ಮೋರ್ಸಿಂಗ್ ಎಂದರೆ...

ಮೋರ್ಸಿಂಗ್ ಎಂದರೇನು?

ಅದೊಂದು ಅಪರೂಪದ ಸಂಗೀತ ವಾದ್ಯ. 1930ರಿಂದ ಕರ್ನಾಟಕ ಸಂಗೀತದಲ್ಲಿ ಅದನ್ನು ಬಳಸುತ್ತಾರೆ. ಮೃದಂಗಕ್ಕೆ ಜೊತೆಯಾಗಿ ಅದನ್ನು ಬಳಸುವುದು ಹೆಚ್ಚು. ಯಹೂದಿಗಳ ಹಾರ್ಪ್ ವಾದ್ಯದ ಭಾರತೀಯ ರೂಪವಿದು.

ನೋಡಲು ಅದು ಹೇಗಿರುತ್ತದೆ?

ಕುದುರೆಯ ಗೊರಸಿನ ಆಕಾರದ ಲೋಹದ ಚೌಕಟ್ಟಿನ ಮಧ್ಯೆ ಒಂದು ಬದಿಯಲ್ಲಿ ಸಿಕ್ಕಿಸಿ, ಇನ್ನೊಂದು ಬದಿಯಲ್ಲಿ ಮುಕ್ತವಾಗಿ ಆಡುವಂಥ ಸರಳನ್ನು ವಾದ್ಯ ಒಳಗೊಂಡಿರುತ್ತದೆ. ಸಣ್ಣ ಸರಳು ಮುಕ್ತವಾಗಿ ಆಡುತ್ತಾ ಎರಡೂ ಅಂಚಿಗೆ ಬಡಿದಾಗ ನಾದ ಹೊಮ್ಮುತ್ತದೆ. ಸರಳು ಆಡುವ ಆ ಭಾಗವನ್ನು `ಟ್ರಿಗರ್' ಎಂದು ಕರೆಯುತ್ತಾರೆ.

ಅದನ್ನು ನುಡಿಸುವುದು ಹೇಗೆ?

ವಾದ್ಯಗಾರ ಒಂದು ಕೈಯಲ್ಲಿ ಅದನ್ನು ಹಿಡಿದು, ಇನ್ನೊಂದು ಕೈಯಿಂದ ಸರಳನ್ನು ಮುಂಭಾಗದ ಹಲ್ಲಿಗೆ ತಾಗುವಂತೆ ಮೀಟುತ್ತಾನೆ. ನಾಲಗೆಯ ಚಲನೆಯಿಂದ ನಾದದಲ್ಲಿ ವೈವಿಧ್ಯ ಮೂಡಿಸುವುದು ಸಾಧ್ಯ. ಗಂಟಲಿನ ಸ್ನಾಯುಗಳ ಚಲನೆಯಿಂದಲೂ ಮೋರ್ಸಿಂಗ್ ವಾದನ ಕಳೆಗಟ್ಟುವಂತೆ ಮಾಡಬಹುದು.

ದಕ್ಷಿಣ ಭಾರತವಲ್ಲದೆ ಈ ವಾದ್ಯ ಮತ್ತೆಲ್ಲಿ ಜನಪ್ರಿಯವಾಗಿದೆ?

ಅಸ್ಸಾಂನ ಕೆಲವು ಭಾಗಗಳಲ್ಲಿ ಇದನ್ನು ನುಡಿಸುತ್ತಾರೆ. ರಾಜಸ್ತಾನದ ಜನಪದ ಸಂಗೀತಗಾರರು ಈ ವಾದ್ಯವನ್ನು `ಮೋರ್ಚಂಗ್' ಎಂದು ಕರೆಯುತ್ತಾರೆ.

ಮೋರ್ಸಿಂಗ್ ವಾದ್ಯದಲ್ಲಿ ಹೆಸರುವಾಸಿಯಾದವರು ಯಾರು?

ಮೋರ್ಸಿಂಗ್ ಅಷ್ಟೇನೂ ಜನಪ್ರಿಯವಾದ ವಾದ್ಯವಲ್ಲ. ಆದರೂ ಅದರಲ್ಲಿ ಮಲೈಕೋಟ್ಟೈ ಆರ್.ಎಂ. ದೀನದಯಾಳು ಹಾಗೂ ಶ್ರೀರಂಗಂ ಕಣ್ಣನ್ ಹೆಸರು ಮಾಡಿದ್ದಾರೆ.