ಜಪಾನ್ ಸುರಕ್ಷಿತ; ಪುನಃ ಚೇತರಿಕೆ

ನವದೆಹಲಿ (ಐಎಎನ್‌ಎಸ್): `ಅಣು ಸೋರಿಕೆ, ಸುನಾಮಿ ಮತ್ತು ಭೂಕಂಪದಿಂದ ತತ್ತರಿಸಿದ್ದ ತಮ್ಮ ದೇಶ ಈಗ ಮತ್ತಷ್ಟು ಸುರಕ್ಷಿತ ಮತ್ತು ಚೇತರಿಸಿಕೊಂಡಿದೆ~ ಎಂದು ಭಾರತದಲ್ಲಿನ ಜಪಾನ್ ರಾಯಭಾರಿ ಅಕಿಟಾಕ್ ಸೇಕಿ ಹೇಳಿದ್ದಾರೆ.



ಜಪಾನ್‌ನಲ್ಲಿ ಸಂಭವಿಸಿದ್ದ ಸುನಾಮಿ ಮತ್ತು ಭೂಕಂಪಕ್ಕೆ ಒಂದು ವರ್ಷ ಸಂದ ಬಳಿಕ ಭಾನುವಾರ ಇಲ್ಲಿ ನಡೆದ ಪ್ರಥಮ ವಾರ್ಷಿಕೋತ್ಸವದಲ್ಲಿ ಮಾತನಾಡಿದ ಅವರು, `ಈ ದುರಂತದಲ್ಲಿ ಸುಮಾರು 15 ಸಾವಿರ ಜನರು ಮೃತರಾಗಿದ್ದಾರೆ. ಘಟನೆ ಬಳಿಕ ಪುನ ರುಜ್ಜೀವನಗೊಂಡಿರುವ ದೇಶವನ್ನು ಕಣ್ಣಾರೆ ನೋಡಲು ಜಪಾನ್‌ಗೆ ಹೋಗಿ~ ಎಂದರು.



`ದುರಂತದ ಬಳಿಕ 71,124 ಜನರನ್ನು ಸ್ಥಳಾಂತರಿಸಲಾಗಿದ್ದು, ತಮ್ಮ ದೇಶ ಅತೀ ಬೇಗ ಸುಧಾರಿಸಿದೆ~ ಎಂದು ಹೇಳಿದರು. `ಜಪಾನ್‌ನಲ್ಲಿ ದುರಂತ ಸಂಭವಿಸಿದಾಗ ಭಾರತ ಸಹಾಯ ಹಸ್ತ ಚಾಚಿದ್ದು, ಪರಿಹಾರ ಕಾರ್ಯಕ್ಕೆ ದೇಣಿಗೆ ನೀಡಿದೆ~ ಎಂದು ಶ್ಲಾಘಿಸಿದರು.



ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪ್ರಾಧಿಕಾರದ ಉಪಾಧ್ಯಕ್ಷ ಶಶಿಧರ ರೆಡ್ಡಿ ಮಾತನಾಡಿ, ಜಪಾನ್ ಜನರಿಗೆ ಭಾರತೀಯರ ಬೆಂಬಲ ಇದೆ ಎಂದರು. ಇದೇ ಸಂದರ್ಭದಲ್ಲಿ ವಸ್ತು ಪ್ರದರ್ಶನ ಏರ್ಪಡಿಸಲಾಗಿತ್ತು.