ರಿಜ್ವಾನ್‌ ಬಳಿ ವಾಹನವೇ ಇಲ್ಲ!

ಬೆಂಗಳೂರು: ಪ್ರದೇಶ ಯುವ ಕಾಂಗ್ರೆಸ್‌ ಸಮಿತಿ ಅಧ್ಯಕ್ಷರೂ ಆಗಿರುವ ಬೆಂಗಳೂರು ಕೇಂದ್ರ ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್‌ ಅಭ್ಯರ್ಥಿ ರಿಜ್ವಾನ್‌ ಅರ್ಷದ್‌ ಅವರ ಕುಟುಂಬ ಸ್ವಂತ ವಾಹನವನ್ನೇ ಹೊಂದಿಲ್ಲ.



ಲೋಕಸಭಾ ಚುನಾವಣೆಗೆ ಗುರು­ವಾರ ಸಲ್ಲಿಸಿರುವ ನಾಮಪತ್ರದ ಜೊತೆಗೆ ನೀಡಿರುವ ಪ್ರಮಾಣ ಪತ್ರ­ದಲ್ಲಿ ರಿಜ್ವಾನ್‌ ಈ ಮಾಹಿತಿ ಒದ­ಗಿ­ಸಿದ್ದಾರೆ. ಅವರಾಗಲೀ, ಪತ್ನಿ ನಜೀಹಾ ಬಾನು ಅವರಾಗಲೀ ಯಾರಿಂದಲೂ ಸಾಲ ಪಡೆದಿಲ್ಲ, ಯಾರಿಗೂ ಸಾಲ ಕೊಟ್ಟಿಲ್ಲ ಎಂಬ ಮಾಹಿತಿಯೂ ಪ್ರಮಾಣ ಪತ್ರದಲ್ಲಿದೆ.



ಬ್ಯಾಂಕ್‌ ಖಾತೆಗಳಲ್ಲೂ ಹಣ ಇಟ್ಟಿಲ್ಲ. ಸರ್ಕಾರಿ ಅಥವಾ ಖಾಸಗಿ ಸಂಸ್ಥೆ­ಗಳಲ್ಲಿ ಹೂಡಿಕೆಯನ್ನೂ ಮಾಡಿಲ್ಲ. ಅಭ್ಯರ್ಥಿ ಬಳಿ ₨ 46 ಲಕ್ಷ ಮತ್ತು ಅವರ ಪತ್ನಿ ಬಳಿ ₨ 6 ಲಕ್ಷ ನಗದು ಇದೆ. ರಿಜ್ವಾನ್ ₨ 2.14 ಕೋಟಿ ಮೌಲ್ಯದ ಆಸ್ತಿ ಹೊಂದಿದ್ದರೆ, ನಜೀಹಾ ಬಳಿ ₨ 1 ಕೋಟಿ ಬೆಲೆಬಾಳುವ ಆಸ್ತಿ ಇದೆ.



ಅಭ್ಯರ್ಥಿ ವಿರುದ್ಧ ಮೈಸೂರಿನ ನರಸಿಂಹರಾಜ ಪೊಲೀಸ್‌ ಠಾಣೆಯಲ್ಲಿ 2008ರಲ್ಲಿ ದಾಖಲಾಗಿರುವ ಒಂದು ಮೊಕದ್ದಮೆ ವಿಚಾರಣೆಗೆ ಬಾಕಿ ಇದೆ. ರಾಜಧಾನಿಯ ವಿಧಾನಸೌಧ  ಪೊಲೀಸ್‌ ಠಾಣೆಯಲ್ಲಿ ದಾಖಲಾ­ಗಿರುವ ಒಂದು ಮೊಕದ್ದಮೆ ಇದೆ.