ಅಮೆರಿಕಕ್ಕೆ ಎದುರೇಟು ನೀಡಲಿರುವ ಇರಾನ್

ದುಬೈ: ‘ಕಚ್ಚಾ ತೈಲ ಮತ್ತು ಕಚ್ಚಾ ತೈಲಯೇತರ ರಫ್ತು ಹೆಚ್ಚಿಸುವ ಮೂಲಕ ಅಮೆರಿಕ ಹೇರಿರುವ ನಿರ್ಬಂಧಕ್ಕೆ ಎದುರೇಟು ನೀಡಬೇಕಿದೆ’ ಎಂದು ಇರಾನ್‌ ಅಧ್ಯಕ್ಷ ಹಸನ್‌ ರೌಹಾನಿ ಹೇಳಿದ್ದಾರೆ.

ಇರಾನ್‌ ಟಿವಿಯಲ್ಲಿ ಮಾತನಾಡಿದ ಅವರು, ಅಮೆರಿಕವು ನಮ್ಮ ವಿದೇಶಿ ವಿನಿಮಯ ಮೀಸಲು ಸಂಗ್ರಹವನ್ನು ಕಡಿಮೆ ಮಾಡಲು ಯತ್ನಿಸುತ್ತಿದೆ. ಹೀಗಾಗಿ ನಾವು ನಮ್ಮ ಕರೆನ್ಸಿ ವರಮಾನ ಹೆಚ್ಚಿಸಿಕೊಳ್ಳುವ ಜತೆಗೆ ಕರೆನ್ಸಿ ವೆಚ್ಚವನ್ನೂ ಕಡಿತ ಮಾಡಬೇಕಿದೆ ಎಂದಿದ್ದಾರೆ.

‘ಹಿಂದಿನ ವರ್ಷ ತೈಲಯೇತರ ರಫ್ತು ಮೌಲ್ಯ ₹ 3 ಲಕ್ಷ ಕೋಟಿ ಇತ್ತು. ಇದನ್ನು ಇನ್ನಷ್ಟು ಹೆಚ್ಚಿಸಬೇಕು. ನಮ್ಮ ತೈಲ ರಫ್ತು ಮೇಲೆ ಅಮೆರಿಕ ಹೇರಿರುವ ನಿಷೇಧವನ್ನು ವಿರೋಧಿಸಬೇಕು’ ಎಂದಿದ್ದಾರೆ.

ರಫ್ತು ತಗ್ಗಲಿದೆ: ಮೇ ತಿಂಗಳಿನಲ್ಲಿ ಇರಾನ್‌ನಿಂದ ತೈಲ ರಫ್ತು ಕಡಿಮೆಯಾಗಲಿದೆ ಎಂದು ಉದ್ಯಮ ಮೂಲಗಳು ಹೇಳಿವೆ.

ಭಾರತವನ್ನೂ ಒಳಗೊಂಡು 8 ದೇಶಗಳಿಗೆ ನೀಡಿದ್ದ ವಿನಾಯ್ತಿ ಮೇ2ಕ್ಕೆ ಕೊನೆಗೊಂಡಿದೆ. ಹೀಗಾಗಿ ಇರಾನ್‌ನಿಂದ ತೈಲ ಆಮದು ಮಾಡಿಕೊಳ್ಳುವಂತಿಲ್ಲ.

ಮೇನಲ್ಲಿ ಪ್ರತಿ ದಿನದ ರಫ್ತು 7 ಲಕ್ಷ ಬ್ಯಾರೆಲ್‌ಗಳಿಗೆ ಇಳಿಕೆಯಾಗಲಿದ್ದು, ಆ ಬಳಿಕ 5 ಲಕ್ಷ ಬ್ಯಾರೆಲ್‌ಗೆ ತಗ್ಗಲಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

4 ಲಕ್ಷ ಬ್ಯಾರೆಲ್‌ನಿಂದ 6 ಲಕ್ಷ ಬ್ಯಾರೆಲ್‌ಗಳವರೆಗೆ ಇರಾನ್‌ನಿಂದ ರಫ್ತು ಮುಂದುವರಿಯಲಿದೆ ಎಂದು ತೈಲೋತ್ಪನ್ನ ರಫ್ತು ದೇಶಗಳ ಸಂಘಟನೆಯ (ಒಪೆಕ್‌) ಮೂಲಗಳು ತಿಳಿಸಿವೆ.