ಹಣದುಬ್ಬರ 14 ತಿಂಗಳ ಗರಿಷ್ಠ

ನವದೆಹಲಿ (ಪಿಟಿಐ): ಹಣ್ಣು ಮತ್ತು ತರಕಾರಿ ಬೆಲೆ ಏರಿಕೆಯಿಂದಾಗಿ, ಪ್ರಮುಖವಾಗಿ ಈರುಳ್ಳಿ ಮತ್ತು ಆಲೂ­ಗಡ್ಡೆ ತುಟ್ಟಿಯಾದ್ದರಿಂದ ಸಗಟು ಬೆಲೆ ಸೂಚ್ಯಂಕ  ಆಧರಿಸಿದ ಹಣದುಬ್ಬರ ದರ (ಡಬ್ಲ್ಯುಪಿಐ) ನವೆಂಬರ್‌ನಲ್ಲಿ 14 ತಿಂಗಳ ಗರಿಷ್ಠ ಮಟ್ಟವಾದ ಶೇ 7.52ಕ್ಕೆ ಜಿಗಿದಿದೆ.



2012ರ ಸೆಪ್ಟೆಂಬರ್‌ನಲ್ಲಿ ಶೇ 8.1ರಷ್ಟು ‘ಡಬ್ಲ್ಯುಪಿಐ’ ದಾಖಲಾ­ಗಿತ್ತು. ನಂತರ ದಾಖಲಾಗಿರುವ ಗರಿಷ್ಠ ಮಟ್ಟ ಇದಾಗಿದೆ.



ಹಣದುಬ್ಬರ ಏರಿಕೆಯು ಭಾರತೀಯ ರಿಸರ್ವ್ ಬ್ಯಾಂಕ್‌ (ಆರ್‌ಬಿಐ) ಡಿ.18­ರಂದು ಪ್ರಕಟಿಸಲಿರುವ ಮಧ್ಯಂತರ ತ್ರೈಮಾಸಿಕ ಹಣಕಾಸು ನೀತಿಯ ಮೇಲೆ  ಪ್ರತಿಕೂಲ ಪರಿಣಾಮ ಬೀರಲಿದೆ. ಇದರಿಂದ ಬಡ್ಡಿ ದರ ಕಡಿತ ಸಾಧ್ಯತೆ ಕ್ಷೀಣಿಸಿದೆ  ಎಂದು ಮಾರುಕಟ್ಟೆ ತಜ್ಞರು ವಿಶ್ಲೇಷಿ­ಸಿದ್ದಾರೆ.



ನವೆಂಬರ್‌ನಲ್ಲಿ ತರಕಾರಿ ಬೆಲೆ ಶೇ 95.25ರಷ್ಟು ಏರಿಕೆ ಕಂಡಿದೆ.  ಗೋಧಿ, ಹಾಲು, ಬೇಳೆಕಾಳನ್ನು ಒಳಗೊಂಡ ಇತರೆ ಆಹಾರ ಪದಾರ್ಧಗಳ ಧಾರಣೆ ಶೇ 19.93ರಷ್ಟು ಹೆಚ್ಚಿದೆ. ಆಲೂಗಡ್ಡೆ ಶೇ 26ರಷ್ಟು ತುಟ್ಟಿಯಾದರೆ, ಈರುಳ್ಳಿ ಮತ್ತೆ ಗಗನಮುಖಿಯಾಗಿದ್ದು ಶೇ 190ರಷ್ಟು ಏರಿಕೆ ಕಂಡಿದೆ. ಹಾಲಿನ ಬೆಲೆ  ಶೇ 6.25ರಷ್ಟು  ಹೆಚ್ಚಿದೆ.  ಇಂಧನ ಮತ್ತು ವಿದ್ಯುತ್‌ ವಲಯದ ಹಣದು­ಬ್ಬರ ನವೆಂಬರ್‌ನಲ್ಲಿ ಶೇ 11ರಷ್ಟು ಹೆಚ್ಚಿದೆ. ತಯಾರಿಕಾ ಸರಕುಗಳ ಬೆಲೆ ಶೇ 2.64ರಷ್ಟು ಏರಿಕೆಯಾಗಿದೆ.



ಅಕ್ಟೋಬರ್‌ನಲ್ಲಿ ಶೇ 7ರಷ್ಟು ‘ಡಬ್ಲ್ಯುಪಿಐ’ ದಾಖಲಾಗಿತ್ತು. ಅದಕ್ಕೂ ಮುನ್ನ ಇದು ಶೇ 7.05ರಷ್ಟಿತ್ತು.