ಭಾನುವಾರ, ಜೂನ್ 20, 2021
20 °C
ಅತಿಕ್ರಮಣ ಸಮರ್ಥಿಸಿಕೊಂಡ ರಷ್ಯಾ

ಯುದ್ಧಭೀತಿ ತಳ್ಳಿ ಹಾಕಿದ ಪುಟಿನ್‌

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ವಿಶ್ವಸಂಸ್ಥೆ (ಪಿಟಿಐ): ನೆರೆಯ ಉಕ್ರೇನ್‌ ದೇಶದ ಮೇಲೆ ಅತಿಕ್ರಮಣ ಮಾಡಿರುವುದನ್ನು ರಷ್ಯಾ ಬಲವಾಗಿ ಸಮರ್ಥಿಸಿಕೊಂಡಿದೆ. ವಿಶ್ವ ಸಮುದಾಯದ ವ್ಯಾಪಕ ಟೀಕೆಗೆ ಗುರಿಯಾಗಿರುವ ಉಕ್ರೇನ್‌ ಅತಿಕ್ರಮಣ ಪ್ರಕರಣ ಸೋಮವಾರ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ತುರ್ತು ಸಭೆಯಲ್ಲಿ ಪ್ರತಿಧ್ವನಿಸಿತು.



ಈ ಸಂದರ್ಭದಲ್ಲಿ ತನ್ನ ಕ್ರಮವನ್ನು  ಸಮರ್ಥಿಸಿ­ಕೊಂಡ ರಷ್ಯಾ, ಉಕ್ರೇನ್‌ನ ಪದಚ್ಯುತ ಅಧ್ಯಕ್ಷ ವಿಕ್ಟರ್‌ ಯನು­ಕೋವಿಚ್‌ ಮನವಿ ಹಿನ್ನೆಲೆಯಲ್ಲಿ ರಷ್ಯಾ ಸೈನಿಕರು ಆ ರಾಷ್ಟ್ರದ ಮೇಲೆ ನಿಯಂತ್ರಣ ಸಾಧಿಸಿ­ದ್ದಾರೆ ಎಂದು ತಿಳಿಸಿದರು.



ರಷ್ಯಾ ಸೇನೆಯ ನೆರವು ಕೋರಿ ಅಧ್ಯಕ್ಷ ವ್ಲಾಡಿ­ಮಿರ್‌ ಪುಟಿನ್‌ ಅವರಿಗೆ ಉಕ್ರೇನ್‌ ಪದಚ್ಯುತ ಅಧ್ಯ­ಕ್ಷರು ಬರೆದ ಪತ್ರವನ್ನು ಉಕ್ರೇನ್‌ನಲ್ಲಿರುವ  ರಷ್ಯಾದ ರಾಯಭಾರಿ ಪ್ರದರ್ಶಿಸಿದರು.



ಪತ್ರದ ವಿಷಯ ಬಿಸಿ ಚರ್ಚೆಗೆ ನಾಂದಿ­­ಯಾ­ಯಿತು. ರಷ್ಯಾ ಸಮರ್ಥ­ನೆಗೆ ತೀಕ್ಷ್ಣ ಪ್ರತಿಕ್ರಿಯೆ ನೀಡಿದ ವಿಶ್ವಸಂಸ್ಥೆ­ಯಲ್ಲಿ­­ರುವ ಉಕ್ರೇನ್‌ ಪ್ರತಿನಿಧಿ ಯೂರಿ ಸರ್ಜೆವ್‌, ಪದಚ್ಯುತ ಅಧ್ಯಕ್ಷರಿಗೆ ವಿದೇಶಿ ನೆರವು ಕೋರುವ ಅಧಿಕಾರ ಇಲ್ಲ ಎಂದರು.



ಸದ್ಯದ ಪರಿಸ್ಥಿತಿ­ಯಲ್ಲಿ ವಿಕ್ಟರ್‌ ಒಬ್ಬ ಸಾಮಾನ್ಯ ಪ್ರಜೆ­ಯಷ್ಟೇ. ಹೀಗಾಗಿ ಅವರ ಪತ್ರಕ್ಕೆ ಯಾವುದೇ ಮಾನ್ಯತೆ ಇಲ್ಲ. ಉಕ್ರೇನ್‌ ಸಂಸತ್ತು  ಕೈಗೊಳ್ಳುವ ನಿರ್ಧಾರ ಮಾತ್ರ ಅಂತಿಮವಾಗುತ್ತದೆ ಎಂದು ಅವರು ವಾದ ಮಂಡಿಸಿದರು.



ರಷ್ಯಾ ಸೇನೆ ವಾಪಸ್‌ (ಕೀವ್‌ ವರದಿ): ಬಹಿರಂಗವಾಗಿ ಉಕ್ರೇನ್‌ ಬೆಂಬಲಕ್ಕೆ ನಿಂತಿರುವ ಅಮೆರಿಕ ತನ್ನ ನಿಲುವನ್ನು ಮತ್ತಷ್ಟು ಬಿಗಿಗೊಳಿಸಿದೆ.  ಈ ನಡುವೆ ವಿದೇಶಾಂಗ ಕಾರ್ಯದರ್ಶಿ ಜಾನ್‌ ಕೆರಿ ಅವರನ್ನು ಉಕ್ರೇನ್‌ಗೆ ಕಳಿಸಿದೆ.



ಗಲಭೆಗ್ರಸ್ತ ಉಕ್ರೇನ್‌ಗೆ ಒಬಾಮ ಆಡ­­ಳಿತ ಆರು ಸಾವಿರ ಕೋಟಿ ರೂಪಾಯಿ ವಿಶೇಷ ಪ್ಯಾಕೇಜ್‌ ಘೋಷಿ­ಸಿದೆ ಎಂದು ಕೆರಿ ತಿಳಿಸಿದರು.



ಈ ಬೆಳವಣಿಗೆಯಂದಾಗಿ ಮಾಸ್ಕೊ ಮತ್ತು ವಾಷಿಂಗ್ಟನ್‌ ನಡುವಣ ಶೀತಲ ಸಮರ ತಾರಕಕ್ಕೆ ಏರಿದೆ. ಅಮೆರಿಕ ಮತ್ತು ಐರೋಪ್ಯ ಒಕ್ಕೂಟ­ ರಷ್ಯಾ ವಿರುದ್ಧ ಕಠಿಣ ಕ್ರಮದ ಎಚ್ಚ­ರಿಕೆ ನೀಡಿದ ಬೆನ್ನಲ್ಲೇ ಉಕ್ರೇನ್‌ ಗಡಿಯಲ್ಲಿ ಸಮರಾ­­ಭ್ಯಾಸದಲ್ಲಿ ತೊಡ­ಗಿದ್ದ ಯೋಧ­ರಿಗೆ ಸೇನಾ­ನೆಲೆ­ಗಳಿಗೆ ಮರಳು­ವಂತೆ ರಷ್ಯಾ ಆದೇಶಿಸಿದೆ. ಇದ­ರಿಂದಾಗಿ ಗಡಿ­­ಯಲ್ಲಿ ಪ್ರಕ್ಷುಬ್ಧ ಸ್ಥಿತಿ ಕೊಂಚ ಮಟ್ಟಿಗೆ ಕರಗಿದೆ.



ಸಂವಿಧಾನ ವಿರೋಧಿ ದಂಗೆ: ಪುಟಿನ್‌

ಮಾಸ್ಕೊ:
ಉಕ್ರೇನ್‌ ಬೆಳ­ವಣಿಗೆ­ಯನ್ನು ಸಂವಿಧಾನ ಬಾಹಿ­ರ­­ವಾದ ದಂಗೆ ಎಂದು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್‌ ಪುಟಿನ್‌ ಕರೆದಿದ್ದಾರೆ. ಸ್ಥಳೀಯ ಸುದ್ದಿವಾಹಿನಿಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಅವರು, ಪದ­ಚ್ಯುತ­­ರಾದರೂ ವಿಕ್ಟರ್‌ ಯನು­ಕೋವಿಚ್‌ ಈಗಲೂ ಉಕ್ರೇನ್‌ನ ಏಕ­ಮಾತ್ರ ಅಧ್ಯಕ್ಷ ಎಂದು ಅವರು ಅಭಿಪ್ರಾಯ­ಪಟ್ಟಿದ್ದಾರೆ.

‘ಪ್ರಜಾಸತ್ತಾತ್ಮಕ ರೀತಿಯಲ್ಲಿ ಚುನಾ­­ವಣೆ ನಡೆದಲ್ಲಿ ವಿಕ್ಟರ್‌ ಮರು ಆಯ್ಕೆ ಅಸಾಧ್ಯವಾಗಿತ್ತು. ವಿರೋಧ ಪಕ್ಷಗಳು ಸೇನಾದಂಗೆಯ ಮೂಲಕ ಅಧಿ­ಕಾರ ಹಿಡಿಯುವ ಅಗತ್ಯ­ವಿರ­ಲಿಲ್ಲ’ ಎಂದು ಪುಟಿನ್‌ ಹೇಳಿದ್ದಾರೆ.

ವಿಕ್ಟರ್‌ ಅವರಿಗೆ ರಷ್ಯಾ ಆಶ್ರಯ ನೀಡದಿದ್ದರೆ ಅವರನ್ನು ಹತ್ಯೆ ಮಾಡ­ಲಾಗು­ತ್ತಿತ್ತು. ಮಾನವೀಯ ನೆಲೆ­ಯಲ್ಲಿ ರಷ್ಯಾ ಅವರಿಗೆ ಆಶ್ರಯ ನೀಡಿದೆ. ಸಮಯ ಮತ್ತು ಸಂದರ್ಭಕ್ಕೆ ಅನು­ಗುಣ­ವಾಗಿ ರಷ್ಯಾ ಕ್ರಮ ತೆಗೆದು­ಕೊಂಡಿದೆ ಎಂದು ಅವರು ರಷ್ಯಾದ ಕ್ರಮವನ್ನು ಸಮರ್ಥಿ­ಸಿಕೊಂಡಿದ್ದಾರೆ. ಉಕ್ರೇನ್‌ ಜತೆ ರಷ್ಯಾ ಎಂದಿಗೂ ಯುದ್ಧ ಮಾಡಲು ಬಯಸುವುದಿಲ್ಲ ಎಂದು ಅವರು ಇದೇ ವೇಳೆ ಅವರು ಸ್ಪಷ್ಟ­ಪಡಿ­ಸಿದ್ದಾರೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.