ಬಳ್ಳಾರಿ: ನಗರದಲ್ಲಿ ಗಾಂಜಾ ಮಾರಾಟ ಮಾಡುತ್ತಿದ್ದ ಇಬ್ಬರನ್ನು ಕೌಲ್‌ ಬಜಾರ್‌ ಪೊಲೀಸರು ಇತ್ತೀಚೆಗೆ ಬಂಧಿಸಿದ್ದಾರೆ.
ಒಡಿಶಾದ ಉದಯಗಿರಿ ಜಿಲ್ಲೆಯ ಜಿಕಾರಿಯಾ(30), ಜೋಹನ್‌ (34) ಬಂಧಿತರು. ಇವರಿಂದ ₹2ಲಕ್ಷ ಮೌಲ್ಯದ 4.31 ಕೆ.ಜಿ ಗಾಂಜಾ, ಜತೆಗೆ ಅವರ ಬಳಿ ಇದ್ದ ₹850 ನಗದು ವಶಕ್ಕೆ ಪಡೆದಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
ಕೌಲ್‌ಬಜಾರ್ ಪೊಲೀಸ್ ಠಾಣೆಯ ಸರಹದ್ದಿನ ನಲ್ಲಚೆರುವು ಪ್ರದೇಶದ ಇಟ್ಟಂಗಿ ಭಟ್ಟಿಯ ಆಂಜಿನೇಯ ಗುಡಿಗೆ ಹೋಗುವ ರಸ್ತೆಯ ಪಕ್ಕದಲ್ಲಿ ಇಬ್ಬರೂ ಗಾಂಜಾ ಮಾರಾಟ ಮಾಡುತ್ತಿದ್ದರು. ಆಗ ದಾಳಿ ನಡೆಸಿದ ಪೊಲೀಸರು ಇಬ್ಬರನ್ನೂ ಬಂಧಿಸಿದ್ದಾರೆ. ಆರೋಪಿತರ ವಿರುದ್ದ ಕಾನೂನು ಕ್ರಮ ಜರುಗಿಸಲಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.
ಕಾರ್ಯಚರಣೆಯಲ್ಲಿ ಭಾಗವಹಿಸಿದ್ದ ನಗರ ಡಿಎಸ್‌ಪಿ ಚಂದ್ರಕಾಂತ ನಂದರೆಡ್ಡಿ, ಕೌಲ್‌ಬಜಾರ್ ಪೊಲೀಸ್ ಠಾಣೆಯ ಇನ್ಸ್‌ಪೆಕ್ಟರ್‌ ಶ್ರೀ.ಟಿ.ಸುಭಾಷ ಚಂದ್ರ, ಪಿಎಸ್‌ಐ ಲಾರೆನ್ಸ್, ಎಎಸ್‌ಐ ಕೆ. ಮಂಜುನಾಥ ಮತ್ತು ಸಿಬ್ಬಂದಿಯನ್ನು ಎಸ್‌ಪಿ ಡಾ. ಶೋಭಾರಾಣಿ.ವಿ.ಜೆ ಪ್ರಶಂಸಿಸಿದ್ದಾರೆ.
