ಲಂಚ ಹಗರಣ ಸಿಬಿಐಗೆ ವಹಿಸಿದ ಆಂಟನಿ

ನವದೆಹಲಿ (ಪಿಟಿಐ): ಸರ್ಕಾರಿ ಸ್ವಾಮ್ಯದ ಹಿಂದುಸ್ತಾನ್‌ ಏರೊನಾಟಿಕ್ಸ್‌ ಲಿ.ಗೆ (ಎಚ್‌ಎಎಲ್‌) ವಿಮಾನಗಳ ಎಂಜಿನ್‌ ಪೂರೈಕೆಯ ರೂ. 10 ಸಾವಿರ ಕೋಟಿ ವ್ಯವಹಾರದಲ್ಲಿ ಲಂಚ ಪಡೆಯಲಾಗಿದೆ ಎಂಬ ಆರೋಪದ ಬಗ್ಗೆ ಸಿಬಿಐ ತನಿಖೆ ನಡೆಸುವಂತೆ ರಕ್ಷಣಾ ಸಚಿವ ಎ.ಕೆ.ಆಂಟನಿ ಆದೇಶಿಸಿದ್ದಾರೆ.



2007ರಿಂದ 2011ರ ನಡುವಿನ ಅವಧಿಯಲ್ಲಿ ಹಾಕ್‌ ತರಬೇತಿ ವಿಮಾನ ಮತ್ತು ಜಾಗ್ವಾರ್‌ ಯುದ್ಧ ವಿಮಾನ­ಗಳಿಗೆ ಲಂಡನ್‌ ಮೂಲದ ರೋಲ್ಸ್‌­ರಾಯ್ಸ್‌್ ಕಂಪೆನಿಯಿಂದ ಎಂಜಿನ್‌ ಪೂರೈಕೆ ವ್ಯವಹಾರದಲ್ಲಿ ಈ ಲಂಚದ ಆರೋಪ ಕೇಳಿ ಬಂದಿದೆ. ಎಚ್‌ಎಎಲ್‌ನ ಜಾಗೃತ ದಳವು ಪ್ರಕರಣದ ಬಗ್ಗೆ ಆಂತರಿಕ ತನಿಖೆ ನಡೆಸಿದ್ದು, ಆರೋಪಗಳು ಮೇಲ್ನೋಟಕ್ಕೆ ಸಾಬೀತಾ­ಗಿವೆ ಎಂದು ರಕ್ಷಣಾ ಸಚಿವಾಲಯದ ಮೂಲಗಳು ಹೇಳಿವೆ.

ಪ್ರತಿಕ್ರಿಯೆ ಪಡೆಯುವುದಕ್ಕೆ ರೋಲ್ಸ್‌ರಾಯ್ಸ್‌ ಕಂಪೆನಿಯನ್ನು ಇಮೇಲ್‌ ಮೂಲಕ ಸಂಪರ್ಕಿಸಲಾಗಿದೆ. ಭಾನುವಾರ ರಜಾದಿನ ಆಗಿರುವು­ದರಿಂದ ಸೋಮವಾರವಷ್ಟೇ ಪ್ರತಿಕ್ರಿಯೆ ನೀಡುವುದಕ್ಕೆ ಸಾಧ್ಯ ಎಂದು ಕಂಪೆನಿ ಹೇಳಿದೆ.



ಎಂಜಿನ್‌ ಪೂರೈಕೆ ವ್ಯವಹಾರದಲ್ಲಿ ಗುತ್ತಿಗೆ ಪಡೆಯುವುದಕ್ಕಾಗಿ ಎಚ್‌ಎ­ಎಲ್‌ ಅಧಿಕಾರಿಗಳು ಮತ್ತು ಸಂಬಂಧ­ಪಟ್ಟ ಇತರ ಇಲಾಖೆಗಳಿಗೆ  ಲಂಚ ನೀಡ­ಲಾಗಿದೆ ಎಂದು ಆರೋಪಿಸಿ ಇತ್ತೀಚೆಗೆ ಎಚ್‌ಎ­ಎಲ್‌ಗೆ ಪತ್ರವೊಂದು ಬಂದಿತ್ತು. ತಕ್ಷಣವೇ ಮುಖ್ಯ ಜಾಗೃತ ಅಧಿಕಾರಿ­ಯಿಂದ ಎಚ್‌ಎಎಲ್‌ ತನಿಖೆ ನಡೆಸಿತು.



ಲಂಚ ಪಡೆದುಕೊಳ್ಳಲಾಗಿದೆ ಎಂದು ಆರೋಪಿಸ­ಲಾಗಿರುವ 2007ರಿಂದ 2011ರ ಅವಧಿಯಲ್ಲಿ ಕಂಪೆನಿಯು ಹಲವು ಗುತ್ತಿಗೆ ನಿಯಮಗಳನ್ನು ಉಲ್ಲಂಘಿಸಿರುವುದು ಈ ತನಿಖೆಯಲ್ಲಿ ಮೇಲ್ನೋಟಕ್ಕೆ ಸಾಬೀತಾಗಿದೆ.



ಭಾರತೀಯ ವಾಯುಪಡೆಗಾಗಿ ಎಚ್‌ಎ­ಎಲ್‌ ತಯಾ­ರಿಸಿದ ವಿಮಾನಗಳಿಗೆ ಈ ಎಂಜಿನ್‌ಗಳನ್ನು ಬಳಸಲಾಗಿದೆ.



ಎಎಚ್‌ಎಲ್‌ನೊಂದಿಗೆ ಮಾಡಿಕೊಳ್ಳ­ಬೇಕಿರುವ ಸಮಗ್ರ ಒಪ್ಪಂದದ ಅನ್ವಯ ಮಾರಾಟಗಾರರು ಮತ್ತು ಪೂರೈಕೆ­ದಾರರು ವಹಿವಾಟಿನಲ್ಲಿ ಪ್ರಾಮಾಣಿಕತೆ­ಯನ್ನು ಖಾತರಿಪಡಿಸಬೇಕು. ಇದಕ್ಕೆ ಸಂಬಂಧಿಸಿದಂತೆ ಎಚ್‌ಎಎಲ್‌ ಕೆಲವು ಪ್ರಶ್ನೆಗಳನ್ನು ಕಂಪೆನಿಗಳಿಗೆ ಕಳುಹಿಸಿದ ಸಂದರ್ಭದಲ್ಲಿ ಪ್ರಕರಣ ಬೆಳಕಿಗೆ ಬಂತು ಎಂದು ಮೂಲಗಳು ಹೇಳಿವೆ. 



ಎಚ್‌ಎಎಲ್‌ನ ಮುಖ್ಯ ಜಾಗೃತ ಅಧಿಕಾರಿಯ ತನಿಖೆಯಲ್ಲಿ ಕಂಡು ಬಂದ ಅಂಶಗಳು ಮತ್ತು ಅವರ ಶಿಫಾರಸು ಆಧಾರದಲ್ಲಿ ಆಂಟನಿ ಪ್ರಕರಣವನ್ನು ಸಿಬಿಐಗೆ ವಹಿಸಿದ್ದಾರೆ.



ಭ್ರಷ್ಟಾಚಾರ ವಿರುದ್ಧ ಕಠಿಣ ಕ್ರಮ: ಈ ಬೆಳವಣಿಗೆಯಿಂದಾಗಿ ವಾಯುಪಡೆಯ ಹಲವು ಯೋಜನೆಗಳು ವಿಳಂಬವಾಗ­ಬಹುದು. ಆದರೆ ಖರೀದಿಯಲ್ಲಿ ಭ್ರಷ್ಟಾಚಾರ ನಡೆಯಲೇ­ಬಾರದು ಎಂಬ ನಿಲುವು ಹೊಂದಿರುವ ಆಂಟನಿ ಕಠಿಣ ಕ್ರಮ ಕೈಗೊಳ್ಳಲು ಮುಂದಾಗಿದ್ದಾರೆ.



ಸೇನೆಯ ಖರೀದಿಗೆ ಸಂಬಂಧಿಸಿ ಅನಾಮಧೇಯ ಪತ್ರಗಳ ರೂಪದಲ್ಲಿ ಆರೋಪ ಕೇಳಿ ಬಂದಾಗಲೂ ರಕ್ಷಣಾ ಸಚಿವರು ತನಿಖೆಗೆ ಆದೇಶಿಸಿದ್ದಾರೆ. ಆಗಸ್ಟಾ ವೆಸ್ಟ್‌ಲ್ಯಾಂಡ್‌ ಹೆಲಿಕಾಪ್ಟರ್‌ ಖರೀದಿಯಲ್ಲಿ ಅವ್ಯವಹಾರದ ಆರೋಪ ಕೇಳಿ ಬಂದಾಗ ಅವರು ಆ ವ್ಯವಹಾರವನ್ನೇ ರದ್ದುಪಡಿಸಿದ್ದರು.



ರಕ್ಷಣಾ ಸಚಿವರಾಗಿ ಕಾರ್ಯನಿರ್ವಹಿಸಿದ ಎಂಟು ವರ್ಷಗಳ ಅವಧಿಯಲ್ಲಿ ಭ್ರಷ್ಟಾಚಾರ ಆರೋಪ ಕೇಳಿ ಬಂದ ನೂರಕ್ಕೂ ಹೆಚ್ಚು ಪ್ರಕರಣಗಳನ್ನು ಆಂಟನಿ ಸಿಬಿಐ ತನಿಖೆಗೆ ಒಪ್ಪಿಸಿದ್ದಾರೆ.