ಪ್ರಶ್ನೋತ್ತರ ಅಂಕಣ | ಹಣಕಾಸು, ತೆರಿಗೆ ಸಂಬಂಧಿತ ಪ್ರಶ್ನೆಗಳಿಗೆ ತಜ್ಞರ ಉತ್ತರ

ಆದಾಯ ತೆರಿಗೆ ವಿವರ ಸಲ್ಲಿಸುವ ನಿಯಮಗಳಲ್ಲಿ, 75 ವರ್ಷ ಮೇಲ್ಪಟ್ಟ ಹಿರಿಯ ನಾಗರಿಕರಿಗೆ ವಿವರ ಸಲ್ಲಿಕೆಯ ಬಗ್ಗೆ ಕೆಲವು ರಿಯಾಯಿತಿಗಳಿವೆ. ಆದರೆ ಈ ವಿನಾಯಿತಿಗೆ ಕೆಲವೆಲ್ಲ ಇತಿ–ಮಿತಿಗಳೂ ಇವೆ. ಆದಾಯ ಮೂಲಕ್ಕೆ ಅನುಸರಿಸಿ ಈ ವಿನಾಯಿತಿ ಸಿಗುತ್ತದೆ. ಹೀಗಾಗಿ, ನಿಮ್ಮ ವಯಸ್ಸು ಮಾತ್ರವೇ ವಿನಾಯಿತಿ ಪಡೆಯಲು ಇರುವ ಮಾನದಂಡವಲ್ಲ.

ಸೆಕ್ಷನ್ 194ಪಿ ಪ್ರಕಾರ, ವಯಸ್ಸು 75 ವರ್ಷ ದಾಟಿದ ಮೇಲೆ ಪಿಂಚಣಿ ಆದಾಯ, ಕೇವಲ ಬಡ್ಡಿ ಆದಾಯ ಗಳಿಸುತ್ತಿದ್ದರೆ ಹಾಗೂ ಅದಕ್ಕೆ ಸಂಬಂಧಿಸಿ ಅಗತ್ಯವಿರುವ ಸಂಪೂರ್ಣ ತೆರಿಗೆಯನ್ನು ಬ್ಯಾಂಕ್‌ನಿಂದ ಕಡಿತ ಮಾಡಿ ಅದಕ್ಕೆ ಸಂಬಂಧಿಸಿದ ಮಾಹಿತಿಯನ್ನು ತೆರಿಗೆ ಇಲಾಖೆಗೆ ಸಲ್ಲಿಸಿದ್ದರೆ, ನೀವು ಈ ವಿನಾಯಿತಿಯನ್ನು ಖಂಡಿತಾ ಪಡೆಯಬಹುದು.

ಆದರೆ, ನೀವು ಪಿಂಚಣಿ ಹಾಗೂ ಬಡ್ಡಿ ಆದಾಯವಲ್ಲದೆ, ಡಿವಿಡೆಂಡ್ ಆದಾಯವನ್ನೂ ಪಡೆಯುತ್ತಿದ್ದೀರಿ. ಇದಲ್ಲದೆ, ಷೇರುಗಳ ಮಾರಾಟದಿಂದ ಇರುವ ಲಾಭ-ನಷ್ಟಕ್ಕೆ ಸಂಬಂಧಿಸಿದ ಮಾಹಿತಿಯನ್ನೂ ನೀವು ಸಲ್ಲಿಸಬೇಕಾಗಿರುತ್ತದೆ. ಇದಲ್ಲದೆ, ಯಾವುದೇ ವ್ಯಾಪಾರ-ವ್ಯವಹಾರ-ವೃತ್ತಿಗೆ ಸಂಬಂಧಿಸಿದ ಆದಾಯ ಉಳ್ಳವರು ಈ ವಿನಾಯಿತಿ ಪಡೆಯಲು ಅರ್ಹರಲ್ಲ. ಹೀಗಾಗಿ ನೀವು ಆದಾಯ ತೆರಿಗೆ ವಿವರ ಸಲ್ಲಿಸಬೇಕಾಗುತ್ತದೆ. ನಿಮ್ಮ ಸ್ನೇಹಿತರ ಆದಾಯ ಮೂಲ ಪಿಂಚಣಿ ಹಾಗೂ ಬಡ್ಡಿ ಮಾತ್ರ ಆಗಿರಬಹುದು. ಸಲ್ಲಿಸದಿದ್ದರೆ ನೋಟಿಸ್ ಬರುವ ಸಾಧ್ಯತೆಯನ್ನು ಅಲ್ಲಗಳೆಯುವಂತಿಲ್ಲ.

ನೀವು ಕೇಳಿದ ವಿಚಾರದಲ್ಲಿ ಯಾವುದು ಸರಳ ಎನ್ನುವ ವಿಚಾರಕ್ಕಿಂತ ಯಾವುದು ಕಾನೂನುಬದ್ಧ ಎನ್ನುವ ವಿಚಾರ ಹೆಚ್ಚು ಪ್ರಸ್ತುತ. ಆದಾಯ ತೆರಿಗೆ ಕಾನೂನಿನ ಪ್ರಕಾರ, ಯಾವುದೇ ವ್ಯಕ್ತಿ ನಿಧನರಾದರೆ, ಅವರು ಮೃತಪಟ್ಟ ದಿನದವರೆಗೆ ಅರ್ಜಿಸಿದ ಆದಾಯಕ್ಕೆ ಅವರ ಹೆಸರಿನಲ್ಲಿ ಆದಾಯ ತೆರಿಗೆ ವಿವರ ಸಲ್ಲಿಸಲು ಅವರ ಕಾಲಾನಂತರ, ಅವರ ಕಾನೂನುಬದ್ಧ ವಾರಸುದಾರ ಜವಾಬ್ದಾರನಾಗಿರುತ್ತಾನೆ.

ಅಂದರೆ, ನೀವು ನಿಮ್ಮ ತಂದೆಯವರ ನಿಧನದ ದಿನದವರೆಗೆ ಪಡೆದ ಬಡ್ಡಿ, ಬಾಡಿಗೆ ಇತ್ಯಾದಿ ಆದಾಯವನ್ನು ಕೂಡಿಸಿ, ಅವರ ಪರವಾಗಿ ಆದಾಯ ತೆರಿಗೆ ವಿವರ ಸಲ್ಲಿಸಬೇಕು. ಈ ವಿವರ ಸಲ್ಲಿಸುವ ಮೊದಲು ನೀವು ಆದಾಯ ತೆರಿಗೆ ಇಲಾಖೆ ವೆಬ್‌ಸೈಟ್‌ನಲ್ಲಿ ಅವರ ವಾರಸುದಾರ ಎನ್ನುವುದನ್ನು ದಾಖಲಿಸಬೇಕು. ಅದಕ್ಕೆ ಅಗತ್ಯವಿರುವ ಪ್ರಮಾಣಪತ್ರ, ಅಗತ್ಯ ದಾಖಲೆಗಳು (ಮರಣ ಪ್ರಮಾಣಪತ್ರ, ವಾರಸುದಾರ ಪ್ರಮಾಣಪತ್ರ, ಪ್ಯಾನ್‌ಕಾರ್ಡ್ ನಕಲುಗಳು) ಇತ್ಯಾದಿ ಸಲ್ಲಿಸಿದ ನಂತರ, ಅವರು ಪಡೆದ ಆದಾಯದ ಮೇಲೆ ನೀವು ವಿವರ ಸಲ್ಲಿಸಬಹುದು.

ಅವರ ನಿಧನದ ನಂತರ ಗಳಿಸಿದ ಎಲ್ಲಾ ಆದಾಯವೂ ನಿಮ್ಮ ಆದಾಯವಾಗಿರುತ್ತದೆ. ಅದರ ತೆರಿಗೆಯನ್ನು ನಿಮ್ಮ ಹೆಸರಲ್ಲೇ ಭರಿಸಬೇಕು. ಈ ಬಗ್ಗೆ ಕಾರ್ಯರೂಪದಲ್ಲಿ ನೀವು ವಿವರ ಸಲ್ಲಿಸುವಾಗ ನಿಮಗೆ ಹೆಚ್ಚಿನ ಸಲಹೆ ಅಗತ್ಯವಿದ್ದೀತು. ಇದಕ್ಕಾಗಿ ಅನುಭವಿ ಸಲಹೆಗಾರರ ಮಾರ್ಗದರ್ಶನ ಪಡೆಯುವುದು ಸೂಕ್ತ.