ಬಡತನದಲ್ಲೂ ಸಾಧನೆಯ ಛಲಕ್ಕಿಲ್ಲ ಬರ

ಸವಿತಾ ಅವರಿಗೆ ಹುಟ್ಟುತ್ತಲೇ ಅಂಗವೈಕಲ್ಯ ಬಾಧಿಸಿತು. ಅವರ ಎರಡೂ ಕಾಲು ಸ್ವಲ್ಪ ಊನ ಇವೆ. ಆದರೆ, ಅವರ ಸಾಧನೆಯ ಹಂಬಲಕ್ಕೆ ಅದು ಅಡ್ಡಿಯೆನಿಸಲೇ ಇಲ್ಲ. ಇರುವ ಎರಡು ಎಕರೆ ಜಮೀನಿನಲ್ಲಿ ಕೃಷಿ ಕಾಯಕ ಮಾಡುತ್ತಿರುವ ವಿಠ್ಠಲ ಮತ್ತು ದುಂಡವ್ವ ದಂಪತಿ ತಮ್ಮ ಪುತ್ರಿಯ ಸಾಧನೆಯ ಸಸಿಗೆ ನೀರೆರೆಯುತ್ತಿದ್ದಾರೆ.

2023ರ ಅಕ್ಟೋಬರ್ 12ರಿಂದ 14ರವರೆಗೆ ನೈಜೀರಿಯಾದ ಜೆಟ್‌ ಲಾಗೋಸ್‌ನಲ್ಲಿ ಅಂತರರಾಷ್ಟ್ರೀಯ ಟೇಬಲ್ ಟೆನಿಸ್‌ ಫೆಡರೇಷನ್‌(ಐಟಿಟಿಎಫ್‌) ಆಯೋಜಿಸಿದ್ದ ಫಾ20 ವಾಲ್ಯೂ ಪ್ಯಾರಾ ಓಪನ್‌ ಟೂರ್ನಿಯಲ್ಲಿ ಸವಿತಾ ಅವರಿಗೆ ಎರಡು ಬೆಳ್ಳಿ ಪದಕಗಳು ಒಲಿದಿವೆ.

ಆರಂಭದಲ್ಲಿ ಸಂಗಮ್ ಬೈಲೂರ ಅವರಿಂದ ತರಬೇತಿ ಪಡೆದ ಸವಿತಾ ಸದ್ಯ ಗುಜರಾತ್‌ನ ಗಾಂಧಿನಗರದಲ್ಲಿ ಭಾರತ ಕ್ರೀಡಾ ಪ್ರಾಧಿಕಾರ ನಡೆಸುತ್ತಿರುವ ತರಬೇತಿ ಕೇಂದ್ರದಲ್ಲಿ ಅಭ್ಯಾಸ ಮಾಡುತ್ತಿದ್ದಾರೆ. ಅಲ್ಲಿ ಅವರಿಗೆ ಸತ್ಯಾ ಪಾರೀಖ್‌ ಕೋಚ್ ಆಗಿದ್ದಾರೆ.

ಎರಡು ವರ್ಷಗಳ ಹಿಂದೆ ಸ್ನೇಹಿತೆಯೊಬ್ಬರಿಂದ ಪ್ಯಾರಾ ಕ್ರೀಡೆಯ ಕುರಿತು ತಿಳಿದುಕೊಂಡ ಸವಿತಾ ಅವರಿಗೆ ಆಸಕ್ತಿ ಗರಿಗೆದರಿತು. ಅದರಲ್ಲೇ ಸಾಧನೆಯ ಶಿಖರವೇರುವ ಛಲ ಕುದುರಿತು.

ಇದೇ ವರ್ಷ ಜೂನ್‌ನಲ್ಲಿ ನಡೆದ ಯುಟಿಟಿ ರಾಷ್ಟ್ರೀಯ ಪ್ಯಾರಾ ಟೇಬಲ್ ಟೆನಿಸ್‌ ಚಾಂಪಿಯನ್‌ಷಿಪ್‌ನಲ್ಲಿ ಕಂಚು, ಫೆಬ್ರುವರಿಯಲ್ಲಿ ಬೆಂಗಳೂರಿನ ಕಂಠೀರವ ಕ್ರೀಡಾಂಗಣದಲ್ಲಿ ನಡೆದ ರಾಜ್ಯ ಪ್ಯಾರಾ ಟಿಟಿ ಚಾಂಪಿಯನ್‌ಷಿಪ್‌ನಲ್ಲಿ ಚಿನ್ನ, ಗೋವಾದಲ್ಲಿ ಜನವರಿಯಲ್ಲಿ ನಡೆದ ಪರ್ಪಲ್ ಫಾಸ್ಟ್ ಇಂಡಿಯಾ ಪ್ಯಾರಾ ಟೇಬಲ್ ಟೆನಿಸ್‌ ಚಾಂಪಿಯನ್‌ಷಿಪ್‌ನಲ್ಲಿ ಬೆಳ್ಳಿ ಸೇರಿದಂತೆ ರಾಷ್ಟ್ರ ಮತ್ತು ರಾಜ್ಯಮಟ್ಟದಲ್ಲಿ ಹಲವು ಪದಕಗಳು ಅವರ ಮಡಿಲು ಸೇರಿವೆ.

ಹಲವು ಮಹತ್ವದ ಟೂರ್ನಿಗಳ‌ಲ್ಲಿ ಭಾಗವಹಿಸಿರುವ ಸವಿತಾ ಅವರಿಗೆ ದೇಶದ ಪ್ರಸಿದ್ಧ ಪ್ಯಾರಾ ಟಿಟಿ ಆಟಗಾರ್ತಿ ಭವಿನಾ ಪಟೇಲ್ ಅಂದರೆ ಅಚ್ಚುಮೆಚ್ಚು. ಭವಿನಾ ಅವರು 2021ರ ಟೋಕಿಯೊ ಪ್ಯಾರಾಲಿಂಪಿಕ್ಸ್‌ನಲ್ಲಿ ಬೆಳ್ಳಿ ಪದಕ ವಿಜೇತೆಯಾಗಿದ್ದಾರೆ.

23 ವರ್ಷ ವಯಸ್ಸಿನ ಸವಿತಾ, ಪಿಯುಸಿಯವರೆಗೆ ಓದಿ ಶಿಕ್ಷಣ ಮೊಟಕುಗೊಳಿಸಿದ್ದಾರೆ. ಕಲಿಕೆ ಮುಂದುವರಿಸುವ ಹಂಬಲ ಅವರದು. ಎಲೆಮರೆ ಕಾಯಿಯಂತಿರುವ ಈ ಪ್ರತಿಭೆಗೆ ಪ್ರೋತ್ಸಾಹ ಬೇಕಿದೆ.