ಕೋಲ್ಕತ್ತ: ಎಂಜಿನಿಯರಿಂಗ್‌ ಸರಕುಗಳ ರಫ್ತು ಪ್ರಮಾಣವು ಏಪ್ರಿಲ್–ಆಗಸ್ಟ್‌ ಅವಧಿಯಲ್ಲಿ ಶೇಕಡ 18ರಷ್ಟು ಇಳಿಕೆಯಾಗಿದೆ ಎಂದು ಎಂಜಿನಿಯರಿಂಗ್‌ ರಫ್ತು ಉತ್ತೇಜನ ಮಂಡಳಿ (ಇಇಪಿಸಿ) ತಿಳಿಸಿದೆ.
ಹಿಂದಿನ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ ₹ 2.32 ಲಕ್ಷ ಕೋಟಿ ಮೌಲ್ಯದ ಸರಕುಗಳು ರಫ್ತಾಗಿದ್ದವು. ಈ ಬಾರಿ ₹ 1.89 ಲಕ್ಷ ಕೋಟಿ ಮೌಲ್ಯದ ಸರಕುಗಳು ರಪ್ತಾಗಿವೆ.
‘ಕೋವಿಡ್‌–19 ಸಾಂಕ್ರಾಮಿಕದಿಂದಾಗಿ ಒಟ್ಟಾರೆ ರಫ್ತು ಮಾರುಕಟ್ಟೆಯೇ ಸವಾಲಿನಿಂದ ಕೂಡಿದೆ. ಉತ್ತರ ಏಷ್ಯಾದ ಕೆಲವು ದೇಶಗಳಲ್ಲಿ ಕೈಗಾರಿಕಾ ಚಟುವಟಿಕೆಗಳು ಚೇತರಿಸಿಕೊಂಡಿವೆ. ಇದರಿಂದಾಗಿ ಮುಂದಿನ ದಿನಗಳಲ್ಲಿ ಮಾರುಕಟ್ಟೆಯೂ ಚೇತರಿಸಿಕೊಳ್ಳುವ ನಿರೀಕ್ಷೆ ಇದೆ’ ಎಂದು ಇಇಪಿಸಿ ಇಂಡಿಯಾದ ಅಧ್ಯಕ್ಷ ಮಹೇಶ್‌ ದೇಸಾಯಿ ತಿಳಿಸಿದ್ದಾರೆ.
ಕಬ್ಬಿಣ, ಉಕ್ಕು, ತಾಮ್ರ ಮತ್ತು ಸತುವಿನ ರಫ್ತಿನಲ್ಲಿ ಸುಧಾರಣೆ ಕಂಡುಬರುತ್ತಿದೆ. ಆದರೆ ಮೌಲ್ಯವರ್ಧಿತ ಕಬ್ಬಿಣ ಮತ್ತು ಉಕ್ಕಿನ ಉತ್ಪನ್ನಗಳ ರಫ್ತು ಶೇ 29.7ರಷ್ಟು ಇಳಿಕೆಯಾಗಿದೆ ಎಂದು ಮಂಡಳಿ ತಿಳಿಸಿದೆ.
