ಬೆಳಗಾವಿ: ‘ಬರ’ದ ಬವಣೆ ಮಧ್ಯೆಯೂ ದೀಪಾವಳಿ ಸಂಭ್ರಮ

ಪ್ರತಿಬಾರಿ ದೀಪಾವಳಿಯಲ್ಲಿ ವಿದೇಶಿ ವಸ್ತುಗಳೇ ಹೆಚ್ಚಾಗಿ ಲಗ್ಗೆ ಇಡುತ್ತಿದ್ದವು. ಈ ಬಾರಿ ಅವುಗಳ ಪ್ರಮಾಣ ತುಸು ತಗ್ಗಿದೆ. ಹಬ್ಬಕ್ಕೆ ಮೂರು ದಿನ ಮಾತ್ರ ಬಾಕಿ ಇದ್ದು, ಸ್ಥಳೀಯವಾಗಿ ಸಿದ್ಧವಾದ ವಸ್ತುಗಳನ್ನು ಜನರು ಉತ್ಸಾಹದಿಂದ ಖರೀದಿಸುತ್ತಿದ್ದಾರೆ.

ಇಲ್ಲಿನ ಗಣಪತ ಗಲ್ಲಿ, ಮಾರುತಿ ಗಲ್ಲಿ, ಖಡೇಬಜಾರ್‌, ಪಾಂಗುಳ ಗಲ್ಲಿ, ಬುರುಡ ಗಲ್ಲಿ ಮತ್ತಿತರ ಪ್ರದೇಶಗಳು ಬಗೆಬಗೆಯ ವಿನ್ಯಾಸಗಳ ಆಕಾಶಬುಟ್ಟಿಗಳಿಂದ ಕಂಗೊಳಿಸುತ್ತಿವೆ. ಬಣ್ಣದ ಕಾಗದ, ಬಟ್ಟೆ, ಕಟ್ಟಿಗೆ ಮತ್ತು ಬಿದಿರಿನಿಂದ ತಯಾರಿಸಿದ ಆಕಾಶಬುಟ್ಟಿ ಗ್ರಾಹಕರನ್ನು ಸೆಳೆಯುತ್ತಿವೆ. ಅವುಗಳ ದರ ₹150 ರಿಂದ ₹2 ಸಾವಿರದವರೆಗೆ ಇದೆ.

‘ಬಿದಿರಿನಿಂದ ತಯಾರಿಸಿದ ಆಕಾಶಬುಟ್ಟಿಗಳಿಗೆ ಹೆಚ್ಚಿನ ಬೇಡಿಕೆಯಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ, ಈ ಬಾರಿ ಉತ್ತಮ ವಹಿವಾಟು ನಡೆಯುತ್ತಿದೆ. ಬೆಳಗಾವಿ ಮಾತ್ರವಲ್ಲದೆ; ಮಹಾರಾಷ್ಟ್ರ ಮತ್ತು ಗೋವಾದಿಂದ ಗ್ರಾಹಕರು ಆಗಮಿಸಿ ಖರೀದಿಸುತ್ತಿದ್ದಾರೆ. ಹಬ್ಬ ಸಮೀಪಿಸುತ್ತಿದ್ದಂತೆ ಖರೀದಿ ಇನ್ನಷ್ಟು ಹೆಚ್ಚಲಿದೆ’ ಎಂದು ಬುರುಡ ಗಲ್ಲಿಯ ವ್ಯಾಪಾರಿ ಸಂಜಯ ತೆವರೆ ‘ಪ್ರಜಾವಾಣಿ’ಗೆ ತಿಳಿಸಿದರು.

ಹಣತೆಗಳ ಖರೀದಿ ಜೋರು: ಮಣ್ಣು ಮತ್ತು ಪ್ಲಾಸ್ಟಿಕ್‌ನಿಂದ ತಯಾರಿಸಿದ ಆಕರ್ಷಕ ವಿನ್ಯಾಸದ ಹಣತೆಗಳು ಮಾರುಕಟ್ಟೆಗೆ ಲಗ್ಗೆ ಇಟ್ಟಿವೆ. ಕಳೆದ ವರ್ಷ ಒಂದು ಡಜನ್‌ ಹಣತೆಗೆ ₹30 ಇತ್ತು. ಈ ಬಾರಿ ₹40ಕ್ಕೆ ಏರಿಕೆಯಾಗಿದೆ. ದೊಡ್ಡ ಹಣತೆಗಳ ದರ ₹200ರವರೆಗೆ ಇದೆ. ಮನೆಯ ತೋರಣಗಳು ಮತ್ತು ಪ್ಲಾಸ್ಟಿಕ್‌ ಹೂಮಾಲೆಗಳು ₹150ರಿಂದ ₹300ರವರೆಗೆ ಮಾರಾಟವಾಗುತ್ತಿವೆ.

ತುಂತುರು ಮಳೆ ಮಧ್ಯೆಯೂ ನಗರದ ಮಾರುಕಟ್ಟೆಯಲ್ಲಿ ಬುಧವಾರ ಜನದಟ್ಟಣೆ ಕಂಡುಬಂತು. ಮಹಿಳೆಯರು, ಮಕ್ಕಳು, ಯುವಕ–ಯುವತಿಯರು ಆಕಾಶಬುಟ್ಟಿಗಳು, ಹಣತೆಗಳು, ವಿವಿಧ ಬಣ್ಣದ ರಂಗೋಲಿ, ಹೊಸ ಬಟ್ಟೆಗಳು, ವಿದ್ಯುದ್ದೀಪಗಳು ಮತ್ತು ಆಲಂಕಾರಿಕ ವಸ್ತುಗಳನ್ನು ಖರೀದಿಸುತ್ತಿರುವುದು ಕಂಡುಬಂತು.

‘ಈ ಸಲ ಉತ್ತಮ ಮಳೆಯಾಗಿಲ್ಲ. ಬೆಳೆಯೂ ಬಂದಿಲ್ಲ. ಮತ್ತೊಂದೆಡೆ ವಿವಿಧ ವಸ್ತುಗಳ ಬೆಲೆಯೂ ತುಟ್ಟಿಯಾಗಿದೆ. ಆದರೂ, ದೀಪಾವಳಿಗೆ ಒಂದಿಷ್ಟು ವಸ್ತುಗಳನ್ನು ಖರೀದಿಸುತ್ತಿದ್ದೇವೆ’ ಎನ್ನುತ್ತಾರೆ ತಾಲ್ಲೂಕಿನ ಹೊನ್ನಿಹಾಳದ ಗ್ರಾಹಕ ಅಭಿಷೇಕ ಕೆಂಗೇರಿ.