ನವದೆಹಲಿ: ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ ಮತ್ತು ಅದರ ದೂರಸಂಪರ್ಕ ಸೇವಾ ಕಂಪನಿಯಾಗಿರುವ ಜಿಯೊ ಇನ್ಫೊಕಾಮ್ ವಿವಿಧ ಬ್ಯಾಂಕ್‌ಗಳಿಂದ ಒಟ್ಟು 5 ಬಿಲಿಯನ್ ಡಾಲರ್ (₹ 40 ಸಾವಿರ ಕೋಟಿ) ಸಾಲ ಸಂಗ್ರಹಿಸಿದೆ. ಇದು ದೇಶದ ಕಾರ್ಪೊರೇಟ್ ಇತಿಹಾಸದಲ್ಲಿ ವಿವಿಧ ಬ್ಯಾಂಕ್‌ಗಳಿಂದ ಪಡೆದಿರುವ ಅತಿದೊಡ್ಡ ಮೊತ್ತದ ಸಾಲ ಎಂದು ಮೂಲಗಳು ಹೇಳಿವೆ.
ರಿಲಯನ್ಸ್ ಇಂಡಸ್ಟ್ರೀಸ್ ಕಂಪನಿಯು 55 ಬ್ಯಾಂಕ್‌ಗಳಿಂದ 3 ಬಿಲಿಯನ್ ಡಾಲರ್ (₹ 24 ಸಾವಿರ ಕೋಟಿ), ಜಿಯೊ ಇನ್ಫೊಕಾಮ್ ಕಂಪನಿಯು 18 ಬ್ಯಾಂಕ್‌ಗಳಿಂದ 2 ಬಿಲಿಯನ್ ಡಾಲರ್ (₹ 16 ಸಾವಿರ ಕೋಟಿ) ಸಾಲ ಸಂಗ್ರಹಿಸಿವೆ ಎಂದು ಮೂಲಗಳು ಹೇಳಿವೆ. ಈ ಮೊತ್ತವನ್ನು ರಿಲಯನ್ಸ್ ಕಂಪನಿಯು ಬಂಡವಾಳ ವೆಚ್ಚಗಳಿಗೆ ಬಳಸಿಕೊಳ್ಳಲಿದೆ.
ಜಿಯೊ ಕಂಪನಿಯು ರಾಷ್ಟ್ರದಾದ್ಯಂತ 5ಜಿ ಜಾಲ ವಿಸ್ತರಣೆಗೆ ಬಳಕೆ ಮಾಡಿಕೊಳ್ಳಲಿದೆ. ಎರಡೂ ಕಂಪನಿಗಳಿಗೆ ಸಾಲ ನೀಡಿರುವ ಬ್ಯಾಂಕ್‌ಗಳ ಪಟ್ಟಿಯಲ್ಲಿ ಬ್ಯಾಂಕ್ ಆಫ್ ಅಮೆರಿಕ, ಎಚ್‌ಎಸ್‌ಬಿಸಿ, ಸಿಟಿ, ತೈವಾನ್‌ನ ಕೆಲವು ಬ್ಯಾಂಕ್‌ಗಳು ಇವೆ.
