ಬುಧವಾರ, ಜೂನ್ 23, 2021
23 °C
ಎರಡು ವರ್ಷಗಳಿಂದ ಪರಿಹಾರವಾಗದೆ ಉಳಿದಿದ್ದ ಪ್ರಕರಣಗಳು

ರಾಷ್ಟ್ರೀಯ ಲೋಕ ಅದಾಲತ್‌ನಲ್ಲಿ ಇತ್ಯರ್ಥ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಬೆಂಗಳೂರು: ಸುಮಾರು ಎರಡು ವರ್ಷಗಳಿಂದ ಪರಿಹಾರವಾಗದೆ ಉಳಿದಿದ್ದ ಬಿಬಿಎಂಪಿಗೆ ಸಂಬಂಧಿಸಿದ ನೂರಾರು ವ್ಯಾಜ್ಯಗಳನ್ನು ಶನಿವಾರ ಪುರಭವನದಲ್ಲಿ ನಡೆದ ರಾಷ್ಟ್ರೀಯ ಲೋಕ ಅದಾಲತ್‌ನಲ್ಲಿ ಪರಿಹರಿಸಲಾಯಿತು.



ರಾಜ್ಯ ಕಾನೂನು ಸೇವೆಗಳ ಪ್ರಾಧಿಕಾರ ಮತ್ತು ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆಯು (ಬಿಬಿಎಂಪಿ) ಆಯೋಜಿಸಿದ್ದ ರಾಷ್ಟ್ರೀಯ ಲೋಕ ಅದಾಲತ್‌ನಲ್ಲಿ ಅನೇಕರ ಪ್ರಕರಣಗಳು ಇತ್ಯರ್ಥ­ವಾದರೆ, ಇನ್ನು ಕೆಲವರು ಭರವಸೆಯನ್ನು ಪಡೆ­ದರು. ಇಲ್ಲಿ ಪೂರ್ವ ಮತ್ತು ಪಶ್ಚಿಮ ವಲಯದ ಕೋರ್ಟ್‌ಗೆ ಹೋಗುವ ಮೊದಲಿನ ವ್ಯಾಜ್ಯಗಳನ್ನು ಪರಿಹರಿಸಲಾಯಿತು.



ಇದಕ್ಕೂ ಮುನ್ನ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಬಿಬಿಎಂಪಿ ಆಯುಕ್ತ ಎಂ.­ಲಕ್ಷ್ಮಿನಾರಾಯಣ, ‘ಬಿಬಿಎಂಪಿಯು ಜನರ ಸಮಸ್ಯೆ­ಗಳಿಗೆ ಸರಿಯಾಗಿ ಸ್ಪಂದಿಸುವುದಿಲ್ಲ. ನಿಧಾನಗತಿಯ ಕಾರ್ಯ ನಿರ್ವಹಣೆ, ಅಧಿಕಾರಿಗಳು ವಿಳಂಬ ನೀತಿಯ­ನ್ನು ಅನುಸರಿಸುತ್ತಾರೆ ಎಂಬ ಭಾವನೆ ಜನ­ರ­ಲ್ಲಿದೆ. ಇದರಿಂದ, ಎಲ್ಲ ವ್ಯಾಜ್ಯಗಳ ತ್ವರಿತ ನಿರ್ವ­ಹಣೆಗೆ ಲೋಕ ಅದಾಲತ್‌ ಆಯೋಜಿಸಲಾಗಿದೆ’ ಎಂದು ಹೇಳಿದರು.

‘ಸಂಜೆ 5 ಗಂಟೆಯ ವೇಳೆಗೆ ಆರೋಗ್ಯ, ಶಿಕ್ಷಣ, ನಕ್ಷೆ ಮಂಜೂರಾತಿ, ವ್ಯಾಪಾರ ಪರವಾನಗಿ ಸೇರಿದಂತೆ, ಪೂರ್ವ ಮತ್ತು ಪಶ್ಚಿಮ ವಲಯ­ದಲ್ಲಿನ ಬಾಕಿ ಉಳಿದಿರುವ ಸಾವಿರಕ್ಕೂ ಹೆಚ್ಚು ಪ್ರಕರಣಗಳನ್ನು ಇತ್ಯರ್ಥಗೊಳಿಸಲಾಗುವುದು’ ಎಂದರು.



‘ಕೆಲ ಅಧಿಕಾರಿಗಳು ಪ್ರಕರಣಗಳ ಇತ್ಯರ್ಥಕ್ಕೆ ವಿನಾ­ಕಾರಣ ವಿಳಂಬವನ್ನು ಮಾಡುತ್ತಾರೆ. ಇದರಿಂದ, ವಿವಾದಗಳು ಏರ್ಪಡುತ್ತವೆ. ಜನರ  ಸೇವೆ­ಗಾಗಿಯೇ ಬಿಬಿಎಂಪಿ ಇದೆ’ ಎಂದರು.ಕಾನೂನು ಸೇವೆಗಳ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿ ಅಶೋಕ್‌ ನಿಜಗಣ್ಣನವರ್ ಮಾತ­ನಾಡಿ, ‘ರಾಷ್ಟ್ರೀಯ ಲೋಕ ಅದಾಲತ್‌ ಒಂದು ವಿನೂ­ತನ ಕಾರ್ಯಕ್ರಮವಾಗಿದೆ. ನಗರ ದಿನ­ದಿಂದ ದಿನಕ್ಕೆ ಬೆಳೆಯುತ್ತಿದೆ. ಆದರೆ, ಜನಸಂಖ್ಯೆಗೆ ಅನುಗುಣವಾಗಿ ನಮ್ಮಲ್ಲಿ ಅಧಿಕಾರಿಗಳಿಲ್ಲ. ಎಲ್ಲ ಇಲಾಖೆ­ಗಳಲ್ಲಿ ಸಿಬ್ಬಂದಿಯ ಕೊರತೆಯಿದೆ’ ಎಂದರು.



‘ಸಿಬ್ಬಂದಿಯ ಕೊರತೆಯಿಂದ ಬೆಳಿಗ್ಗೆಯಿಂದ ಸಂಜೆಯವರೆಗೂ ಕೆಲಸ ಮಾಡಿದರೂ ಕಡತಗಳ ಸಂಖ್ಯೆ ಹೆಚ್ಚುತ್ತ ಹೋಗುತ್ತದೆ. ಇದರಿಂದ, ಸಿಬ್ಬಂದಿಯ ಮೇಲೆ ಒತ್ತಡ ಹೆಚ್ಚಾಗುತ್ತದೆ. ಆದರೂ ಅಧಿಕಾರಿಗಳು ಸಾರ್ವಜನಿಕರ ಹಿತಾಸಕ್ತಿ­ಯನ್ನು ಕಡೆಗಣಿಸಬಾರದು’ ಎಂದು ಹೇಳಿದರು.



ಬಿಬಿಎಂಪಿ ಕಾನೂನು ಕೋಶದ ಮುಖ್ಯಸ್ಥ ಕೆ.ಡಿ.ದೇಶಪಾಂಡೆ ಪ್ರಾಸ್ತಾವಿಕವಾಗಿ ಮಾತನಾಡಿ, ‘ಇಲ್ಲಿ ನಡೆದಿರುವ ಲೋಕ ಅದಾಲತ್‌ ಹಾಗೂ ಚುನಾವಣೆಗೂ ಯಾವುದೇ ಸಂಬಂಧವಿಲ್ಲ. ಬಿಬಿಎಂಪಿ ಅಧಿಕಾರಿಗಳು ಅದಾಲತ್‌ನಲ್ಲಿ ಭಾಗವಹಿಸಿದ್ದರೂ ಚುನಾವಣಾ ನೀತಿ ಸಂಹಿತೆಯು ಅಡ್ಡಿಯಾಗುವುದಿಲ್ಲ. ರಾಷ್ಟ್ರೀಯ ಲೋಕ ಅದಾಲತ್‌ ಅನ್ವಯ ಏಪ್ರಿಲ್‌ 12 ರೊಳಗೆ ಎಲ್ಲಾ ಪ್ರಕರಣಗಳನ್ನು ಇತ್ಯರ್ಥಪಡಿಸಬೇಕಾಗಿದೆ’ ಎಂದರು.



ಕಾಕ್ಸಟೌನ್‌ನ ಪಾಲಿಕೆ ಪ್ರೌಢಶಾಲೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಜಯರಾಮ್‌ ಅವರು ಎರಡು ವರ್ಷಗಳ ಹಿಂದೆ ಮರಣ ಹೊಂದಿದ್ದರು. ಅವರ ಪತ್ನಿ ಲಕ್ಷ್ಮಿಶ್ರೀ ಅವರಿಗೆ ಅವರ ಪತಿಯ ಕೆಲಸ ದೊರೆಯಿತು. ಆದರೆ, ಎರಡು ವರ್ಷದ ಪಿಂಚಣಿಗಾಗಿ ಬಿಬಿಎಂಪಿಗೆ ಅಲೆದರೂ ಪಿಂಚಣಿ ದೊರೆತಿರಲಿಲ್ಲ.



‘ಲೋಕ ಅದಾಲತ್‌ನಲ್ಲಿ ಎರಡು ವರ್ಷದ ಪಿಂಚಣಿ ಒಟ್ಟಿಗೆ ಬಂದಿದ್ದು ಸಂತಸ ನೀಡಿದೆ. ಇದರಿಂದ, ಜೀವನ ನಿರ್ವಹಣೆ ಕಷ್ಟವಾಗುವುದಿಲ್ಲ’ ಎಂದು ಲಕ್ಷ್ಮಿಶ್ರೀ ಅವರು ಹರ್ಷ ವ್ಯಕ್ತಪಡಿಸಿದರು.

ಪರವಾನಗಿಯಿಂದ ಸಂತಸ

ಮಾಗಡಿ ರಸ್ತೆಯ ಅಗ್ರಹಾರದಲ್ಲಿ ಪ್ರಗತಿ ರಾ ಸಿಲ್ಕ್‌ ಘಟಕವನ್ನು  ಸ್ಥಾಪನೆ ಮಾಡಿದ್ದೆವು. ಆದರೆ, ಶಬ್ದಮಾಲಿನ್ಯ ಉಂಟಾ­ಗು­ತ್ತಿದೆ ಎಂದು ನೆರೆಮನೆಯವರು ದೂರು ನೀಡಿದ್ದರಿಂದ, ಬಿಬಿಎಂಪಿ ಅವರು ಪರವಾನಗಿ ರದ್ದುಗೊಳಿಸಿದ್ದರು. ನಂತರ ಶಬ್ದ ನಿರೋಧಕ ಅಳವಡಿಸಿದ್ದರೂ, ಬಿಬಿಎಂಪಿ ಪರವಾನಗಿ ನೀಡಿರಲಿಲ್ಲ. ಆದರೆ, ಪ್ರಾಧಿಕಾರ ಸ್ಥಳದಲ್ಲೇ ಪರವಾನಗಿ ನೀಡುವಂತೆ ಆದೇಶ ನೀಡಿ­ರುವುದು ಸಂತಸ ತಂದಿದೆ.

– ಪ್ರಗತಿ, ಪ್ರಗತಿ ರಾ ಸಿಲ್ಕ್‌ ಘಟಕದ  ಮಾಲೀಕರು.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.