ಭಾರವಾದ ತೆಂಗು, ನಿರೀಕ್ಷೆಯಲ್ಲಿ ರಾಗಿ

ತುಮಕೂರು: ಆ ವ್ಯಾಪಾರಿ ಸೇಬಿನ ಕುರಿತು ಮಾತನಾಡ ತೊಡಗಿದರು. ಮಾರುಕಟ್ಟೆ ಪ್ರಾಂಗಣದ ಗೋದಾಮು­ಗಳಲ್ಲಿ ರಾಶಿರಾಶಿಯಾಗಿ ಒಟ್ಟಿದ್ದ  ತೆಂಗಿನಕಾಯಿ ಕುರಿತು ಕೇಳಿದರೆ ಅವರು ಸೇಬು ಬಂದಿದ್ದರೆ ಒಂದಿಷ್ಟು ತೆಂಗು ಬಿಕರಿಯಾಗುತ್ತಿದ್ದ ಕನಸಿಗೆ ಬಿದ್ದರು. ಕಲ್ಪತರು ನಾಡಿನ ತೆಂಗಿನಕಾಯಿಗೂ ದೆಹಲಿಗೂ ಸಂಬಂಧವಿರುವಂತೆ, ಇಲ್ಲಿ ತಿನ್ನುವ ಸೇಬಿಗೂ ತೆಂಗಿನ ಮಾರಾಟಕ್ಕೂ ನಂಟಿದೆ.

ದೆಹಲಿಯಿಂದ ಸೇಬು ತುಂಬಿ­ಕೊಂಡು ಬರುವ ಲಾರಿಗಳು ಈ ಕಡೆಯಿಂದ ಖಾಲಿ ಹೋಗುವ ಬದಲಿಗೆ ಚೌಕಾಶಿ ಬಾಡಿಗೆಗೆ ತೆಂಗಿನ ಕಾಯಿ ತುಂಬಿಕೊಂಡು ಹೋಗುತ್ತವೆ. ಬಾಡಿಗೆಯಲ್ಲಿ ಸ್ವಲ್ಪ ಹಣ ಉಳಿದರೆ ಸಾಗಾಟ ವೆಚ್ಚ ಕಡಿಮೆಯಾಗಿ ದೆಹಲಿಯಲ್ಲಿ ತೆಂಗಿನಕಾಯಿಗೆ ಬೆಲೆ ಕಡಿಮೆ ಸಿಕ್ಕರೂ ಮಾರಲಾಗುತ್ತದೆ.



ದೆಹಲಿಗೆ ಲಾರಿಯೊಂದಕ್ಕೆ ₨ 75 ಸಾವಿರ ಬಾಡಿಗೆ ನೀಡಬೇಕು. ಇದರಲ್ಲಿ ₨ 20 ಸಾವಿರ ಕಡಿಮೆಯಾದರೂ ಆ ಮಟ್ಟಿಗೆ ತೆಂಗಿನಕಾಯಿ ಹೆಚ್ಚು ಮಾರಾಟವಾಯಿತೆಂದೇ ಮಾರಾಟಗಾರರ ಲೆಕ್ಕಾಚಾರ.



ಮಾರುಕಟ್ಟೆಯ ಸರಪಳಿ ಸಂಬಂಧಗಳ ಲೆಕ್ಕಾಚಾರ ಏನೇ ಇರಲಿ, ಈ ವಾರದ ಮಾರುಕಟ್ಟೆ ಬೆಲೆಯಲ್ಲಿ ಸ್ಥಿತಂತರ ಕಂಡುಬರಲಿಲ್ಲ. ಅತ್ಯಲ್ಪ ಬದಲಾವಣೆ ಬಿಟ್ಟರೆ ಕಳೆದ ವಾರದ ಮಾರುಕಟ್ಟೆ ದರದಲ್ಲಿ ಹೆಚ್ಚು ಬದಲಾವಣೆ ಕಾಣಲಿಲ್ಲ. ದೆಹಲಿಯಲ್ಲಿ ಚಳಿ ಹೆಚ್ಚುತ್ತಿರುವ ಕಾರಣ ತೆಂಗಿನಕಾಯಿ ಮಾರುಕಟ್ಟೆ­ಯಲ್ಲಿ ಹಿಂಜರಿಕೆ ಕಂಡು ಬಂದರೂ ಬೆಲೆಯಲ್ಲಿ ಇಳಿಕೆ ಕಾಣಲಿಲ್ಲ. ಕಾಯಿಯೊಂದಕ್ಕೆ ಬೆಲೆ ₨ 9–11ರ ವರೆಗೂ ಇತ್ತು. ತಾಂಬೂಲ ಕಾಯಿಗೆ ದೊಡ್ಡ­ಬಳ್ಳಾಪುರದ ವರ್ತಕರಿಂದ ಬೇಡಿಕೆ ಬಂದಿರುವುದ­ರಿಂದ ಬೆಲೆಯಲ್ಲಿ ಸ್ಥಿರತೆ ಕಾಪಾಡಿಕೊಂಡಿತು.

ಕೊಬ್ಬರಿ ಸ್ಥಿರತೆ: ಕೊಬ್ಬರಿ ಬೆಲೆಯಲ್ಲಿ ಸ್ಥಿರತೆ ಕಂಡುಬಂತು. ವಾರ ಪೂರ ತಿಪಟೂರು ಮಾರುಕಟ್ಟೆಯಲ್ಲಿ ಕ್ವಿಂಟಲ್‌ಗೆ ₨ 6900–7130 ಇತ್ತು.



ಬೆಂಬಲ ಬೆಲೆ ನಿರೀಕ್ಷೆಯಲ್ಲಿ ರಾಗಿ: ರಾಗಿ ಬೆಲೆಯಲ್ಲಿ ಸುಧಾರಣೆ ಕಾಣಲಿಲ್ಲ. ಬೆಂಬಲ ಬೆಲೆಯಲ್ಲಿ ರಾಗಿ ಕೊಳ್ಳುವುದಾಗಿ ಸರ್ಕಾರ ಪ್ರಕಟಿಸಿದೆ.  ಇದಕ್ಕೆ ಮಾರುಕಟ್ಟೆ ಪ್ರತಿಕ್ರಿಯೆ ಕಾದು ನೋಡಬೇಕು.

ಬಣ್ಣ ಕಳೆದುಕೊಂಡ ಕಪ್ಪು ರಾಗಿ ಬೆಲೆ ಕ್ವಿಂಟಲ್‌ಗೆ ₨ 1440–1450 ಇತ್ತು. ಗುಣಮಟ್ಟದ ಕೆಂಪು ಬಣ್ಣದ ರಾಗಿ ಬೆಲೆ ₨ 1500–1600ಕ್ಕೆ ಬಂದು ನಿಂತಿತು.



ಸುಧಾರಿಸದ ಶೇಂಗಾ

ಶೇಂಗಾ ಬೆಲೆಯಲ್ಲೂ ಸುಧಾರಣೆ ಕಾಣಲಿಲ್ಲ. ಮಾರುಕಟ್ಟೆಗೆ ಬರುತ್ತಿರುವ ಶೇಂಗಾ ಗುಣಮಟ್ಟ­ದಿಂದ ಕೂಡಿಲ್ಲ. ಇದರ ನಡುವೆ ಶೇಂಗಾ ಬೀಜದ ದರ ಇಳಿದಿರುವ ಕಾರಣ ಶೇಂಗಾ ಬೆಲೆಯಲ್ಲಿ ಚೇತರಿಕೆ ಕಾಣದಿರಲು ಕಾರಣ ಎಂದು ಹೇಳಲಾಗುತ್ತಿದೆ. ಕ್ವಿಂಟಲ್‌ಗೆ ₨ 3300–4000 ಬೆಲೆ ಇತ್ತು. 



ಮುಸುಕಿನ ಜೋಳ ಮಾರುಕಟ್ಟೆಯಲ್ಲಿ ಕ್ವಿಂಟಲ್‌ಗೆ ₨ 1000–1130 ಇದ್ದರೆ ಕೆಎಂಎಫ್‌ ಗುಣಮಟ್ಟದ ಜೋಳವನ್ನು ₨ 1300ಕ್ಕೆ ಕೊಳ್ಳುತ್ತಿದೆ.