ಬನಹಟ್ಟಿ ಸೀರೆಗೆ ಭಾರೀ ಬೇಡಿಕೆ: ಆಂಧ್ರ, ತೆಲಂಗಾಣದಲ್ಲಿ ಹೆಚ್ಚು ಮಾರಾಟ

ಎರಡೂ ರಾಜ್ಯಗಳಲ್ಲಿ ಈ ಸೀರೆಗಳು ನಾರಾಯಣಪೇಟ ಸೀರೆಗಳೆಂದು ಪ್ರಸಿದ್ಧಿ ಪಡೆದುಕೊಂಡಿವೆ. ನಾಲ್ಕು ತಿಂಗಳಿಂದ ಬೇಡಿಕೆ ಹೆಚ್ಚಿದೆ. ಆನೆ, ನವಿಲು ಚಿತ್ರಗಳನ್ನು ಒಳಗೊಂಡ ಬೃಹತ್ ಬಾರ್ಡರೇ ಈ ಸೀರೆಯ ವಿಶೇಷ.

ಆಂಧ್ರಪ್ರದೇಶದ ಗಾಯಕಿ ಮಂಗ್ಲಿ ಈ ಸೀರೆಯನ್ನುಟ್ಟು,ಇದೇ ಬಟ್ಟೆಯಲ್ಲಿ ತಯಾರಿಸಿರುವ ಲಂಗ ದಾವಣಿ ಧರಿಸಿ ಸಂಗೀತ ಕಾರ್ಯಕ್ರಮದ ವೇದಿಕೆಗಳಲ್ಲಿ ಕಾಣಿಸಿಕೊಂಡಿದ್ದರು. ದಕ್ಷಿಣ ಕರ್ನಾಟಕದಲ್ಲಿ ಅಪಾರ ಅಭಿಮಾನಿಗಳನ್ನು ಹೊಂದಿರುವ ಮಂಗ್ಲಿ ಧರಿಸಿದ್ದ ಸೀಎಯನ್ನು ಈಗ ಅಭಿಮಾನಿಗಳು ಖರೀದಿಸಲಾರಂಭಿಸಿದ್ದಾರೆ.

ಆರಂಭದಲ್ಲಿ ಕೆಲವೇ ಕೆಲವು ಸೀರೆಗಳನ್ನು ಉತ್ಪಾದಕರು ಎರಡೂ ರಾಜ್ಯಗಳಿಗೆ ಕಳುಹಿಸಿಕೊಡುತ್ತಿದ್ದರು. ಬೇಡಿಕೆ ಉಂಟಾಗಿದ್ದರಿಂದ ನಾಲ್ಕು ತಿಂಗಳುಗಳಿಂದ ಬನಹಟ್ಟಿಯಿಂದ ದಿನಕ್ಕೆ ಸಾವಿರಕ್ಕಿಂತ ಹೆಚ್ಚು ಸೀರೆಗಳು ಮಾರಾಟವಾಗುತ್ತಿವೆ. ಇದೇ ರೀತಿಯ ಸೀರೆಗಳನ್ನು ಬೆಳಗಾವಿ, ಕೊಪ್ಪಳ ಹಾಗೂ ಭಾಗ್ಯನಗರದಲ್ಲಿ ನೇಯ್ಗೆ ಮಾಡಲಾಗುತ್ತದೆ.

ಆರಂಭದಲ್ಲಿ ಒಂದು ಸೀರೆ ₹1,000 ಕ್ಕಿಂತ ಹೆಚ್ಚಿನ ಬೆಲೆಗೆ ಮಾರಾಟವಾಗುತ್ತಿತ್ತು. ಈಗ ಸಾಕಷ್ಟು ಪ್ರಮಾಣದಲ್ಲಿ ಪೂರೈಕೆ ಆಗುತ್ತಿರುವುದರಿಂದ ₹800 ರಿಂದ ₹900 ಬೆಲೆಗೆ ಮಾರಾಟವಾಗುತ್ತಿವೆ.

ಕೋವಿಡ್‍ನಿಂದಾಗಿ ಮತ್ತು ಕಚ್ಚಾ ಸರಕುಗಳ ಬೆಲೆಗಳಲ್ಲಿ ಏರಿಕೆಯಿಂದಾಗಿ ಇಲ್ಲಿಯ ಜವಳಿ ಉದ್ಯಮಕ್ಕೆ ಹಿನ್ನಡೆಯಾಗಿತ್ತು. ಸೀರೆಗಳ ಬೇಡಿಕೆ ಹೆಚ್ಚಳದಿಂದ ಇಲ್ಲಿಯ ನೇಕಾರರು ಸ್ವಲ್ಪ ಪ್ರಮಾಣದಲ್ಲಿ ಲಾಭ ಪಡೆಯುತ್ತಿದ್ದಾರೆ‌.

*
ಬನಹಟ್ಟಿಯಲ್ಲಿ ತಯಾರಾಗುವ ಸೀರೆಗೆ ಉತ್ತಮ ಬೇಡಿಕೆ ಹೆಚ್ಚಿದೆ. ಸಾಕಷ್ಟು ಪ್ರಮಾಣದಲ್ಲಿ ಉತ್ಪಾದನೆ ಮಾಡಲಾಗುತ್ತಿದೆ
–ಗೋಕುಲ ಕಾಬರಾ, ಸೀರೆ ಉತ್ಪಾದಕರು