ಆರ್‌ಬಿಐನ ಚಿನ್ನದ ಖರೀದಿ ಹೆಚ್ಚಳ

ಜುಲೈನಿಂದ ಸೆಪ್ಟೆಂಬರ್‌ವರೆಗಿನ ಮೂರು ತಿಂಗಳ ಅವಧಿಯಲ್ಲಿ ಆರ್‌ಬಿಐ 13.7 ಟನ್‌ಗಳಷ್ಟು ಚಿನ್ನ ಖರೀದಿಸಿರುವುದು ವಿಶ್ವ ಚಿನ್ನದ ಮಂಡಳಿಯ (ಡಬ್ಲ್ಯುಜಿಸಿ) ಅಂಕಿಅಂಶಗಳಿಂದ ತಿಳಿದು ಬಂದಿದೆ. ಜನವರಿಯಿಂದ ಇದುವರೆಗೆ 21.8 ಟನ್ ಚಿನ್ನ ಖರೀದಿಸಿದೆ. ಆದರೆ, ಜುಲೈನಿಂದೀಚೆಗೆ ಖರೀದಿ ಪ್ರಮಾಣ ಹೆಚ್ಚಿದೆ. ಸದ್ಯಕ್ಕೆ ಆರ್‌ಬಿಐ ಬಳಿ 566 ಟನ್‌ ಚಿನ್ನ ಇದೆ.

ವಿಶ್ವದಾದ್ಯಂತ ಇತರ ಕೇಂದ್ರೀಯ ಬ್ಯಾಂಕ್‌ಗಳೂ ತಮ್ಮ ಚಿನ್ನದ ಸಂಗ್ರಹ ಹೆಚ್ಚಿಸಲು ಗಮನ ನೀಡಿವೆ. 2015ರ ನಂತರ ಇದೇ ಮೊದಲ ಬಾರಿಗೆ ಕೇಂದ್ರೀಯ ಬ್ಯಾಂಕ್‌ಗಳು ಹೆಚ್ಚಿನ ಪ್ರಮಾಣದಲ್ಲಿ ಚಿನ್ನ ಖರೀದಿಗೆ ಆಸಕ್ತಿ ತೋರಿಸುತ್ತಿವೆ.

ಆರ್ಥಿಕವಾಗಿ ಪ್ರವರ್ಧಮಾನಕ್ಕೆ ಬರುತ್ತಿರುವ ಅನೇಕ ದೇಶಗಳ ಷೇರುಪೇಟೆಗಳಲ್ಲಿನ ನಷ್ಟದ ಕಾರಣಕ್ಕೆ ಹೂಡಿಕೆದಾರರೂ ಈಗ ಚಿನ್ನದಲ್ಲಿ ಹಣ ತೊಡಗಿಸಲು ಆಸಕ್ತಿ ತೋರಿಸುತ್ತಿದ್ದಾರೆ.

ನಾಣ್ಯ ಖರೀದಿಗೆ ಒಲವು: ಕರೆನ್ಸಿ ವಿನಿಮಯ ದರ ಕುಸಿಯುತ್ತಿರುವ ಕಾರಣಕ್ಕೆ ನಗರ ಪ್ರದೇಶಗಳಲ್ಲಿನ ಹೂಡಿಕೆದಾರರು ಚಿನ್ನದ ಗಟ್ಟಿ ಮತ್ತು ನಾಣ್ಯಗಳ ಖರೀದಿಗೆ ಒಲವು ತೋರುತ್ತಿದ್ದಾರೆ. ಜುಲೈನಿಂದ ಸೆಪ್ಟೆಂಬರ್‌ ಅವಧಿಯಲ್ಲಿ ದೇಶದಲ್ಲಿ ಚಿನ್ನದ ಗಟ್ಟಿ ಮತ್ತು ನಾಣ್ಯಗಳ ಬೇಡಿಕೆ 34.4 ಟನ್‌ಗಳಷ್ಟಿತ್ತು ಎಂದು ‘ಡಬ್ಲ್ಯುಜಿಸಿ’ ಮಾಹಿತಿ ನೀಡಿದೆ. ಈ ತ್ರೈಮಾಸಿಕದಲ್ಲಿ ಚಿನ್ನಾಭರಣಗಳ ಬೇಡಿಕೆಯೂ ಶೇ 10ರಷ್ಟು ಹೆಚ್ಚಳಗೊಂಡಿತ್ತು.