ಕಂಪ್ಲಿ: ಹಲಗೆ ಸದ್ದಿಗೆ ಯುವಕರ ಹೆಜ್ಜೆ

ಪಟ್ಟಣದ ವಿವಿಧೆಡೆ ಯುವಕರ ತಂಡ ಬಿರು ಬಿಸಿಲನ್ನು ಲೆಕ್ಕಿಸದೆ ಹಲಗೆ ಶಬ್ಧಕ್ಕೆ ಹೆಜ್ಜೆ ಹಾಕಿದರು. ಇನ್ನು ಕೆಲವರು ಕುಣಿದು ಕುಪ್ಪಳಿಸಿದರು.

ಪೋಷಕರು ತಂದಿದ್ದ ನೈಸರ್ಗಿಕ ಬಣ್ಣಗಳನ್ನು ಬಳಸಿ ನೀರಿನಲ್ಲಿ ಮಿಶ್ರಣ ಮಾಡಿ ಬಳಿಕ ಪಿಚಕಾರಿ ಉಪಕರಣಕ್ಕೆ ತುಂಬಿ ಗೆಳೆಯರಿಗೆ ಎರಚುವ ಮೂಲಕ ಚಿಣ್ಣರು ಸಂಭ್ರಮಪಟ್ಟರು.

ಕೆಲವರು ಅಣಕು ಶವಯಾತ್ರೆ ಮಾಡಿ ಗಮನಸೆಳೆದರು. ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಗಳಿಗೆ ಪರೀಕ್ಷೆ ಶುರು ಆಗಿರುವುದರಿಂದ ಪ್ರಸ್ತುತ ಹಬ್ಬದಿಂದ ಅವರು ಅಂತರ ಕಾಪಾಡಿಕೊಂಡಿರುವುದು ಕಂಡುಬಂತು.

ಬಣ್ಣದಲ್ಲಿ ಮಿಂದೆದ್ದವರು ಸಂಜೆಯಾಗುತ್ತಿದ್ದಂತೆ ಇಲ್ಲಿಯ ಕೋಟೆ ಪ್ರದೇಶ ಬಳಿಯ ತುಂಗಭದ್ರಾ ನದಿಗೆ ತೆರಳಿ ಸ್ನಾನ ಮಾಡಿ ಮರಳಿದರು.

ಸ್ಥಳೀಯ ಪೊಲೀಸ್ ಠಾಣೆ ವ್ಯಾಪ್ತಿಯ 10 ಕಡೆ ಕಾಮದೇವ ಮತ್ತು ರತಿದೇವಿ ಮೂರ್ತಿ ಪ್ರತಿಷ್ಠಾಪಿಸಲಾಗಿತ್ತು. ಮಾರ್ಚ್ 25ರ ಹೋಳಿ ಹುಣ್ಣಿಮೆಯಂದು ಸಂಜೆ ಕಾಮನ ಹಾಡನ್ನು ಹಾಡುತ್ತ ಮೆರವಣಿಗೆ ನಡೆಸಿ ಮಧ್ಯರಾತ್ರಿ ಕಾಮ ಮತ್ತು ರತಿಯರ ಚಿತ್ರಪಟವನ್ನು ದಹಿಸಲಾಯಿತು.