ಜಮಖಂಡಿ | ಹದಗೆಟ್ಟ ರಸ್ತೆ; ಸಂಚಾರ ದುಸ್ತರ

ಸಾವಳಗಿ ಗ್ರಾಮದಿಂದ ತುಬಚಿ, ಶೂರ್ಪಾಲಿ, ಝಂಜರವಾಡ ಗ್ರಾಮಗಳಿಗೆ ಹೋಗಲು ಹಾಗೂ ಸಾವಳಗಿ ಗ್ರಾಮದ ತೋಟದ ವಸ್ತಿಯ ಜನರಿಗೆ ತೀವ್ರ ತೊಂದರೆಯಾಗಿದೆ. ನೀರು ನಿಂತು ರಸ್ತೆ ಸಂಪೂರ್ಣ ಕೆಸರು ಗದ್ದೆಯಂತಾಗಿದೆ. ರಸ್ತೆಯುದ್ದಕ್ಕೂ ಬೃಹತ್‌ ಗುಂಡಿಗಳು ನಿರ್ಮಾಣವಾಗಿದ್ದು 2.5 ಕಿ.ಮೀ ರಸ್ತೆ ಕ್ರಮಿಸಲು 20-30 ನಿಮಿಷಗಳು ಬೇಕಾಗುತ್ತವೆ.

‘ರಸ್ತೆ ಹಾಳಾಗಿ ಐದಾರು ವರ್ಷಗಳಾಗಿವೆ. ಬೈಕ್‌ ಸವಾರರು, ವಾಹನ ಚಾಲಕರು ಸಂಚಾರಕ್ಕೆ ಪ್ರಯಾಸ ಪಡಬೇಕಾಗಿದೆ. ಆಗಾಗ ಸಣ್ಣ ಪುಟ್ಟ ಅಪಘಾತಗಳು ಸಂಭವಿಸುತ್ತಿವೆ. ವಾಹನಗಳಿಗೆ ಹಾನಿಯುಂಟಾಗುತ್ತಿದೆ. ಅನೇಕ ಬಾರಿ ವಾಹನಗಳು ರಸ್ತೆಯ ಮಧ್ಯದಲ್ಲಿ ಕೆಟ್ಟು ನಿಂತಿವೆ. ಕೂಡಲೇ ಅಧಿಕಾರಿಗಳು ರಸ್ತೆ ನಿರ್ಮಿಸಬೇಕು’ ಎಂದು ಸ್ಥಳೀಯ ನಿವಾಸಿ ಕೃಷ್ಣಾ ಬಂಡಿವಡ್ಡರ ಒತ್ತಾಯಿಸಿದ್ದಾರೆ.

‘ಈ ರಸ್ತೆಯ ಮೂಲಕ ನಿತ್ಯ ತೋಟದ ವಸ್ತಿಯಿಂದ ನೂರಾರು ವಿದ್ಯಾರ್ಥಿಗಳು ಶಾಲೆಗೆ ಹೋಗುತ್ತಾರೆ. ಪಕ್ಕಕ್ಕೆ ವಾಹನಗಳು ಹಾದು ಹೋದರೆ ರಸ್ತೆಯ ನೀರು ಮಕ್ಕಳಿಗೆ ಸಿಡಿದು ಬಟ್ಟೆ ಗಲಿಜಾಗುತ್ತಿದೆ. ಹಲವು ಮಕ್ಕಳು ಕಾಲು ಜಾರಿ ಬಿದ್ದಿರುವ ಉದಾಹರಣೆಗಳಿವೆ. ವೃದ್ಧರು, ಮಹಿಳೆಯರು ಜೀವಭಯದಿಂದ ಸಂಚರಿಸುವ ಅನಿವಾರ್ಯತೆ ಇದೆ’ ಎಂದು ಬಸವರಾಜ ಮಾಳಿ ದೂರಿದರು.

‘ಚುನಾವಣೆ ಬಂದಾಗ ಎಲ್ಲ ರಾಜಕೀಯ ಮುಖಂಡರು ರಸ್ತೆ ಮಾಡುವುದಾಗಿ ಆಶ್ವಾಸನೆ ನೀಡುತ್ತಾರೆ. ಆದರೆ ಚುನಾವಣೆ ಮುಗಿದ ನಂತರ ಯಾರು ಇತ್ತ ಸುಳಿಯುವದಿಲ್ಲ. ಡಾಂಬರ್‌ ರಸ್ತೆಯಾಗುವವರೆಗೆ ಬಿದ್ದಿರುವ ತಗ್ಗು ಮುಚ್ಚಲು ಗ್ರಾಮ ಪಂಚಾಯಿತಿ ಸದಸ್ಯರಿಗೆ ಹಾಗೂ ಅಧಿಕಾರಿಗಳಿಗೆ ಹಲವು ಬಾರಿ ಮನವಿ ಮಾಡಿದರೂ ಕ್ರಮ ಕೈಗೊಳ್ಳುತ್ತಿಲ್ಲ’ ಎಂದು ತೋಟದ ವಸ್ತಿ ನಿವಾಸಿ ಅಜೀತ ಕವಟೆಕರ ಆರೋಪಿಸಿದರು.