ಭಾನುವಾರ ಬೀದರ್‌ನಲ್ಲಿ ‘ಬೀದರ್ ಉತ್ಸವ’. ಹಿನ್ನೆಲೆ ಗಾಯಕ ಶಾನ್ ಅವರ ಸಂಗೀತ ರಸಮಂಜರಿ ಇದರ ಪ್ರಧಾನ ಆಕರ್ಷಣೆ. ಅದಕ್ಕಿಂತಲೂ ಇನ್ನೊಂದು ವಿಶೇಷವೂ ಇಲ್ಲಿದೆ. ಶಾನ್ ಜತೆ ಮೊದಲ ಬಾರಿಗೆ ಬೆಂಗಳೂರಿನ ಮೂವರು ಉತ್ಸಾಹಿ ಗಾಯಕ- ಗಾಯಕಿಯರು ವೇದಿಕೆ ಏರಿ ದನಿಗೂಡಿಸಲಿದ್ದಾರೆ.

ದೇಸಿತಾರಾ.ಕಾಮ್ ಏರ್ಪಡಿಸಿದ್ದ ಸ್ಪರ್ಧೆಯಲ್ಲಿ ಗೆದ್ದ ಶಂಕರ್, ಶೀಲೂ ಮೆಹ್ತಾ ಮತ್ತು ಶಶಿಕುಮಾರ್ ಅವರೇ ಈ ಅದೃಷ್ಟಶಾಲಿಗಳು. ಅವರಿಗೂ ಇದು ರೋಮಾಂಚನ ಉಂಟು ಮಾಡಿದೆ.

ಕೇರಳದ ಕಲಾವಿದರ ಕುಟುಂಬದಲ್ಲಿ ಬೆಳೆದ ಶಂಕರ್ ಬಾಲ್ಯದಲ್ಲಿಯೇ ಕರ್ನಾಟಕ ಶಾಸ್ತ್ರೀಯ ಸಂಗೀತವನ್ನು ಕಲಿತಿದ್ದಾರೆ.

ಬೆಂಗಳೂರಿನಲ್ಲಿ ಕಳೆದ 8 ವರ್ಷದಿಂದ ಬಹುರಾಷ್ಟ್ರೀಯ ಕಂಪನಿಯಲ್ಲಿ ಉದ್ಯೋಗದಲ್ಲಿದ್ದರು. ಸಂಗೀತದ ಮೇಲಿನ  ವ್ಯಾಮೋಹದಿಂದ ವೃತ್ತಿ ಬಿಟ್ಟು  ಹಾಡುವುದನ್ನೇ  ವೃತ್ತಿ- ಪ್ರವೃತ್ತಿ ಮಾಡಿಕೊಂಡಿದ್ದಾರೆ.

ಪುಣೆ ಮೂಲದ ಶೀಲು ಮೆಹ್ತಾ 21 ವರ್ಷದಿಂದ ಬೆಂಗಳೂರು ನಿವಾಸಿ. ಮದುವೆ ನಂತರ ಮನೆಯಲ್ಲಿಯೇ ಮಕ್ಕಳಿಗೆ ಸಂಗೀತ ಪಾಠ ಕಲಿಸುತ್ತಿದ್ದಾರೆ.