ನವದೆಹಲಿ: ಇನ್ಫೊಸಿಸ್ ಕಂಪನಿಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ (ಸಿಇಒ) ಸಲೀಲ್‌ ಪಾರೇಖ್ ಅವರ ಒಟ್ಟು ವಾರ್ಷಿಕ ವೇತನ 2020–21ರಲ್ಲಿ ₹49.68 ಕೋಟಿಗೆ ಏರಿಕೆಯಾಗಿದೆ.
2019–20ರಲ್ಲಿ ಅವರ ಒಟ್ಟು ವಾರ್ಷಿಕ ವೇತನ ₹34.27 ಕೋಟಿ ಆಗಿತ್ತು.
ಕಂಪನಿಯು 2020–21ನೇ ಸಾಲಿನ ವಾರ್ಷಿಕ ವರದಿಯಲ್ಲಿ ಸಿಇಒ ವೇತನದ ಬಗ್ಗೆ ಉಲ್ಲೇಖಿಸಿದೆ. ಪಾರೇಖ್ ಅವರು ₹6.07 ಕೋಟಿ ವೇತನ, ₹12.62 ಕೋಟಿ ಬೋನಸ್, ಇನ್‌ಸೆಂಟಿವ್ಸ್‌ ಅಥವಾ ವೇರಿಯೇಬಲ್ ಪೇ ಹಾಗೂ ಇತರೆ ₹30.99 ಕೋಟಿ ಪಡೆದಿದ್ದಾರೆ ಎಂದು ಉಲ್ಲೇಖಿಸಲಾಗಿದೆ.
ದೇಶದ ಪ್ರಮುಖ ಐಟಿ ಕಂಪನಿಗಳಲ್ಲಿ ಒಂದಾಗಿರುವ ಟಾಟಾ ಕನ್ಸಲ್ಟೆನ್ಸಿ ಸರ್ವೀಸ್‌ (ಟಿಸಿಎಸ್‌) ಕಂಪನಿಯ ಸಿಇಒ, ಎಂಡಿ ರಾಜೇಶ್‌ ಗೋಪಿನಾಥನ್ ಅವರ 2020–21ನೇ ಸಾಲಿನ ವಾರ್ಷಿಕ ವೇತನ ₹20.36 ಕೋಟಿ ಆಗಿದೆ. ಇವರ ಒಟ್ಟು ವಾರ್ಷಿಕ ವೇತನ ಕಳೆದ ಬಾರಿ ₹13.3 ಕೋಟಿ ಆಗಿತ್ತು.
ಇನ್ಫೊಸಿಸ್ ಅಧ್ಯಕ್ಷ ನಂದನ್ ನಿಲೇಕಣಿ ಅವರು 2020-21ರ ಅವಧಿಯಲ್ಲಿ ಕಂಪನಿಗೆ ಸಲ್ಲಿಸಿದ ಸೇವೆಗಳಿಗೆ ಸ್ವಯಂಪ್ರೇರಣೆಯಿಂದ ಸಂಭಾವನೆ ಪಡೆದಿಲ್ಲ ಎಂದೂ ವಾರ್ಷಿಕ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಮುಖ್ಯ ಕಾರ್ಯಾಚರಣೆ ಅಧಿಕಾರಿ ಯು.ಬಿ.ಪ್ರವೀಣ್ ರಾವ್ ಅವರ ವಾರ್ಷಿಕ ವೇತನ ಕಳೆದ ಹಣಕಾಸು ವರ್ಷದಲ್ಲಿ ₹10.6 ಕೋಟಿ ಇದ್ದುದು 2020–21ನೇ ಸಾಲಿನಲ್ಲಿ ₹17.33 ಕೋಟಿಗೆ ಹೆಚ್ಚಳವಾಗಿದೆ.
