಸ್ ಅವರು ನಗರದ ಹೈಗ್ರೌಂಡ್ಸ್ ಠಾಣೆಯಲ್ಲಿ ಜೂ.14ರಂದು ಪ್ರಕರಣ ದಾಖಲಿಸಿದ್ದರು.



ಪಾಸ್ಕಲ್, ಕೇರಳ ಮೂಲದ ಸುಜಾ ಜೋನ್ಸ್ ಅವರನ್ನು 2001ರ ಅಕ್ಟೋಬರ್‌ನಲ್ಲಿ ಮದುವೆಯಾಗಿದ್ದರು. ದಂಪತಿಗೆ ಮೂವರು ಮಕ್ಕಳಿದ್ದಾರೆ. ನಾಲ್ಕು ವರ್ಷಗಳ ಹಿಂದೆ ನಗರಕ್ಕೆ ಬಂದಿದ್ದ ಪಾಸ್ಕಲ್ ಪತ್ನಿ ಮತ್ತು ಮಕ್ಕಳೊಂದಿಗೆ ವಸಂತನಗರದ ಅಪಾರ್ಟ್‌ಮೆಂಟ್‌ನಲ್ಲಿ ವಾಸವಾಗಿದ್ದಾರೆ.