ರಂಗನತಿಟ್ಟು ಪಕ್ಷಿಧಾಮಕ್ಕೆ ಬಂದ ಅತಿಥಿಗಳು
ಅಕ್ಷರ ಗಾತ್ರ :ಆ |ಆ |ಆ
ಶ್ರೀರಂಗಪಟ್ಟಣ: ತಾಲ್ಲೂಕಿನ ಪ್ರಸಿದ್ಧ ರಂಗನತಿಟ್ಟು ಪಕ್ಷಿಧಾಮಕ್ಕೆ ವಂಶಾಭಿವೃದ್ಧಿಗಾಗಿ ವಿವಿಧ ಜಾತಿಯ ಪಕ್ಷಿಗಳು ಬರಲಾರಂಭಿಸಿವೆ.
ಮೂರ್ನಾಲ್ಕು ದಿನಗಳೀಚೆಗೆ ವಿವಿಧ ಪಕ್ಷಿಗಳು ಇಲ್ಲಿಗೆ ಬರುತ್ತಿವೆ. ಓಪನ್‌ಬಿಲ್‌ ಸ್ಟೋರ್ಕ್‌, ಸ್ಪೂನ್‌ಬಿಲ್‌ ಸ್ಟೋರ್ಕ್‌, ಪೆಲಿಕಾನ್‌ (ಹೆಜ್ಜಾರ್ಲೆ) ಹಾಗೂ ರಿವರ್‌ ಟರ್ನ್‌ ಪಕ್ಷಿಗಳು ರಂಗನತಿಟ್ಟಿಗೆ ಬಂದಿಳಿಯುತ್ತಿವೆ. ಸುಮಾರು 50 ಜತೆ ಪೆಲಿಕಾನ್‌, 60 ಜತೆ ಓಪನ್‌ ಬಿಲ್‌, 30 ಜತೆ ಸ್ಪೂನ್‌ಬಿಲ್‌ ಹಾಗೂ ಎರಡು ಜತೆ ರಿವರ್‌ ಟರ್ನ್‌ ಪಕ್ಷಿಗಳು ಇಲ್ಲಿಗೆ ಬಂದಿವೆ. ಬುಧವಾರದಿಂದ ಪೇಂಟೆಡ್‌ ಸ್ಟೋರ್ಕ್‌ ಪಕ್ಷಿಗಳು ಪಕ್ಷಿಧಾಮದ ಸುತ್ತಮುತ್ತ ಕಾಣಿಸಿಕೊಳ್ಳುತ್ತಿದ್ದು, ಜಾಗ ಹುಡುಕುತ್ತಿವೆ.
ಪೆಲಿಕಾನ್‌ ಪಕ್ಷಿಗಳು ಈಗಾಗಲೇ ಎತ್ತರದ ಮುಳ್ಳಿನ ಮರಗಳ ಮೇಲೆ ಗೂಡು ಕಟ್ಟುವ ಕಾಯಕದಲ್ಲಿ ತೊಡಗಿವೆ. ರಿವರ್‌ ಟರ್ನ್‌ ಪಕ್ಷಿಗಳು ಮಿಲನ ಕ್ರಿಯೆಯಲ್ಲಿ ತೊಡಗಿದ್ದು, ಒಂದು ವಾರದಲ್ಲಿ ಮೊಟ್ಟೆ ಇಡುವ ಸಾಧ್ಯತೆ ಇದೆ ಎಂದು ಪಕ್ಷಿಧಾಮದ ಉಪ ವಲಯ ಅರಣ್ಯಾಧಿಕಾರಿ (ವನ್ಯಜೀವಿ ವಿಭಾಗ) ಲಕ್ಷ್ಮೀಶ್‌ ‘ಪ್ರಜಾವಾಣಿ’ಗೆ ತಿಳಿಸಿದರು. ಜನವರಿ ಮೊದಲ ವಾರದ ವೇಳೆಗೆ 20 ಸಾವಿರ ಪೆಲಿಕಾನ್‌, 15 ಸಾವಿರ ಪೇಂಟೆಡ್‌ ಸ್ಟೋರ್ಕ್‌, 10 ಸಾವಿರದಷ್ಟು ಓಪನ್‌ ಬಿಲ್‌ ಸ್ಟೋರ್ಕ್‌, 6ರಿಂದ 7 ಸಾವಿರ ಸ್ಪೂನ್‌ಬಿಲ್‌ ಸ್ಟೋರ್ಕ್‌ ಪಕ್ಷಿಗಳು ರಂಗನತಿಟ್ಟಿಗೆ ಬರಲಿವೆ.
ಭರತ್‌ಪುರ, ಮಂಡಗದ್ದೆ ಮಾತ್ರವಲ್ಲದೆ ಶ್ರೀಲಂಕಾದಿಂದಲೂ ಕೆಲವು ಪಕ್ಷಿಗಳು ವಂಶಾಭಿವೃದ್ಧಿಗಾಗಿ ಇಲ್ಲಿಗೆ ಬರುತ್ತವೆ. ನೈಟ್‌ ಹೆರಾನ್‌, ಪರ್ಪಲ್‌ ಹೆರಾನ್‌, ಸ್ನೇಕ್‌ ಬರ್ಡ್‌, ಕಾರ್ಮೊರೆಂಟ್‌, ಬ್ಲಾಕ್‌ ಹೆಡೆಡ್‌ ಐಬಿಸ್‌ (ಕಪ್ಪುತಲೆ ಬಕ), ಸ್ಟೋನ್‌ ಫ್ಲವರ್‌ ಪಕ್ಷಿಸಂಕುಲ ಪಕ್ಷಿಧಾಮದಲ್ಲಿ ಬೀಡುಬಿಟ್ಟಿವೆ.
