ನವದೆಹಲಿ: ವಿದೇಶಿ ಬಂಡವಾಳ ಹೂಡಿಕೆದಾರರು (ಎಫ್‌ಪಿಐ) ದೇಶದ ಸಾಲ ಮಾರುಕಟ್ಟೆಯಲ್ಲಿ ಜನವರಿಯಲ್ಲಿ ₹19,800 ಕೋಟಿಗೂ ಅಧಿಕ ಮೊತ್ತವನ್ನು ಹೂಡಿಕೆ ಮಾಡಿದ್ದಾರೆ. ಇದು ಆರು ವರ್ಷದ ಗರಿಷ್ಠ ಮಾಸಿಕ ಒಳಹರಿವು ಆಗಿದೆ.
ಅಮೆರಿಕದಲ್ಲಿ ಬಾಂಡ್‌ಗಳಿಂದ ಸಿಗುವ ಆದಾಯದ ಏರಿಕೆಯಿಂದಾಗಿ ಕಳೆದ ತಿಂಗಳು ₹25,743 ಕೋಟಿ ಮೌಲ್ಯದ ಷೇರುಗಳನ್ನು ವಾಪಸ್‌ ತೆಗೆದುಕೊಂಡಿದ್ದಾರೆ ಎಂದು ಅಂಕಿ ಅಂಶಗಳು ತಿಳಿಸಿವೆ.
2024ರ ಜನವರಿಯಲ್ಲಿ ₹19,836 ಕೋಟಿ, 2023ರ ಡಿಸೆಂಬರ್‌ನಲ್ಲಿ ₹18,302 ಕೋಟಿ, ನವೆಂಬರ್‌ ₹14,860 ಕೋಟಿ ಮತ್ತು ಅಕ್ಟೋಬರ್‌ನಲ್ಲಿ ₹6,381 ಕೋಟಿ ಎಫ್‌ಪಿಐ ಹೂಡಿಕೆ ಆಗಿತ್ತು.
‘ಜೆಪಿ ಮೋರ್ಗನ್ ತನ್ನ ಸೂಚ್ಯಂಕದಲ್ಲಿ ಭಾರತ ಸರ್ಕಾರದ ಬಾಂಡ್‌ಗಳನ್ನು ಸೇರಿಸುವ ನಿರ್ಧಾರ ಕೈಗೊಂಡಿದೆ. ಹೀಗಾಗಿ, ಜನವರಿಯಲ್ಲಿ ಎಫ್‌ಪಿಐಗಳಿಂದ ₹19,836 ಕೋಟಿ ನಿವ್ವಳ ಒಳಹರಿವು ಬಂದಿದೆ’ ಎಂದು ಮಾರ್ನಿಂಗ್‌ಸ್ಟಾರ್ ಇನ್ವೆಸ್ಟ್‌ಮೆಂಟ್ ರಿಸರ್ಚ್ ಇಂಡಿಯಾದ ಹಿಮಾಂಶು ಶ್ರೀವಾಸ್ತವ ಹೇಳಿದ್ದಾರೆ.
ಮುಂದಿನ 18ರಿಂದ 24 ತಿಂಗಳಲ್ಲಿ ಸುಮಾರು ₹1.65 ಲಕ್ಷ ಕೋಟಿಯಿಂದ ₹3.30 ಲಕ್ಷ ಕೋಟಿಯಷ್ಟು ಒಳಹರಿವು ನಿರೀಕ್ಷಿಸಲಾಗಿದೆ. ಇದರಿಂದಾಗಿ ವಿದೇಶಿ ಹೂಡಿಕೆದಾರರಿಗೆ ಭಾರತದ ಬಾಂಡ್‌ಗಳ ಲಭ್ಯತೆ ಹೆಚ್ಚಾಗುತ್ತದೆ. ಇದರಿಂದಾಗಿ, ರೂಪಾಯಿಯನ್ನು ಬಲಗೊಳ್ಳಬಹುದು ಮತ್ತು ಆರ್ಥಿಕತೆಗೆ ಉತ್ತೇಜನ ದೊರೆಯಬಹುದು ಎಂದು ಹೇಳಿದರು.
