ಮುನಿದ ಮುಂಗಾರು ಮಳೆ: ತಾಳ ತಪ್ಪಿದ ಬಿತ್ತನೆ

ಶ್ರೀನಿವಾಸಪುರ : ತಾಲ್ಲೂಕಿನಲ್ಲಿ ಮಳೆ ಕೊರತೆಯಿಂದಾಗಿ ಮುಂಗಾರು ಬಿತ್ತನೆ ತಾಳ ತಪ್ಪಿದೆ. ತಾಲ್ಲೂಕಿನ ಮಾವು ಬೆಳೆಯುವ ಪ್ರದೇಶದಲ್ಲಿ ಇನ್ನೂ ಉಳುಮೆ ಕಾರ್ಯವೇ ನಡೆದಿಲ್ಲ. ಅಲ್ಪ ಮಳೆಗೆ ಅಪರೂಪಕ್ಕೆ ರಾಗಿ ಬಿತ್ತನೆ ಮಾಡಿದ ಕಡೆ ಪೈರಿಗೆ ಗುಂಟುವೆ ಹಾಕಲಾಗುತ್ತಿದೆ. ಉತ್ತರದ ಗುಡ್ಡಗಾಡು ಪ್ರದೇಶದಲ್ಲಿ ನೆಲಗಡಲೆ ಬಿತ್ತನೆ ಕಾರ್ಯ ಮುಗಿದಿದೆ.

ತಾಲ್ಲೂಕಿನಲ್ಲಿ ಈ ಮಧ್ಯೆ ಮೋಡ ಮುಸುಕಿದ ವಾತಾವರಣ ಹಾಗೂ ಚಳಿ- ಗಾಳಿ ಸಾಮಾನ್ಯವಾಗಿದೆ. ಆಗೊಮ್ಮೆ ಈಗೊಮ್ಮೆ ಅಪರೂಪಕ್ಕೆ ಹನಿಯುವ ಮಳೆ ಬೀಸುವ ಗಾಳಿಯೊಂದಿಗೆ ಹಾರಿ ಹೋಗುತ್ತಿದೆ. ಕನಿಷ್ಠ ನೆಲವಾದರೂ ತೇವಗೊಳ್ಳುತ್ತಿಲ್ಲ. ಈ ಪರಿಸ್ಥಿತಿಯಿಂದಾಗಿ ಉಳುಮೆ ಕಾರ್ಯ ನೆನೆಗುದಿಗೆ ಬಿದ್ದಿದೆ. ಮಾವಿನ ಸುಗ್ಗಿ ಮುಗಿದ ಕೂಡಲೇ ತೋಟ ಉಳುಮೆ ಮಾಡಿ ರಾಗಿ, ಅವರೆ, ತೊಗರಿ ಬಿತ್ತುವುದು ವಾಡಿಕೆ. ಆದರೆ ಅಂತಹ ಚಟುವಟಿಕೆ ಕಂಡುಬರುತ್ತಿಲ್ಲ. ಕೆಲವು ಕಡೆ ಜಮೀನಲ್ಲಿ ಹಾಕಿದ ಕೊಟ್ಟಿಗೆ ಗೊಬ್ಬರದ ರಾಶಿ ಹಾಗೆಯೇ ಉಳಿದಿದೆ.

ಸಂತೆಗಳಿಗೆ ಬಿತ್ತನೆ ಬೀಜ ಮಾರಾಟಗಾರರು ಅವರೆ, ತೊಗರಿ, ಜೋಳ, ಹುಚ್ಚೆಳ್ಳು, ಹುರುಳಿ ಮುಂತಾದ ದವಸ- ಧಾನ್ಯ ತಂದು ಅಂಗಡಿ ಇಡುತ್ತಿದ್ದಾರೆ. ಬೀಜದ ಬೆಲೆಯೂ ದುಬಾರಿ. ಆದರೆ ಕೊಳ್ಳುವವರು ಮಾತ್ರ ಇಲ್ಲ. ಮಳೆ ಸುರಿದರೆ ಬಿತ್ತನೆ ಬೀಜಕ್ಕೆ ಬೇಡಿಕೆ ಬರುತ್ತದೆ. ಇಲ್ಲವಾದರೆ ಕೇಳುವವರು ಇರುವುದಿಲ್ಲ ಎನ್ನುತ್ತಾರೆ ಬೀಜ ವ್ಯಾಪಾರಿಗಳು.

ಮೊದಲು ಸುರಿದ ಮಳೆಗೆ ಜಾನುವಾರು ಮೇವಿನ ಸಮಸ್ಯೆ ನಿವಾರಣೆ ಆಗಲೆಂದು ಗೋವಿನ ಜೋಳ, ಮುಸುಕಿನ ಜೋಳ ಬಿತ್ತನೆ ಮಾಡಲಾಗಿದೆ. ಮೊಳಕೆ ಬಂದು ಪೈರು ಒಂದೆರಡು ಅಡಿ ಎತ್ತರ ಬೆಳೆದಿದೆ. ಆದರೆ ಮಳೆ ಇಲ್ಲದೆ ಒಣಗುತ್ತಿದೆ. ಇದರಿಂದಾಗಿ ಜಾನುವಾರು ಹಸಿರು ಮೇವಿನ ಸಮಸ್ಯೆ ಜೀವಂತವಾಗಿದೆ. ಗ್ರಾಮೀಣ ಪ್ರದೇಶದ ಮಹಿಳೆಯರು ಬೆಳಿಗ್ಗೆ ಎದ್ದು ಹಸಿ ಹುಲ್ಲು ಸಂಗ್ರಹಕ್ಕೆ ಹೊರಡುವುದು ಸಾಮಾನ್ಯ ದೃಶ್ಯವಾಗಿದೆ. ದೂರ ಪ್ರದೇಶಗಳಿಗೆ ಹೋಗುವ ಈ ಮಂದಿ ಮಧ್ಯಾಹ್ನದ ಹೊತ್ತಿಗೆ ಒಂದಷ್ಟು ಹುಲ್ಲನ್ನು ಸಂಗ್ರಹಿಸಿಕೊಂಡು ಬರುತ್ತಾರೆ. ಕೆಲವರು ಸೈಕಲ್ ಮೇಲೆ ಹುಲ್ಲು ಹೇರಿಕೊಂಡು ಬರುತ್ತಾರೆ. ಭೋರ್ಗರೆಯುವ ಗಾಳಿಯಲ್ಲಿ ಹುಲ್ಲು ಹೊತ್ತು ಬರುವುದು ಸಾಹಸವೇ ಸರಿ.

ಒಣ ಹುಲ್ಲಿನ ಸಂಗ್ರಹ ಮುಗಿದಿದ್ದು, ಹಸಿರು ಹುಲ್ಲು ನಿರೀಕ್ಷಿತ ಪ್ರಮಾಣದಲ್ಲಿ ಸಿಗದಿರುವುದರಿಂದ ರೈತರು ಅರಳಿ, ಬೇವು, ಗೋಣಿ, ಆಲ ಮುಂತಾದ ಮರಗಳಿಂದ ಸೊಪ್ಪನ್ನು ಕೊಯ್ದು ತಂದು ದನಗಳಿಗೆ ಹಾಕುತ್ತಿದ್ದಾರೆ. ಸೀಮೆ ಹಸುಗಳಿಗೆ ಜೋಳದ ದಂಟು ಖರೀದಿಸಿ ತಂದು ಹಾಕಲಾಗುತ್ತಿದೆ.

ಇನ್ನು ಗದ್ದೆ ಬಯಲಿನ ಬೇಸಾಯ ನಿಂತುಹೋಗಿದೆ. ಕೆರೆಗಳಲ್ಲಿ ಹೂಳು ತುಂಬಿ ನೀರು ನಿಲ್ಲುವ ಸಾಮರ್ಥ್ಯ ಕುಸಿದ ಮೇಲೆ ಭತ್ತದ ಬಿತ್ತನೆ ಮರೆತು ಹೋಗಿದೆ. ಕೆಲವು ಕಡೆ ರಾಗಿ ಬಿತ್ತಿದರೆ, ಮತ್ತೆ ಕೆಲವು ಕಡೆ ನೀಲಗಿರಿ ಮರ ಬೆಳೆಸಲಾಗಿದೆ. ಕೆಲವು ಗದ್ದೆಗಳಲ್ಲಿ ರೈತರ ನಿರ್ಲಕ್ಷ್ಯದಿಂದಾಗಿ ಮುಳ್ಳು ಪೊದೆಗಳು ಬೆಳೆದು ನಿಂತಿವೆ.

ಅಂತರ್ಜಲ ಕುಸಿತದಿಂದಾಗಿ ಕೊಳವೆ ಬಾವಿಗಳಲ್ಲಿ ನೀರು ಬತ್ತಿಹೋದ ಮೇಲೆ ರೈತರು ಹತಾಶೆಯಿಂದ ಸಾಂಪ್ರದಾಯಿಕ ಹೊಲ ಪದ್ಧತಿಗೆ ಶರಣಾಗುತ್ತಿದ್ದಾರೆ. ನಾವು ತೋಟದ ಬೆಳೆ ಇಡುತ್ತಿದ್ದೆವು. ಟೊಮೆಟೊ, ಆಲೂಗಡ್ಡೆ, ಕೋಸು ಮುಂತಾದ ತರಕಾರಿ ಬೆಳೆಯುತ್ತಿದ್ದೆವು. ರೇಷ್ಮೆ ಹುಳು ಸಾಕಾಣಿಕೆ ಮಾಡುವುದೂ ಇತ್ತು. ಆದರೆ ತೋಟಕ್ಕೆ ಆಸರೆಯಾಗಿದ್ದ ಕೊಳವೆ ಬಾವಿ ಕೈಕೊಟ್ಟಿತು. ಅನಂತರ ನೀರು ಪಡೆಯುವ ಆಸೆಯಿಂದ 8 ಕೊಳವೆ ಬಾವಿ ಕೊರೆಸಿದ್ದಾಯಿತು. ಸಾಲ ಹೆಚ್ಚಿತೇ ವಿನಾ ನೀರು ಸಿಗಲಿಲ್ಲ. ದಿಕ್ಕು ಕಾಣದೆ ಸಾಂಪ್ರದಾಯಿಕ ಪದ್ಧತಿಯಲ್ಲಿ ರಾಗಿ ಬಿತ್ತಿದ್ದೇನೆ. ಕಾಲ ಕಾಲಕ್ಕೆ ಮಳೆ ಆದರೆ ಪರವಾಗಿಲ್ಲ. ಇಲ್ಲವಾದರೆ ದೇವರೇ ಕಾಪಾಡಬೇಕು ಎಂದವರು ರೈತ ಕಿತ್ತಂಡೂರು ರಮೇಶ್.

ರಮೇಶ್ ಆಡಿದ ಮಾತು ಎಲ್ಲ ಸಾಮಾನ್ಯ ರೈತರ ಪ್ರತಿಧ್ವನಿಯಾಗಿದೆ. ಈ ಪರಿಸ್ಥಿತಿ ಶಾಶ್ವತ ನೀರಾವರಿ ಪಡೆಯಲು ಹಂಬಲಿಸುವಂತೆ ಮಾಡಿದೆ. ಶಾಶ್ವತ ನೀರಾವರಿ ಯೋಜನೆ ಜಾರಿ ದಿನ ಬೆಳಗಾಗುವುದರಲ್ಲಿ ಆಗುವುದಲ್ಲ. ಅದಕ್ಕಾಗಿ ಕಾಯಬೇಕು. ಎಷ್ಟು ದಿನ ಕಾಯಬೇಕು ಎಂಬುದು ಹೇಳಲಾಗದ ವಿಷಯ. ಆವರೆಗೆ ಈಸಬೇಕು ಈಸಿ ಜಯಿಸಬೇಕು ಎಂಬ ಮಾತಿಗೆ ಕಟ್ಟುಬಿದ್ದು ದುಡಿಯಬೇಕು. ದುಡಿತಕ್ಕೆ ತಕ್ಕ ಪ್ರತಿಫಲ ಸಿಗುತ್ತಿಲ್ಲ ಎಂಬ ಕೊರಗು ಕಾಡುತ್ತಿದೆ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಮುನಿದ ಮುಂಗಾರು ಮಳೆ: ತಾಳ ತಪ್ಪಿದ ಬಿತ್ತನೆ

ಚಿನಕುರುಳಿ: 03 ಜುಲೈ 2025 ಗುರುವಾರ

ಚುರುಮುರಿ | ಬದಲಾವಣೆ ಕ್ರಾಂತಿ!

ಧರ್ಮಪುರ: ಜಂಬೂ ನೇರಳೆಯಿಂದ ಕಾಲು ಕೋಟಿ ಆದಾಯ

ಹೃದಯಾಘಾತ: ಕೋವಿಡ್ ಲಸಿಕೆ ಬಗ್ಗೆ ಸಿದ್ದರಾಮಯ್ಯ ಹೇಳಿಕೆ ಖಂಡಿಸಿದ ಕಿರಣ್ ಮಜುಂದಾರ್

ಜಾವೆಲಿನ್‌ ಥ್ರೊ ಕೂಟ: ಬೆಂಗಳೂರಿನಲ್ಲಿ ಕಣಕ್ಕಿಳಿಯಲು ನೀರಜ್ ಉತ್ಸುಕ

ಬ್ಯಾಡ್ಮಿಂಟನ್: ಕ್ವಾರ್ಟರ್‌ಗೆ ಶ್ರೀಕಾಂತ್‌

ಚೆಸ್‌: ಮುನ್ನಡೆ ಹಂಚಿಕೊಂಡ ಗುಕೇಶ್‌

ವಿಂಬಲ್ಡನ್‌ ಟೆನಿಸ್‌ ಟೂರ್ನಿ: ಎರಡನೇ ಸುತ್ತಿಗೆ ಬಾಲಾಜಿ– ವರೆಲಾ

ಒಳನೋಟ: ಸೋರುವ ಕೊಠಡಿಯಲ್ಲೇ ಕಲಿಕೆ!

ಒಳನೋಟ: ಹದಗೆಟ್ಟ ಹಾಸ್ಟೆಲ್‌ ‘ಆರೋಗ್ಯ’.. ಸರಿಯಾಗದ SC, ST, OBC ವಸತಿಶಾಲೆಗಳು

ಒಳನೋಟ | ರಾಜ್ಯದಲ್ಲಿ ವಿದೇಶಿ ಹಣ್ಣುಗಳ ದಿಬ್ಬಣ

ಒಳನೋಟ | ಕಾಲ್ತುಳಿತ ಪ್ರಕರಣ: ಸಾವಿನ ಮನೆ ಬಾಗಿಲು ತೆರೆದವರಾರು?

ಚಿನಕುರುಳಿ: 03 ಜುಲೈ 2025 ಗುರುವಾರ

ಚುರುಮುರಿ | ಬದಲಾವಣೆ ಕ್ರಾಂತಿ!

ಧರ್ಮಪುರ: ಜಂಬೂ ನೇರಳೆಯಿಂದ ಕಾಲು ಕೋಟಿ ಆದಾಯ

ಹೃದಯಾಘಾತ: ಕೋವಿಡ್ ಲಸಿಕೆ ಬಗ್ಗೆ ಸಿದ್ದರಾಮಯ್ಯ ಹೇಳಿಕೆ ಖಂಡಿಸಿದ ಕಿರಣ್ ಮಜುಂದಾರ್