ಹಿರೇಮಗಳೂರು: ಬ್ರಹ್ಮರಥೋತ್ಸವ

ಚಿಕ್ಕಮಗಳೂರು: ಹಿರೇಮಗಳೂರಿನ ಕೋದಂಡ ರಾಮಚಂದ್ರಸ್ವಾಮಿ ಬ್ರಹ್ಮ­ರಥೋತ್ಸವ ಮಂಗಳವಾರ ಶ್ರದ್ಧಾಭಕ್ತಿ­ಯಿಂದ ನಡೆಯಿತು.

ಸುತ್ತಮುತ್ತಲ ಗ್ರಾಮಗಳ ಭಕ್ತರು ರಥೋತ್ಸವದಲ್ಲಿ ಪಾಲ್ಗೊಂಡಿದ್ದರು. ಬೆಂಗಳೂರು ಮತ್ತು ಮೈಸೂರಿನಿಂದಲೂ ಭಕ್ತಾದಿಗಳು ಬಂದಿದ್ದರು. ರಥೋ­ತ್ಸವಕ್ಕೆ ಮೊದಲು ಉತ್ಸವ ಮೂರ್ತಿ ಮೆರವಣಿಗೆ ನಡೆಯಿತು. ರಥಕ್ಕೆ ಪೂಜೆ ಸಲ್ಲಿಸಿದ ಬಳಿಕ ರಥ ಎಳೆಯಲು ಚಾಲನೆ ನೀಡಲಾಯಿತು. ಬಳಿಕ ಭಕ್ತರು ತೇರನ್ನು ಸಂಭ್ರಮದಿಂದ ಎಳೆದು, ಹರಕೆ ಸಲ್ಲಿಸಿದರು.



ನಾದಸ್ವರ ಮುಂದೆ ಸಾಗುತ್ತಿದ್ದಂತೆ ಭಕ್ತರು ರಥವನ್ನು ಎಳೆದೊ­ಯ್ಯುತ್ತಿ­ದ್ದರು. ರಥದ ಕಳಸಕ್ಕೆ ಬಾಳೆಹಣ್ಣು ಎಸೆಯುವ ಮೂಲಕ ಭಕ್ತಿ ಸಮರ್ಪಿಸಲಾಯಿತು.



ರಥೋತ್ಸವಕ್ಕೆ ಮೊದಲು ಪ್ರತಿ ದಿನ ಶಯನೋತ್ಸವ ನಡೆಯಿತು. ಸೋಮ­ವಾರ ರಾತ್ರಿ ಗರುಡೋತ್ಸವ ನಡೆಯಿತು. ಬೆಳಿಗ್ಗೆ ರಥವನ್ನು ಅರ್ಧಕ್ಕೆ ಎಳೆದು ನಿಲ್ಲಿಸಿದ್ದು, ಸಂಜೆ ರಥವನ್ನು ಪೂರ್ಣ ಎಳೆಯಲಾಯಿತು.



ಕನ್ನಡ ಪೂಜಾರಿ ಹಿರೇಮಗಳೂರು ಕಣ್ಣನ್, ನಗರಸಭೆ ಸದಸ್ಯರಾದ ಹಿರೇಮಗಳೂರು ಪುಟ್ಟಸ್ವಾಮಿ, ಎಚ್­.­ಡಿ.­­ತಮ್ಮಯ್ಯ, ಮುಖಂಡರಾದ ಕೆ.ಆರ್.­ವಿಜಯನ್ ಹಾಜರಿದ್ದರು.



ರಾಜಸ್ವ ನಿರೀಕ್ಷಕ ಹೇಮಂತ್ ಕುಮಾರ್, ನಗರಸಭಾ ಆಯುಕ್ತ ನಾಗಭೂಷಣ್, ನಗರ ಮತ್ತು ಗ್ರಾಮಾಂ­ತರ ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ ಕಾರ್ಯ­ಪಾಲಕ ಎಂಜಿನಿಯರ್ ವೈದೀಹಿ ಇದ್ದರು.