ಗ್ರ್ಯಾವಿಟಿಗೆ ಏಳು ಆಸ್ಕರ್‌

ಲಾಸ್‌ ಏಂಜಲಿಸ್‌ (ಪಿಟಿಐ): ಅಮೆ­ರಿಕದ ಕಪ್ಪುವರ್ಣೀಯರ ಗುಲಾಮ­ಗಿರಿ,  ಯಾತನಾ­ಮಯ ಹೋರಾ­ಟದ ಕರಾಳ  ಮುಖಗಳನ್ನು  ಮೊದಲ ಬಾರಿಗೆ ಬೆಳ್ಳಿತೆರೆಯ ಮೇಲೆ ಬಿಡಿ­ಸಿಟ್ಟ ಸ್ಟೀವ್‌ ಮ್ಯಾಕ್‌ ಕ್ವೀನ್ಸ್‌ ನಿರ್ದೇ­­ಶನದ ‘12 ಇಯರ್‍ಸ್‌ ಎ ಸ್ಲೇವ್‌’ ಚಿತ್ರ ಪ್ರಸಕ್ತ ವರ್ಷದ ಅತ್ಯು­ತ್ತಮ ಇಂಗ್ಲಿಷ್‌ ಚಿತ್ರ ಎಂಬ ಹೆಗ್ಗಳಿಕೆಗೆ  ಪಾತ್ರ­ವಾಗಿದ್ದು, ಪ್ರತಿ­ಷ್ಠಿತ ಆಸ್ಕರ್‌ ಪ್ರಶಸ್ತಿ ಬಾಚಿಕೊಂಡಿದೆ.



ಕಪ್ಪುವರ್ಣೀಯ ನಿರ್ದೇಶಕ­ರೊ­ಬ್ಬರು ನಿರ್ದೇಶಿಸಿದ ಚಿತ್ರವೊಂದು ಇದೇ ಮೊದಲ ಬಾರಿಗೆ ಆಸ್ಕರ್‌ ಪ್ರಶಸ್ತಿ ಪಡೆ­ಯುವ ಮೂಲಕ ಇತಿಹಾಸ ಸೃಷ್ಟಿಸಿದೆ.



ಹಾಲಿವುಡ್‌ ಚಿತ್ರರಂಗ ಶತಮಾನ­ಗ­­ಳಿಂದ ಕಡೆಗಣಿಸುತ್ತಲೇ ಬಂದ ಅಮೆ­ರಿಕದ  ಕಪ್ಪುವರ್ಣೀಯರ ಗುಲಾಮ­ಗಿರಿ­­ಯಂ­ತಹ ಗಂಭೀರ ಮತ್ತು  ನಿರ್ಲ­ಕ್ಷಿತ ವಿಷಯ­ವನ್ನು  ಆಯ್ಕೆ ಮಾಡಿ­ಕೊಂಡ ಸ್ಟೀವ್‌ ಸುಂದರವಾಗಿ ಕಟ್ಟಿ­ಕೊಟ್ಟಿ­ದ್ದಾರೆ. ಲಾಸ್‌ ಏಂಜಲೀಸ್‌­ನಲ್ಲಿ ನಡೆದ ೮೬ನೇ ಆಸ್ಕರ್‌ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ  ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ 44 ವರ್ಷದ  ಸ್ಟೀವ್‌, ಅಮೆರಿಕದಲ್ಲಿ ಇನ್ನೂ ಎರಡು ಕೋಟಿ ಜನರು ಗುಲಾಮ­ರಾಗಿ­ದ್ದಾರೆ. ಗುಲಾಮ­ಗಿರಿಯ ನೋವನ್ನು ಉಂಡ­ವರಿಗೆ  ತಮ್ಮ ಚಿತ್ರದ ಪ್ರಶಸ್ತಿಯನ್ನು ಅರ್ಪಿ­ಸುವುದಾಗಿ ಹೇಳಿದರು.



ಬಾಹ್ಯಾಕಾಶದಲ್ಲಿ ನಡೆಯುವ ದುರಂತ ನಾಟಕೀಯ ಘಟನೆಗಳನ್ನು ಕುತೂಹಲ­ಕಾರಿ­ಯಾಗಿ ಚಿತ್ರಿಸಿದ ‘ಗ್ರ್ಯಾವಿಟಿ’ 3ಡಿ ಚಿತ್ರ ವಿವಿಧ ವಿಭಾಗ­ಗಳಲ್ಲಿ ಏಳು ಪ್ರಶಸ್ತಿಗಳನ್ನು ತನ್ನ­ದಾಗಿಸಿ­­­­ಕೊಂಡಿದೆ. ಉತ್ತಮ ನಿರ್ದೇ­ಶಕ ಪ್ರಶಸ್ತಿ ಕೂಡಾ ‘ಗ್ರ್ಯಾವಿಟಿ’ ನಿರ್ದೇ­ಶಕ ಅಲ್ಫಾನ್ಸೋ ಕ್ಯೂರಾನ್‌ ಅವರ ಪಾಲಾಗಿದೆ. ಈ ಚಿತ್ರದಲ್ಲಿ ಉನ್ನತ ತಾಂತ್ರಿಕ ಪರಿಣತಿ­ಯನ್ನು ತೆರೆ ಮೇಲೆ ಅನಾ­ವರಣ­­ಗೊಳಿಸಿಸುವ ಮೂಲಕ 52 ವರ್ಷದ ಕ್ಯೂರಾನ್‌ ಪ್ರೇಕ್ಷ­ಕ­­ರನ್ನು ಮಂತ್ರ ಮುಗ್ಧ­ರನ್ನಾ­ಗಿಸಿ­ದ್ದರು.



ವೂಡಿ ಅಲೆನ್ಸ್‌ ನಿರ್ದೇಶನದ ‘ಬ್ಲೂ ಜಾಸ್ಮಿನ್‌’ ಚಿತ್ರದಲ್ಲಿ ಹತಾಶ ಶ್ರೀಮಂತ ಮಹಿಳೆಯ ಪಾತ್ರವನ್ನು ಮನೋಜ್ಞ­ವಾಗಿ ಅಭಿನಯಿಸಿದ ನಟಿ ಕೇಟ್‌ ಬ್ಲಾಂಚೆಟ್‌ ‘ಉತ್ತಮ ನಟಿ’ ಪ್ರಶಸ್ತಿ ಪಡೆದಿದ್ದಾರೆ.



ಏಡ್ಸ್‌ ಜಾಗೃತಿಗಾಗಿ ಹೋರಾಡು­ತ್ತಿ­ರುವ ಸಾಮಾಜಿಕ ಕಾರ್ಯಕರ್ತ ರಾನ್‌ ವೂಡ್‌ರೂಫ್‌ ನೈಜ ಜೀವನ  ಕಥೆ­ಯನ್ನು ಆಧರಿಸಿದ ಚಿತ್ರದ ಅಭಿನಯ­ಕ್ಕಾಗಿ  ನಾಯಕ ನಟ ಮ್ಯಾಥ್ಯೂ ಮ್ಯಾಕ್‌ ಕೊನಾಗ್‌ ‘ಉತ್ತಮ ನಟ’ ಪ್ರಶಸ್ತಿ ಬಾಚಿಕೊಂಡಿದ್ದಾರೆ.



  ‘12 ಇಯರ್‍ಸ್‌ ಎ ಸ್ಲೇವ್‌’ ಚಿತ್ರದ ಅಭಿನಯಕ್ಕಾಗಿ ಲುಪಿಟಾ ನ್ಯಾಂಗೊ ಉತ್ತಮ ಪೋಷಕ ನಟಿ ಪ್ರಶಸ್ತಿ ಪಡೆದರು. ಪತ್ರಕರ್ತನ ಜೀವನ ಕುರಿತಾದ ಇಟಲಿಯ ‘ದಿ ಗ್ರೇಟ್‌ ಬ್ಯೂಟಿ’ ವಿದೇಶಿ ಚಿತ್ರಗಳ ವಿಭಾಗದ ಪ್ರಶಸ್ತಿ ಪಡೆಯಿತು.ಇದಕ್ಕೂ ಮೊದಲು ಈ ವಿಭಾಗದಲ್ಲಿ ಇಟಲಿಯ  27 ಚಿತ್ರಗಳು ಪ್ರಶಸ್ತಿ ಪಡೆದಿವೆ.



  ಭಾರತದ ಗುಜರಾತಿ ಚಿತ್ರ ‘ದಿ ಗುಡ್‌ ರೋಡ್‌’ ವಿದೇಶಿ ವಿಭಾಗ ಚಿತ್ರದಲ್ಲಿ ಪ್ರವೇಶ ಪಡೆದಿತ್ತು. ಆದರೆ, ಪೈಪೋಟಿ ನೀಡಲು ಅದು ವಿಫಲವಾಯಿತು.